Parıj jankúıerlerdi qoqyspen qarsy alyp jatyr (foto)

Fransııada fýtboldan Eýropa chempıonatynyń bastalýyna bir táýlikteı ǵana ýaqyt qalǵan shaqta mundaǵy áleýmettik teketires qarqyny áli báseńdemeı tur. Eldegi asa iri kásipshilder odaǵy – Jalpy eńbek konferensııasy zabastovka jasaýyn jalǵastyryp jatyr.

Qazir osyndaı stachkalardyń saldarynan eldegi kóptegen qalalarda aımaqaralyq nemese júırik poıyzdar toqtap tur. Beısenbi kúni munda 11 maýsymnan 14 maýsymǵa deıin «Er Frans» áýe kompanııasy pılottarynyń zabastovka jarııalaǵany belgili boldy. Kompanııa basshylyǵy men ushqyshtar arasyndaǵy kelissóz óziniń nátıjesin bermedi. Kólik toraptary men munaı óńdeýshi zaýyttar toqtap qalǵannan keıin janar-jaǵar maı máselesinde aıtarlyqtaı qıyn jaǵdaı týyndady. Al kommýnaldyq qyzmet organdarynyń belsendileri qaladan kúl-qoqysty shyǵarýdan bas tartty. Munyń áserinen qalanyń ishi kádimgideı sasyp ketti. «Men jańa ǵana orasan zor tyshqandar tobynyń qarttar úıine qaraı bara jatqanyn kórip qaldym. Buǵan jol berýge bolmaıdy ǵoı», dedi Parıj qalasynda turatyn bir áıel ashýlanyp.

Fransııada bul zabastovkalardyń bastalǵanyna qazir úsh aı toldy. Beısenbi kúni olar álemdgi eń iri kóterme saýda rynogyna baratyn joldy jaýyp tastaýǵa áreket etti. Qalaı degende de, bul chempıonattyń oıdaǵydaı ótýine kedergi keltiretin sııaqty. Rýslan Igilik.