Aýla klýby ashyldy

Mamyr aıynyń sońynda Aqtóbe qalasynyń 147 jyl­dyǵyna oraı Álııa Moldaǵulova dańǵylyndaǵy №56 «D» úıde «Chempıon» aýla klýby ashyldy. Aýla klýbynyń ashylý saltanatyna oblys ákimi Berdibek Saparbaev jáne osy úıdiń turǵyndary qa­tysty. Aýla klýbynyń saltanatty ashylýyna buǵan deıin ashylǵan «Batys-2» aýla klýbynyń «Tol­qyn» bı tobynyń jas bıshileri bıden shashý shashty, Aqtóbe baılanys jáne elektrotehnıka kolledjiniń áskerı daıyndyq pániniń muǵalimi Almat Jumashev jetekshilik ete­tin «Ulan» áskerı-patrıottyq klýbynyń jas jaýyngerleri ás­kerı jatty­ǵýlardan óner kórsetti. – Bizdiń negizgi maqsatymyz – óskeleń urpaqtyń damýyna, tálimdi tárbıe alýyna úles qosý. Jastar bolashaqta memleket qamqorlyǵyna eldiń damýy men gúldenýi úshin óz úlesin qosý arqyly jaýap qata­tynyna senemin. Memleket basshysy Nursultan Nazarbaev óskeleń urpaqtyń damýyna erekshe nazar aýdaryp kele­di. Sonyń nátıjesinde jas­tar­­­dyń bos ýaqytyn ótkizýge arnalǵan, áleýetin ashýǵa múm­kindik beretin aýla klýbtary men ózge de áleýmettik nysandar salynýda. Bul aýla klýby memleket pen kásipkerliktiń seriktestigi arqasynda salyndy. Biz kásipkerlerden kópqabatty turǵyn úılerdiń birinshi qabatyn sportqa, medısınaǵa, polısııa­ǵa berýge usynys jasaǵanbyz. Mine, búgingi aýla klýby sonyń nátıjesi, – dedi óńir basshysy. Osy úıdiń turǵyndary atynan sóz alǵan Baqtybek Jaıbergenov aqsaqal bul klýbtyń balalardyń jan-jaqty qabiletti bolyp ósýine yqpal etetinin aıta kelip, Elbasy tapsyrmasyn abyroıly oryndap otyrǵan, balalarǵa osyndaı ásem syı jasaǵan oblys ákimdigine jáne qurylys kompanııasyna rızashylyǵyn bildirdi. «Centergroup» kompanııalar toby aýla klýby ǵımaratyn paıdalanýǵa berip, memleket menshigine tapsyrdy. 400 sharshy metrden astam alańda jattyǵý zaly, boks, sambo, qazaqsha kúres seksııalary bar. Balalardy sambodan eki márte álem chempıony Baıram Aımaǵambetov, bokstan eki dúrkin Qazaqstan chempıony Mádı Sholaq, sambodan Azııa chempıony Berik Bákeshov jattyqtyratyn bolady. Aıta keteıik, osyndaı aýla klýbtary bıyl qalanyń eki turǵyn úı alabynda ashylady dep kútilýde. Naqtyraq aıtar bolsaq, «Nur Aqtóbe» shaǵyn aýdanynda klýb ashý úshin 34 mıllıon teńge qarastyrylyp otyr. Taǵy 65 mıllıon teńge №11 shaǵyn aýdandaǵy 2 qabatty ǵımaratty kúrdeli jón­deýden ótkizýge jumsalady, keıin ol ǵımaratta da aýla klýby ashylmaq. Satybaldy SÁÝIRBAI, «Egemen Qazaqstan» Aqtóbe oblysy