Eýropa tórinde – fýtbol báıgesi

Keshe túnde Fransııada Eýropa chempıonaty bastaldy Maýsymnyń 11-ine qaraǵan túni Fransııanyń Sen-Denı qalasyndaǵy «Stad de Frans» stadıonynda Fransııa jáne Rýmynııa quramalary arasyndaǵy oıynmen «Eýro-2016» týrnıri óziniń kún tártibindegi máselesine kirisip ketkenin aıdaı álemge jarııa etti. Match Astana ýaqytymen saǵat 00:50-de bastaldy. Dáliregi, osy mezgilde chempıonattyń ashylýyna arnalǵan saltanat sap túzedi de, arada on mınýt ótkennen keıin kezdesýge kezek keldi. Tarıhta tuńǵysh ret qurlyqtyń 24 úzdik komandasynyń basyn qosyp otyrǵan dop dodasy týra bir aı merzimge sozylyp, shildeniń 10-y kúni márege jetedi. «Eýronyń» burynǵy reglamentten aıtarlyqtaı mólsherde ulǵaıa túsýi Islandııa, Soltústik Irlandııa, Slovakııa, Ýels jáne Albanııa sekildi bes eldiń qura­malaryna chempıonatqa qatysý múmkindigin alyp berdi. Eýropa chempıonaty fınal­dyq kezeńine qatysýshylar qatarynyń artýy onyń ótý tártibine de birshama ózgerister engizdi. Endi toptan burynǵydaı tek alǵashqy eki oryndy je­ńip alǵan quramalar ǵana emes, sonymen qatar, úshinshi oryn­daǵy aralaryndaǵy úzdik kór­setkishterge jetkenderi de osy saptan tabylady. Sonyń arqasynda 1/8 fınalǵa alty toptyń tórteýinde úshinshi bolǵan terme jamaǵattar ilesip kete baratyn bolady. Sol sııaqty qurlyq birinshiliginde 1/8 fı­naldyq kezdesýler degen de birinshi ret qoldanylǵaly otyr. Budan buryn Eýropa chempıonatynda pleı-off oıyndary shırek fınaldan bastalatyn edi. Belgili fýtbol sarapshylary qazir básti kimge tigetinderin bilmeı otyr. Degenmen, Germanııa quramasynyń qazir óte joǵary daıyndyq sapynda ekenine nazar aýdaryp otyrǵandar da az emes. Shyn máninde nemister komandasynyń barlyq shebinde de álemdik deńgeıdegi juldyzdar shoǵyry oınaıdy. Onyń kóshi aldynda Manýel Noıer, Mats Hýmmels, Tomas Mıýller, Tonı Kros sekildi tarlandarmen qosa, qurlyqtyń úzdik klýbtarynda jetekshi rólder alyp otyrǵan jas tolqynnyń kóptegen ókilderi júr. Nemisterdi dodada jeńiske jetýge jetelep otyrǵan jeliktiń biri, sóz joq, Ispanııanyń 2010 jyly álem chempıonatyn utyp alǵannan keıin 2012 jyly kontınent saıysynda top jarǵany bolmaq. Brazılııada ótken sońǵy, 2014 jylǵy mýndıalda altyn júldeger bolǵan almandardyń endi ıspandar sııaqty úlken júldeden keıin kishigirim belesti de baǵyndyryp alǵysy keletini túsinikti jaıt. Buǵan olardyń múmkindikteri de jetkilikti. Topta Ýkraına, Polsha jáne Soltústik Irlandııa qura­mala­rymen kúsh synasatyn onyń kelesi kezeńderge eshbir qıyn­dyqsyz bara alatynyna kúmán keltirý qıyn. Jurt qatarynda Krıshtıaný Ronaldý sekildi dara juldyzy bar Portýgalııa quramasynyń da talaı jerdiń shańyn qaǵa alatynyna shúbá keltire almasa kerek. Dál osyndaı baǵany mamandar Zlatan Ibra­gımovıchtyń jasaǵy – Shvesııa quramasyna da berip otyr. Al Anglııa komandasy osy joly óziniń tarıhynda alǵash ret týrnırge eń jas komandasyn ákelipti. Orta jasy 25 bolatyn aǵylshyndar ujymy álemdik deńgeıdegi úsh-tórt juldyzy qataryna jas býynnyń ótkir ókilderin qosqan. Álbette, basty úmitkerler tiziminen alań ıesi – Fransııa quramasyn eshkim shyǵaryp tas­taı almaıdy. Buǵan deıin eki ret qurlyq birinshiliginde top jarǵan fransýzdar sonyń ekeýin de óz alańynda utqan. Sosyn buǵan deıingi eki Eýroda aldyna jan salmaǵan Ispanııa quramasy sonyń sanyn úsheýmen toltyrýdy armandaǵaly qashan! Mine, osy sebepterdiń bári fransýz jerindegi fýtbol alamanynyń tartysty da qyzyqty ótýine sebep bolýǵa tıis. Búgin chempıonatta úsh oıyn oınalady. Olar Albanııa – Shveısarııa, Ýels – Slovakııa jáne Anglııa – Reseı quramalary arasynda ótedi. Serik PIRNAZAR, «Egemen Qazaqstan»