«Densaýlyq» poıyzy saparǵa attandy

Keshe Almaty-2 stansasynan «Den­saý­lyq» arnaıy mamandandyrylǵan me­dı­sınalyq poıyzy saparǵa attandy. Poıyz 11 tamyzǵa deıin ońtústik óńir­lerdi qamtıdy. «Dońǵalaqty» emhana­nyń» qyzmetine shalǵaı stansalar men jol aıy­ryqtarynyń turǵyndary men temir­jol­shylary júginedi. Mamyrdyń ortasynan beri soltústik óńirlerdi medısınalyq qyzmet túrimen qamtýǵa «Salamatty Qazaqstan» keńes berý jáne dıagnostıkalyq qyzmet poıyzy alys eldi mekenderdiń turǵyndaryna kómek kórsetýde. Batys óńirdiń turǵyndaryna «Járdem» medısınalyq poıyzynyń dárigerler brıgadasy qyzmet kórsetýde. «Shoqqaraǵaı stansasynda turamyn. 26 jyl jol monteri bolyp eńbek ettim. Qazir qurmetti eńbek demalysyndamyn. Mamandardyń dárigerlik tekserýinen óttim. Osyndaı poıyzdy uıymdastyrǵan­darǵa alǵysym sheksiz», deıdi  Valentına Maksımovıch. Arnaıy medısınalyq poıyz sońǵy úlgidegi dıagnostıkalyq jáne emdeý qurylǵylarymen, mını-otashylyq, zerthanalyq, telekommý­nıkasııalyq qondyrǵylarmen jabdyqtalǵan. «Salamatty Qazaqstan» men  «Járdem» medısınalyq poıyzdary 40 stansada bolyp, shalǵaı óńirdegi 39 myń turǵynǵa qolushyn sozdy. Mamandar 13 myń medısınalyq jáne zerthanalyq saraptaýlar men 1638 shaǵyn otashylyq operasııalar jasady. 1784 adamnyń tisin emdedi, dep habarlady «Qazaqstan temir joly» UK» AQ baspasóz qyzmeti.