Bastamalarymyzdyń baıandy jalǵasy

Osy jyldyń 31 mamyrynda elordada «Din terrorızmge qarsy» degen taqyrypta konferensııa ótken edi. Onda talqylanǵan máseleler óziniń ózektiligimen erekshelendi. Osyǵan oraı, biz Parlament Senatynyń Halyqaralyq qatynastar, qorǵanys jáne qaýipsizdik komıtetiniń tóraǵasy Ikram ADYRBEKOVKE jolyǵyp, jıynda talqylanǵan máselelerge jańa qyrynan kelýdi ótingen edik. – Beıbitshilik jáne kelisim saraıyn­da uıymdastyryl­ǵan «Din terrorızm­ge qarsy» taqyrybyn­daǵy jıyn onda tal­qy­lanǵan ózekti ári ótkir máselelerimen búkil adamzat balasy úshin óte mańyzdy, – dep bastady sózin Parlament Senatynyń depýtaty Ikram Adyrbekov. – Forýmnyń negiz­gi maqsaty – Qazaqstan Pr­e­zıdentiniń ótken jylǵy qyr­kúıek aıynyń sońynda Birik­ken Ulttar Uıymy Bas As­sambleıasynyń 70-sessııasynda BUU aıasynda terrorızmge qarsy kúreste álemdik biryńǵaı jeli qurý jáne sol jelini qurý arqyly barlyq terrorıstik uıymdardyń tizimin jasaý, jáne de oǵan búkil halyqara­lyq qoǵamdastyqty jumyldyrý jónindegi usynystaryn talqy­laý bolatyn. Osyǵan baılanys­ty qatysýshylar óz oılaryn ashyq aıtty, usynys-pikirlerin ortaǵa saldy. Elbasynyń iri ári bedel­di halyqaralyq uıym – BUU min­berinen aıtylǵan sol usy­nystary álemdik qoǵam­dastyqta úlken qoldaý tapty, tanymal saıasatkerler men sarapshylar jedel ún qosty. Qazirgi kezde de Prezıdentimizdiń sol usynystaryna qoldaý bildirgen pikirler kóptep aıtylyp jatyr. Mysaly, jaqynda ǵana Elbasynyń osy bastamalaryn ári qaraı damytý maqsatynda BUU aıasynda Nıý-Iork qala­synda «Dinder beıbitshilik úshin» dep atalatyn únqatysý alańy bolyp ótti. Oǵan 100-den astam ulttyq delegasııalar qaty­syp, solardyń teń jartysyna jýyǵy ózderiniń oı-pikirlerin bildirdi. «Dinder terrorızmge qarsy» halyqaralyq deńgeıdegi sondaı is-sharanyń jalǵasy bolyp tabylady. – Jalpyǵa ortaq kúrdeli máseleler talqylanǵan bul forýmnyń ereksheligi qandaı? – Bul halyqaralyq kon­ferensııanyń eń basty erek­sheligi, jıynǵa kóptegen el­der­diń parlamentshileri qatys­qandyǵynda. Naqty aıtqanda, túrli dinder ókilderi men saıasatkerler bir ústeldiń basynda bas biriktirip, qaterli de úreıli kórinetin terrorızmge qarsy kúresý, búginde jıi baı­qalyp otyrǵan janjaldar men qaqtyǵystardyń oryn alý sebepterin aıqyndaý jáne olardy sheshý joldaryn qaras­tyrý. Jıyn barysynda osy prob­­­le­malarǵa qatysty usynystar men pikirler kóp aıtylýda. Bul konferensııanyń kún tárti­bindegi máseleler ótkir ári ózekti ekenin bildiredi. – Konferensııa barysynda terrorızmniń Islam dinine eshqandaı qatysy joqtyǵyna baılanysty pikir bildirýshiler qatary kóp bolǵanyn baıqap qaldyq... – Islam – ımandylyqtyń, yntymaqtastyqtyń, beıbitshi­liktiń dini. Sondyqtan da, jıynda qatysýshylar terrorızmniń Islamǵa eshqandaı da qatysy joq ekendigin naqty mysaldar keltirý arqyly dáleldep berdi. Keıbir saıasatkerler, keı­bir tulǵalar osy Islam dinin jeke óziniń nemese jekelegen top­tyń múddesi úshin, dálirek aıt­qanda, óziniń saıasaty úshin, materıaldyq maqsaty úshin paı­dalanyp otyrǵany ras. Osy máselelerdi de qatysýshylar ortaǵa saldy, basa nazar aýdarý qajet ekenin atap ótti. – Jastardyń dinı saýat­tylyǵyn jetildirý máseleleri de áńgime boldy ǵoı. – Jastarǵa bilim berip, olar­dyń saýattylyǵyn damytý jaıy da aıtyldy. Ásirese, jastardyń dinı saýattylyǵyn óristetý, olardyń teris pıǵyl­dy aǵymdar jolyna túsip ketpeýin baqylaý, taǵy basqa da máseleler jóninde oryndy pikir-usynystar ortaǵa salyndy. Jas jetkinshekterdiń oqyp-bilim alýyna, olardyń paıdaly ispen aınalysýyna jaqsy jaǵdaılar jasalatyn bolsa, jastar eshqashan teris jolǵa túspeıdi. Áńgimelesken Álısultan QULANBAI, «Egemen Qazaqstan»