Rıdderde dárigerler men muǵalimderge baspana beriledi

Qazirgi tańda Rıdder qalasy úshin eń negizgi qajetti mamandyqtardyń biri dáriger men muǵalim bolyp tur. Osy sanattaǵy qajettilikti qamtamasyz etý úshin qalaǵa 49 muǵalim men 12 dáriger kerek. Bul týraly óńirlik kommýnıkasııa qyzmetinde ótken baspasóz máslıhatynda Rıdder qalasynyń ákimi Jomart Muratov málimdedi. Rıdderdiń densaýlyq saqtaý mekemelerinde 795 medısına qyzmetkeri eńbek etedi. Qabyldanǵan sharalarǵa qaramastan, qalada dáriger mamandaryna degen tapshylyq seziledi. Rıdder qalasy ákiminiń aıtýynsha, qala basshylyǵy túrli baǵyttaǵy 12 dárigerdi jumyspen qamtýmen birge olardyń turǵyn úı máselesin de sheship berýge daıyn. Ásirese, orta medısınalyq qyzmetkerler jetispeıdi. Búginde Rıdder boıynsha pedagogıka mamandarynyń jalpy sany 484 adamdy quraıdy. Olardyń ishinde 84 muǵalim – zeınetkerlik jasta. Bıyl zańdy demalysqa 40 adam shyqty. Jalpy bilim berý mektepterindegi pedagogtarǵa degen suranys 30 adamǵa jetse, mektepke deıingi mekemelerge 19 maman kerek. «Biz muǵalimderdiń tapshylyǵyn anyq sezip júrmiz. Olardyń arasynda bastaýysh synyp muǵalimderi men pán muǵalimderi, mýzyka pániniń muǵalimine deıin jetispeıdi. Sonymen qatar, bizge dárigerler de kerek. Biz shaharymyzda ómir súrýge qolaıly jaǵdaı jasaı otyryp, osy tapshylyqty eńserýdemiz. Sondyqtan, qalamyzǵa kelgen ár muǵalim men dárigerdi qoldaýǵa ázirmiz», – dedi Jomart Muratov. Dýman Anash. Derek, foto: Shyǵys Qazaqstan óńirlik kommýnıkasııalyq qyzmeti.