Otandyq taýarǵa oryn keń

Astana kúnine oraı elordada otandyq taýar óndirý­shilerdiń alǵashqy saýda úıi ashylady. Bul týraly keshe Ortalyq kommýnıkasııalar qyzmetinde otandyq taýar óndirýshilerdi qoldaý taqyrybynda ótken baspasóz máslıhatynda aıtyldy. Oǵan Qazaqstan saýda kásiporyndary qaýymdastyǵynyń vıse-prezıdentteri Qaıyrly Taýken jáne Jibek Ájibaeva qatysty.  Astana kúninde iske qosylatyn saýda úıinde  barlyq taýarlar men qyzmetter «Qazaqstanda ja­salǵan» jáne «Halyq markasy» halyqtyq sapa belgileri­men usynylady. «Joba maqsaty – elorda naryǵynda otandyq ta­ýarlardyń úlesin kóbeıtý, qa­zaqstandyq ónimderdi nasıhattaý, Qazaqstan brendteriniń ta­ny­­maldylyǵyn arttyrý», dedi Q.Taýken. Qazaqstan saýda kásiporyndary qaýymdastyǵynyń málimetinshe, saýda úıi aýmaǵynda elimizdiń 14 oblysy, Almaty men Astana qalalarynyń 300-ge jýyq fırma men kompanııalary óz ónimderin qoıady. Alǵashqy kompanııalar kelip, saýda alańdaryn qura bas­tady. Jobaǵa qatysýǵa nıet ta­nytqan otandyq óndirýshiler, jar­namalyq maqsatta «Halyq markasy» belgisin eki jylǵa deıin tegin paıdalana alady. Basty artyqshylyq – barlyq taýarǵa bekitiletin ústeme ba­ǵa 3-7 paıyzdan aspaıdy. Sebebi, baǵa­nyń ósimine áser ete­tin del­daldyq júıe bolmaıdy. Bul daǵdarys ke­zeńinde el turǵyndaryna, ásirese, áleýmettik az qamtylǵan top ókil­derine eleýli qoldaý bolmaq. Qazaqstandyq óndirýshiler otandyq jáne sheteldik dıstrıbıýterlermen tikeleı jumys isteýge múmkindik alady. Iаǵnı, el eksportyn arttyrýǵa jaǵdaı jasalady. Saýda úıi bólshek jáne kóterme saýda-sattyq ortalyǵy ǵana emes, sheteldik meımandarǵa qazaqstandyq naryqtyń jetistigin pash etetin alańǵa aınalmaq. Saýda úıinde otandyq kompanııalar ózderiniń jeke satý bólimderin ashý múmkindigine ıe bolady. Sonyń negizinde taýarlaryn jetkizýge qatysty kelissóz­der júrgizip, naqty kelisimderge qol qoıatyn bolady dep kútilýde. Ár kompanııa óz stendin ázirlep, ónimderin qoıýǵa qajet aýmaqqa qol jetkize alady. Sondaı-aq, taýar óndirýshiler promo-aksııalar, jańa ónimderiniń tusaýkeser rásimin, túrli jarnamalyq sharalardy ótkize alady. Saýda úıiniń aýmaǵy bas­tap­qy kezeńde 5 000 sharshy metr­di quraıy. Onda keń de yń­ǵaıly saýda pavılondary, stok-ortalyqtar, bıznes-orta­lyqtar, shoý-rýmdar, zerthanalar, tońazytqysh kameralary, qoı­­malar, taýarlardy túsirýge yń­ǵaıly alańdar, júk lıftileri, ekskalatorlar, telefon men ınternet sekildi barlyq kommýnıkasııalar bolady eken. Saýda úıi Astana irgesinde, Saryarqa aýdany, S 359 kóshesi, №3 ǵımarat mekenjaıy boıynsha ornalasqan. Dınara BITIKOVA, «Egemen Qazaqstan»