Ulttyq baspasózdiń úzdikteri

Keshe Aqordada Qazaqstan Respýblıkasynyń Memlekettik hatshysy Gúlshara Ábdiqalyqova eldiń úzdik jýrnalısterine Qazaqstan Respýblıkasy Prezıdentiniń buqaralyq aqparat quraldary salasyndaǵy syılyqtary men granttaryn tapsyrdy jáne alǵystaryn jarııalady. Aldymen Memlekettik hatshy rásim barysynda syılyq laýreattary men grant ıegerlerin, Mem­leket basshysynyń alǵy­syn alǵan shyǵarmashylyq ujym­dardy, sondaı-aq, eldiń barsha jýrnalıs­ter qaýymyn kásibı mere­­kemen – Baılanys jáne aqpa­rat qyz­metkerleri kúnimen quttyq­tady. – Bıyl – el ómirindegi erek­she beles. Biz qasterli Táýelsiz­digi­mizdiń 25 jyldyq mereıtoıyn atap ótemiz. Elbasy Nursultan Nazarbaev egemendiktiń eń al­ǵash­qy kezeńinen bastap otandyq buqa­ralyq aqparat quraldarynyń qalyptasýy men damýyna udaıy qoldaý kórsetip keledi. Memleket deńgeıindegi júıeli sharalardyń nátıjesinde táýelsiz elimizdiń múddesi men baıandy bolashaǵyna qyz­met etetin ulttyq baspasózimiz qalyp­tasty. Shırek ǵasyr ishinde Qa­zaqstan jýrnalıstıkasy qoǵam­daǵy tatýlyq pen birliktiń uıyt­qysy, bıik parasat pen adamger­shilik qundylyqtardy halyqqa jetkizýshi qýatty quralǵa aınaldy, – dedi Memlekettik hatshy. Sondaı-aq, G.Ábdiqalyqova buqaralyq aqparat quraldary mem­leketimizdiń irgesi berik, keleshegi kemel bolýyna, eń bas­tysy, el damýynyń mańyz­dy qujattarynyń biri «Qazaq­stan-2050» Strategııasynyń laıyq­ty iske asyrylýyna atsalysyp kele jatqandyǵyna nazar aýdardy. Otandyq jýrnalıstıka salasy zamanǵa saı aqparattyq tehnologııany, ınternet álemin ıgerý arqyly jańa beleske kóterilgendigin aıryqsha atap ótti. Osy baǵytta jemisti eńbek etip júrgen jýrnalısterge memleket qoldaý kórsetip, olardy yntalandyrýǵa múddelilik tanytyp otyrǵanyn bildirdi. – Otandyq aqparat keńis­tigin óristetý jónindegi mańyzdy shara­nyń biri óz kásibı deńgeıin udaıy arttyryp kele jatqan jýrnalıs­ter men shyǵarmashylyq ujym­dardy yntalandyrý bolyp tabylady. Sheberligin, talantyn búkil qoǵamnyń ıgiligi jolynda barynsha jarqyratyp kórsetken baspasóz ókilderin Memleket bas­shy­synyń arnaýly marapattary­men atap ótemiz, – dedi G.Ábdi­qaly­qova. Sonymen, elimizdegi jýrnalıs­tıka salasynda eń joǵa­ry ma­rapatqa ıe bolǵan jýrnalısterdi marapattaý rásimine de kezek kelip jetti. Memleket basshysynyń ókimimen Prezıdent syılyǵy «Túrkistan» gazetiniń bas redaktory Shámshıdın Áshenqojauly Patteevke, «Kazahstanskaıa pravda» respýblıkalyq gazeti saıasat bóliminiń redaktory Vladımır Gennadevıch Kýrıatovqa berildi. Irgetasyn Qaltaı Muha­med­janov qalaǵan «Túrkistan» gazeti el táýelsizdigin tuǵyrly etý jolynda jemisti eńbek etip keledi. «Basylym bas redaktoryna tartady» (Kamal Smaıylov) demekshi, Sh.Patteevtiń redaktorlyq qol­tańbasy aptalyqtyń ǵana emes, qazaq jýrnalıstıkasynyń damýyna ózindik úles qosqan­dyǵynan kóziqaraqty oqyrman habardar. Al, Vladımır Kýrıatov bolsa, «Kazahstanskaıa pravda» gazetinde Elbasynyń sheteldik saparlarynan jazǵan jazbalarymen oqyrmanǵa keńinen tanys. El táýelsizdiginiń mereıtoıy jylyndaǵy buqaralyq aqparat quraldary salasyndaǵy granttar «Habar» agenttigi aksıonerlik qoǵamynyń tilshisi Muhtar Seıit­qasymuly Ibraımovqa, «Svo­boda slova» qoǵamdyq-saıası apta­lyǵynyń tilshisi Vera Andreevna Lıahovskaıaǵa tapsyryldy. Jas jýrnalısterdiń ushqyr talaby men izdenisi olardyń eńbegin joǵary deńgeıde baǵalaýǵa laıyq dep tanyldy. Qazaqstan Prezıdentiniń al­ǵystary «Doıche Algemaıne Saı­týng» gazeti, «Syr medıa» jaýapkershiligi shekteýli serik­testigi, «Qazaq radıosy» radıo­stan­sasy jáne «RIKA-TV» tele­ko­m­­panııasy shyǵarmashylyq ujymdaryna jarııalandy. Otan­dyq jýrnalıstıkanyń upaıy ujymnyń áleýeti arqasynda túgendeletini sózsiz. Endeshe, El­basynyń alǵysyna ıe bolǵan shyǵarmashylyq ujymdardyń eńbegi sonyń dáleli. Aıtpaqshy, bıyl aqshalaı júldeniń jalpy qory 8 mln. 485 myń teńgeni qurady. Prezıdent syılyǵynyń laýreattaryna 3 mln. teńgeden jáne altyn tós­belgi, al grant ıelerine 1 mln. 242 myń teńgeden taǵaıyndaldy. Shámshıdın Patteev, «Túr­kis­tan» gazetiniń bas redak­tory, Qazaqstan Prezıdenti syıly­ǵy­nyń ıegeri: – Táýelsizdigimizdiń 25 jyl­dyǵynda, osyndaı úlken mańyzdy jyly maǵan senim bildirilip, Prezıdenttiń syılyǵy berilip otyr­ǵanyna shyn máninde qýa­nysh­tymyn. Bul bizdiń gazetke degen úlken senim dep oılaımyn. Bola­shaqta da osy aqparat salasynda eseli eńbek etip, senimdi aqtaýǵa tyrysamyn. Muhtar Ibraımov, «Habar» ar­nasynyń tilshisi, Qazaqstan Prezıdenti grantynyń ıegeri: – Táýelsizdiktiń 25 jyl­dy­ǵy­nyń qarsańynda, qasıetti Rama­zan aıynda osyndaı úlken mara­patqa ıe bolý, Elbasy grantyn alý – men úshin zor mártebe, úlken qýanysh. Bul eńbektiń elen­geni, jumystyń baǵalanǵany dep bi­lemin. Jalǵyz meniń emes, úlken shy­ǵar­mashylyq ujym – «Habar» agent­tiginiń jemisi, jeńisi. Ǵabıt ISKENDERULY, «Egemen Qazaqstan»