Kókjal Baraq – Kúrshim tórinde

Asqaq Altaıdyń kún­geı baýyryn Mar­qakól, Zaısan, Buqtyrma tolqyndary shaıyp jatqan Kúrshim óńirinde kóńil tórinen oryn alǵan kórikti dýman ótti. Osy jerge esimi tańylǵan qalmaqtyń Kúrsin batyryn jekpe-jekte jeńip, el men jerdi saqtaýda talaı joryqtarda qan keshken batyr baba Kókjal Baraqtyń 315 jyldyq toıy boldy. Ulan-asyr merekege kúrshimdikter jan-jaqty ázirlengen eken. Buqtyrmadan parommen ótken meımandardy qushaq jaıa qarsy alǵan batyr urpaqtary áıgili Kókjarly Kókjal Baraq batyrdy ulyqtaýǵa arnalǵan is-sharalar legin bastap ketti. Aldymen aýdandyq mádenıet úıinde «Nur Otan» partııasynyń «Uly Dala eli» partııalyq jobasy aıasynda ǵylymı-tájirıbelik konferensııa uıymdastyryldy. Jıynda «Nur Otan» partııasy oblystyq fılıaly tóraǵasynyń birinshi orynbasary Ánýarbek Muhtarhanov quttyqtaý sóz sóılep, batyrdyń urpaǵy, Terektibulaq orta mektebiniń muǵalimi Tanash Qaıyrbaev, «Ba­raq Batyr» qorynyń quryltaıshysy Tólegen Kinásilov, belgili tarıhshy Sovethan Qalıǵojın jáne basqa da qonaqtar batyrdyń el táýelsizdigi jolyndaǵy arpalysqa toly ómiri týraly tu­shymdy baıandamalar jasady. Kúrshimdikter aıtysty saǵynyp qalǵan eken. Respýblıkanyń ár túkpirinen, Baıan-О́l­geı aımaǵynan kelgen aıtyskerler ónerin halyq tórt saǵat boıy tabandap tyńdady. Arqa-jarqa aǵaıyn sátti sóz oramdaryna súısine dýyldasyp, aqyndarǵa zor qoshemet kórsetti. Aıtystyń bas júldesin qyzylordalyq Meıirbek Sultanhan jeńip alyp, jarty mıllıon teńge syıaqyǵa ıe boldy. Kelesi kúni aýdan or­­talyǵyna kirebe­ris­tegi bıik qyr basynda Kókjal Baraqtyń qo­ladan quıylǵan eskert­kishi saltanatty túrde ashyldy. Jan-jaǵy abattandyrylǵan sáýletti eskertkish alystan aıbyndana kóz tartady. Batyr rýhyna arnalyp as berilgennen keıin Saryóleń aýylynyń tusyndaǵy báıge tóbede ulttyq oıyndar saıysy toı kórigin qyzdyra tústi. Boz kilemdegi básekede úshinshi orynǵa ıe bolǵan Mereke Turashov ózine berilgen syıaqyny arbaǵa tańylsa da, kúresti jan-tánimen tamashalaǵan múmkindigi shekteýli ba­laǵa usynǵanynda jı­ylǵan jurt «bárekeldi» desti. Bul beldesýde 2014 jylǵy «Qazaqstan barysy» Muhıt Tursynov bas júldeni jeńip aldy. Al 32 qylquıryq qatysqan 15 shaqyrymdyq báıgede tarbaǵataılyq Qaırat Qunsafınniń aty, 25 shaqyrymdyq jergilikti jaby jylqylar ara­syndaǵy alaman báı­gede Kúrshim aýdany Qaınar aýylynyń tur­ǵyny Dáýlethan Bıe­kenovtiń tulpary, osy qashyqtyqtaǵy taza qandy sáıgúlikter saıysynda qaroılyq (Kúrshim) Jomart Saıbolatovtyń báıgesi qara úzip keldi. Aýyzdyǵymen alysqan arǵymaqtardyń ıeleri bir-bir temir tulpardan enshiledi. Sondaı-aq, báıge tóbe basynda jor­­ǵa jarys, qyz qýý, teń­ge ilý, kókpar syndy ulttyq oıyndardan da qan qyzdyrǵan jarystar ótip, batyr baba erligine taǵzym etken el-jurt erekshe kóńil kúımen tar­qasty. Dýman ANASh, «Egemen Qazaqstan» Shyǵys Qazaqstan oblysy, Kúrshim aýdany