Qarasora deseń jurttyń esine saý adamnyń ózin esirik halge túsiretin esirtki túseri kádik. Onyń keıbir túriniń quramynda esirtki bolmaıtyndyǵyn ekiniń biri jáne bile bermeıdi.
«Ońtústik» arnaıy ekonomıkalyq aımaǵy mańynda jaıqalyp ósip turǵan 20 gektar qarasoradan kádimgi qaǵaz daıyndalady.
«Kagaz Shahary SEZ» seriktestigi naryqtaǵy ornyn tabý úshin qaǵaz óndirisine kerek shıkizatty aldy Qytaı, sońy Reseı, sonaý Fınlıandııadan da tasyp kóripti. Ofıstik tehnıkalarǵa kerek qaǵazdar osyndaı qıyndyqtarmen daıyndalyp kelgen. Alaıda, shetelden arbalap tasyp shyǵynǵa túskennen óz elińnen dorbalap tasýdyń qandaı múmkindikteri bar, sony zerttep kórgen.
Ońtústiktiń isker jigitteri kádimgi maqtanyń qozapaıasynan, Syrdyń jaǵasyn teńizdeı terbetip turatyn nar qamystan óndiriske qajetti qurylys materıaldaryn jasap jatyr. Olardan qaǵaz ónimin jasaýdyń mashaqatynan bólek ózindik qıyndyqtary kóp. Bárin ekshep oılasa kele tehnıkalyq qarasoraǵa toqtaǵan.
– Biz qaǵaz óndirisine qozapaıa, qamystan bólek bıdaı sabanyn da paıdalanyp kórdik, – deıdi «Kagaz Shahary SEZ» seriktestigi dırektorynyń orynbasary Baýyrjan Manatov. – Olar biz kútkendegideı nátıje bermegennen keıin qarasorany kórdik. Onyń quramynda 72 paıyz jabysqysh, ıilgish sellıýloza bar. Al, ol maqtada 48 paıyz, aǵashta 24 paıyz ǵana. Tehnıkalyq qarasoranyń tuqymyn Ýkraınadan ákeldik. Eger ol jersinip ketse, egis kólemi ulǵaıtylady.
Qarasoranyń óndiris oryndary shoǵyrlanǵan «Ońtústik» AEA janynda ósirilýine kelsek, munda maqta klasteri men toqyma óndirisi jumys jasaıdy. Al, quramynda esirtkisi joq qarasorańyzdan óndiriske qajetti 25 myń túrli zat alýǵa bolady. Iаǵnı, qaı jaǵynan da utylmaısyz. Dári-dármek shyǵarýǵa da paıdalanasyz, mal bordaqylaýǵa da jaramdy. Toqyma óndirisinen bólek taǵam jasaýǵa da qajetti qospalar alynady.
Shıkizatty shetelden ákelý qaı kásiporynǵa bolsa da óte tıimsiz. Qaıta-qaıta jalaýlatyp ashylǵan «Azııa-Keramıks» zaýyty da qajetti shıkizat shetelden tasymaldanǵandyqtan turalap tynǵan-dy. Qaǵaz óndirisiniń elimiz úshin óte qajettigi daý týdyrmaıdy. Isker jigitter osynyń bárin jeti ólshep, bir kesip otyr. Búginde belýardan asqan qarasora óse kele bıiktigi tórt metrge deıin jetedi eken. Shaýyp al da óndiriske sal. Qaı salaǵa da jaraı beretindigin aıttyq.
Ebin tapqanǵa amal kóp qoı. Bir jigit balyq ósiretin toǵan salmaq bolyp, tájirıbe almaqqa Qytaıǵa barypty. Kelgen soń: «Qalaı eken?» dep suraǵandarǵa: «Qytaıda balyq júzbeıdi eken», depti. «Qalaısha?» dep tańdanady ǵoı bári. «Toǵanǵa syımaǵannan keıin júze almaıdy da. Bári sýdan basyn shyǵaryp demalyp turady eken». Sál ázil qosylsa da, astarynda shyndyǵy bar. Adamy qumyrsqadan da kóp Qytaıdyń óndiristik qýaty da joıqyn. Mundaıda, el aqshasy ózge memlekettiń dáýletine qyzmet etpes úshin óndiriske kerektiń deni ózińnen shyqqany jaqsy.
Qazaqtyń aldaǵyny kóretin isker jigitteri táýekeldiń qaıyǵyna osylaı mingen. Endi olar egistik kólemin molaıtý esebinen shıkizatty kóbeıtip zaýyt salmaq nıette.
Baqtııar TAIJAN,
«Egemen Qazaqstan»
Ońtústik Qazaqstan oblysy
