Aýyr atlet Vladımır Sedov ta dopıng daýyna ilikti

Qazaqstandyq aýyr atlet Vladımır Sedov ta dopıng kúdigine ilinip jatyr. Prosport málimetinshe, Qazaqstan ulttyq olımpııalyq komıtetine Vladımır Sedovtyń dopıng-tekserisinen tyıym salynǵan preparat tabylǵany jónindegi hat kelgen. Onda sportshynyń 2008 jyly Beıjiń Olımpııalyq oıyndarynda óner kórsetken kezinde alynǵan synamadan tyıym salynǵan zattardyń tabylǵany aıtylǵan. Eske sala keteıik, Vladımır Sedov sonda 85 kıloǵa deıingi salmaqta tórtinshi orynǵa qol jetkizgen edi. «Tekserýdiń qorytyndylary Vladımır Sedovtyń «A» synamasynan stanozolol tabyldy. Kelesi aptada «B» synamasy ashylatyn bolady», - delingen habarlamada. Aıta ketý kerek, Halyqaralyq aýyr atletıka federasııasy 2006 jyly Sedovty osyndaı tártip buzýshylyǵy saldarynan sport jarystarynan shettetip edi. Sol joly ol 2008 jyldyń 18 mamyryna deıin jazasyn ótegen bolatyn. Buǵan qosatynymyz, basylymnyń málimetinshe, aýyr atlet Marııa Graboveskaıanyń qanynan da tyıym salynǵan zattar tabylǵan. Ol da 2008 jylǵy Olımpıada kezinde alynǵan synamadan shyqty. Sol Oıyndarda Marııa qola medal alǵan bolatyn. Bul kezge deıin qazaqstandyq olımpııalyq chempıondar Ilıa Ilın, Zúlfııa Chınshanlo, Maııa Maneza jáne Svetlana Podobedova jarystardan shettetilgen edi. Osynyń negizinde Qazaqstan Olımpıadaǵa berilgen 10 joldamanyń 2-in qaıtarýǵa májbúr boldy. Al Vladımır Sedov jaqynda Taldyqorǵanda ótken respýblıka chempıonatynda arandatýshylyq turǵyda úlken shý shyǵaryp, jurt nazaryna ilikti. 94 kıloǵa deıingi salmaqta synǵa túsýge tıisti ol tuǵyrǵa shyǵyp turyp, ziltemirdi kótermeı ketip qaldy. Jáı ketken joq, «Mine, saǵan naǵyz olımpııalyq chempıon» dep, syrtynda reseılik atlet Aleksandr Ivanovtyń sýreti bar jeıdeni zalǵa qaraı laqtyryp ketti. Al Ivanov Londonda Ilınnen qalyp qoıyp, ekinshi oryn alǵan bolatyn. Murat AITQOJA