Qazaqstan Parlamenti Májilisiniń depýtattary jumystaryn aýyldyq jerlerde jalǵastyrýda. Selınograd aýdanynyń Rodına jáne Vozdvıjenka aýyldyq okrýgterinde Gúljan Qaraǵusova men Tatıana Iаkovleva el turǵyndarymen iskerlik kezdesý ótkizdi.
Qazaqstannyń Eńbek Eri Ivan Saýer basqaratyn «Rodına» agrofırmasynyń qol jetkizgen tabystary ózgelerge úlgi bolarlyqtaı. Munda 4 myń basqa jýyq iri qara mal talapqa saı kútip-baǵylýda. Munyń 1400 basy – saýyn sıyrlar. Árbir sıyrdan jyl saıyn 7 myń lıtr sút saýylatyndyǵy atap ótildi. Irgede turǵan Astana qalasynyń azyq-túlik beldeýine bul sharýashylyqtyń qosyp otyrǵan úlesi salmaqty. Táýligine 46 tonna taza ónim shyǵaratyn kásiporynnyń maı-qaımaǵyna, irimshigi men sútine qalalyqtardyń suranysy óte joǵary.
Halyq qalaýlylary osy okrýgtegi balalar baqshasyna, jańa saýyn jabdyqtary ornatylǵan sút zaýytyna, demalys jáne mádenıet baǵyna, haıýanattar parkine arnaıy atbasyn tirep, áleýmettik salanyń ekpindi damýyna rızashylyqtaryn bildirdi.
Vozdvıjenka okrýginde astanalyq qonaqtardy «Aqtyq» aksıonerlik qoǵamynyń bas dırektory Marat Qamzebaev pen Vozdvıjenka aýyldyq okrýginiń ákimi Seıfolla Ysqaqov qarsy aldy. Depýtattar balalar baqshasy men Mádenıet úıinde bolyp, osy eldi mekenniń óner ujymdarymen pikirlesti.
Osy oraıda, «Aqtyq» aksıonerlik qoǵamy bıznestiń áleýmettik jaýapkershiligi mindettemelerin abyroımen oryndap júrgen ujym ekendigin ataı ketken jón. Máselen, túzilgen shart boıynsha atalmysh aýyldyń Mádenıet úıine kúrdeli jóndeý jumystary júrgizilipti. Sáýletti ordanyń búgingi kelbeti erekshe deýge keledi. Atalmysh sharýashylyq oǵan óz esebinen 17 mıllıon teńge qarjy bólgen.
Májilis depýtattary aýyl turǵyndarynyń túrli máseleler boıynsha qoıǵan suraqtaryna tolymdy jaýap berýmen qatar, kezegi kútip turǵan kúrdeli máseleler jóninde pikir almasty.
Baqbergen AMALBEK, «Egemen Qazaqstan» Aqmola oblysy, Selınograd aýdany
