Tóle bı ál-Farabımen qaýyshty

Almaty turǵyndary qýanyshyn jasyra almaı qaldy. Biraq... Almatynyń búgingi nómir birinshi problemasy, eń kókeıkesti máselesi – kólik keptelegi!.. Alyp shahardyń bir qıyrynan ekinshi  qıyryna jetý qııamet-qaıymǵa aınalǵaly qashan?! Ásirese, tańerteńgilik jáne keshkilik qyzmetke, oqýǵa, balabaqshaǵa barar nemese qaıtar kezdegi jol azabyn tartyp júrgender muny jaqsy biledi. Qalanyń qaı buryshyna barsańyz da jol boıyndaǵy kúndelikti kórinis osyndaı. Jaısyz qubylysqa halyqtyń eti úırene bastady. Munyń bárin bes saýsaqtaı bilip otyrǵan qala basshylary  shahardyń negizgi bas josparyna sáıkes jol qatynasyna qatysty túıindi máseleni sheshýge barynsha kúsh salyp ta keledi. Biraq, kólik sanynda shektelý baıqalar emes... Qurylysy 2011 jyly bastalyp qazir paıdalaný ústindegi Almatynyń kúnshyǵys aınalama avtomobıl jolynyń (7,8 shaqyrym) bir tarmaǵy halyqaralyq áýejaıǵa baryp tuıyqtalatyn jyldam kólik magıstrali qaladaǵy jol qatynasynyń júrisin birshama jeńildetkeni ras. Qala ishindegi kúre joldyń biri – Tólebıdiń sol aınalma jolǵa (Ál-Farabı dańǵylyna) qosylýyna 110-aq metr  jer qalǵan edi! Taıaýda eki kóshe qosylyp, jańa baǵyttaǵy kóliktik jol aıryǵy  ashyldy. Qala turǵyndary qýanyshyn jasyra almady. Sarapshylar da osy jol qıylysy arqyly bir táýlikte 60 myń avtokólik júrip ótedi, aýmaqtaǵy jol keptelegi belgili bir mólsherge azaıady degendi aıtyp úlgerdi... Turǵyndardy jańa kóshe aıryǵynyń ashylýmen quttyqtaǵan qala ákimi Baýyrjan Baıbek «Elbasynyń sarabdal saıasatynyń arqasynda elimizdiń bolashaǵy úshin qanshama ınfraqurylymdyq jobalar júzege asyp, joldar salynyp, jańadan jumys oryndary ashylyp keledi. Almatynyń kólik-logıstıkalyq múmkindigin keńeıtý maqsatyndaǵy búgingi shara sondaı úlken istiń bir ǵana kishkentaı kórinisi», dedi. Atalǵan jol aıryǵynyń ashylýy rasynda da qalanyń burynǵy «Saıahat» avtobeketi aýmaǵynan bastalatyn – Raıymbek, Súıinbaı, Fýrmanov, Pýshkın, Jangeldın kóshelerindegi keptelekti aıtarlyqtaı azaıtady eken. Bul da bolsa jol-kólik qozǵalysynyń búgingi ólsheminde úlken jeńis! Qalanyń soltústik baǵyttaǵy kólik leginiń kepte­leksiz júrýin qamtamasyz etetin Rysqulov pen Saın kóshelerindegi jol aıryǵy taıaý arada bitýge ázir. Bókeıhanov kóshesindegi sheńberli kópir aldaǵy 2017 jyly paıdalanýǵa beriledi. Alaıda, qala úshin bul jol aıryqtarynyń qanshalyqty jeńiske balanatyny jáne beımálim. О́ıtkeni, Almatynyń ókpesin kún saıyn «tútindetip» qysyp júrgen 700 myńnan asa avtokóliktiń sany oǵan deıin taǵy qosylmasa, azaıatyn túri jáne baıqalmaıdy... Talǵat SÚIINBAI, «Egemen Qazaqstan» ALMATY