Qazaqstan Premer-mınıstri Kárim Másimov 14 shilde kúni Mońǵolııaǵa barǵan memlekettik sapary kezinde aldymen Baıan-О́lgeı qalasyna aıaldady. Úkimet basshysy onda jergilikti qazaqtarmen kezdesýdegi sózin qazaqsha aıtyp shyǵyp, jınalǵandardy rıza etti.
kerey.kz aqparyna qaraǵanda, Kárim Másimov osynda tasqyn sýdan zardap shegip otyrǵan aǵaıynǵa Qazaqstan memleketi tarapynan qoldaý kórsetiletini týraly málimdegen.
Eske sala keteıik, budan birer kún buryn Qobda ózeni jaǵasyndaǵy Baıan-О́lgeı qalasyn topan sý basyp qalyp, jergilikti turǵyndardy orasan zor shyǵynǵa ushyratty. Sý tasqyny saldarynan 700-ge jýyq adam zardap shegip, eki adam qaza tapty.
«Búgin Mońǵolııaǵa arnaıy barǵan Másimov qandastarymyzǵa kómektesetinin qazaq tilinde jetkizgen. Kópshilik aldynda qazaqsha sóılemeıtin Másimovtiń bul áreketi jeli qoldanýshylaryn tań qaldyrdy», - delingen habarlamada.
Kezdesý sońynda Kárim Másimovke appaq arǵymaq syıǵa tartylyp, shapan jabyldy. Bul týraly Islam.kz tilshisi Marfýǵa Shapııan Facebook-tegi óz akkaýntynda jazdy. Onyń jazýyna qaraǵanda, Qazaqstan delegasııasynyń Baıan-О́lgeı qazaqtarymen kezdesýi qala meımanhanalarynyń birinde ótken.
«Biz Úkimet basshysy Kárim Másimovtiń sheshen tilmen qazaqsha sóılep turǵanyn televızordan kórgende, qatty tań qaldyq. Onymen birge munda Mádenıet jáne Densaýlyq saqtaý mınıstrleri de keldi», - dep jazdy ol. Tilshi sondaı-aq jergilikti halyqtyń Qazaqstan Premerimen kezdesýdi asyǵa kútkenin atap ótti. Jýrnalıstiń jazýyna qaraǵanda, Qazaqstan Úkimetiniń basshysy bul aımaqqa sońǵy 25 jylda birinshi ret kelip tur.
https://youtu.be/ixWd5fKy1d0
«Baıan-О́lgeıdiń jergilikti atqarý organdarymen birge osy aımaqtardan Qazaqstanǵa kóship barǵan oralmandar úshin salynatyn balalar baqshalarynyń qurylysy, zeınataqylaryn retteý, bul jaqpen aradaǵy áýe qatynasyn qalpyna keltirý máseleleri talqylandy. Qazaqstan tarapy Mońǵolııada selden zardap shekkenderge kómek kórsetiletinin, sondaı-aq jastardyń bilim alýlary úshin granttar bólinetinin málimdedi.
Eske sala keteıik, Qazaqstan Premer-Mınıstri Kárim Másimov Mońǵolııaǵa Eýropa men Azııanyń XI sammıtine qatysý úshin keldi.
Murat AITQOJA
