Astanadan aýylǵa aýysqan

jas memlekettik qyzmetshi kadrlyq rezervke endi «Memlekettik qyzmetke ornalasý tek keshendi irikteý men jumysty tek tómengi laýazymdardan bastaýdyń nátıjeleri boıynsha múmkin bolady» dedi Elbasy jyl basyndaǵy «Ult Jospary – qazaqstandyq armanǵa bastaıtyn jol» atty baǵdarlamalyq maqalasynda. 100 naqty qadamdy júzege asyrý tetikteriniń biri sanalatyn «Memlekettik qyzmet týraly» jańa zań aıasynda kúshine engen talap memleketti kásibılendirý alǵysharttarynyń biri bolmaq. Provınsııada týyp, Parıjde turýdy poezııa ókilderi ǵana emes, ózge kásip ıeleri de qalaıdy. Ásirese, albyrt jastardyń deni astanadan baqyt izdeıtini jasyryn emes. Al bizdiń keıipkerimiz – Erbolat Muhamedjanov, keri­sinshe, Astanadan aýylǵa aýysyp kelgen, Prezıdent maqalasynda aıtyl­ǵandaı, memlekettik qyz­metti tómengi satydan bastaǵan aza­mat. Jıyrmanyń bel ortasynan asqan Erbolat Semeı qalasynda týyp, Úrjar óńirindegi Qarabuta aýylynda ósti. Barqytbeldiń baý­raıynda balalyq bal kúnderin ótkizgen ol 1995 jyly Qarabuta aýylyndaǵy orta mekteptiń tabaldyryǵyn attap, 2004 jyly daryndy balalarǵa arnalǵan qazaq tili men ádebıetin tereń­dete oqytatyn respýblıkalyq maman­dandyrylǵan mektep-ınternatta bilimin jalǵastyrdy. 2006-2012 jyldar aralyǵyn­da Turar Rysqulov atyndaǵy Qazaq ekonomıka jáne bıznes ýnı­­­ver­sıtetinde «ekonomıka» mamandyǵy boıynsha bakalavr­lyq jáne magıstrlik bilim aldy. Ol ózin ózi synaı biletin, qandaı ortaǵa tússe de áriptes­terimen tez til tabysatyn jas. Jo­ǵary oqý ornyn bitirgen jyly alǵashqy eńbek jolyn qol­­­­dan­­baly ekonomıkalyq orta­lyq­ta ekonomıka sarapshysy retinde bastady. Keıin Almaty saýda palatasy kásip­kerlik mektebiniń dırektory bolyp, birqatar joǵary oqý oryndarynda dáris oqıdy. T.Rysqulov atyndaǵy Qazaq ekonomıka jáne bıznes ýnıversıteti men Astana qalasyndaǵy Qazaq gýma­nı­tar­lyq zań ýnıver­sı­tetinde ustaz­dyq ete júrip, jeke ǵylymı iz­de­nis­terin jetildire tústi. Kózi qaraqty kórermenniń jadyn­da bolar, E.Muhamedjanov «Qazaqstan» ulttyq arnasynda «Ekonomıka jańalyqtary» saraptamalyq baǵdarlamasynyń avtory ári júrgizýshi-redaktory boldy. Osyndaı dýmandy shahar­dy, qyzyqty áriptester ortasyn qaldyryp, aýylǵa aýys­qan E.Muhamedjanovqa tań­ǵala qaraıtyndar kóp. Alaı­da, jańa ortany jatsynbaıtyn jas jarqyraǵan qaladan shekaralyq shalǵaı aýdandardyń biri sanalatyn Úrjarǵa kele salysymen, bastapqyda aýdan ákiminiń kómekshisi, keıinnen aýdandyq ishki saıasat bóliminiń bas mamany bolyp memlekettik qyzmetke bilek sybana kirisip ketti. – Anam «Qazposhta» meke­me­sinde jumys isteıtin. Arasyn­da aýdan ortalyǵyndaǵy «Qaz­poshtaǵa» esep berýge keledi. Anama erip keletin men aýdan ákimdiginiń aldynan ót­ken kezde, bolashaqta osy mekeme­de qyzmet etsem dep armandaıtyn edim. Osylaısha, joǵary sy­nypta oqyǵan kezde-aq ómi­rimdi memlekettik qyzmetke arnaýǵa sheshim qabyldadym. Bala kúngi tilegimdi birtindep iske asyra bas­tadym, – deıdi E.Muhamedjanov. Memlekettik qyzmetke kel­genine az ǵana ýaqyt bolǵan jiger­li jas mundaǵy tártip pen jaýap­kershiliktiń salmaǵyn sezine bastaǵanyn, abyroıly min­detke nuqsan keltirmeýge bar kúsh-jigerin arnap jatqanyn jetkizdi. – Meniń oıymsha, aýyldy jerde eńbek etýdiń óz artyq­shylyǵy bar. Memleket basshysy Ult Josparyndaǵy 100 naqty qadamda kez kelgen memlekettik qyzmetshi eńbek jolyn tómennen bastaýy tıistigin aıtty. Sebebi, joǵary minberden eńbek jolyn bastaǵan qyzmetker halyqtyń muń-muqtajyn túsine bermeıdi. Tańerteń kirse, keshke biraq shyǵatyn qaladaǵy kabınettik jumys rejımi de elmen etene aralasýǵa kedergi. Al óńirler­de jumys istegen memlekettik qyzmetker kún saıyn halyqty kóredi, sondyqtan, máseleniń túp-tamyry men mánin jaqsy túsinedi, – deıdi ol. E.Muhamedjanov az ýaqytta Shyǵys óńiriniń jastar kadrlyq rezervine enip úlgerdi. Atalǵan joba jóninde áleýmettik jeli­lerden bilgen soń birden jobaǵa qatysýǵa rezerv.kz. saıtyna ótinish bildirgen eken. «Jastar kadrlyq rezervi» partııalyq jobasyna qatysýǵa Shyǵys Qa­zaq­stan oblysynan 234 adam óti­nish bildirdi. Olardyń arasynan ekinshi kezeńge 145 adam ótse, joba erejesine sáıkes, sońǵy fınaldyq kezeńge ózin jan-jaqty dáleldegen 2 adam ótken-di. E.Muhamedjanov osy qos úzdiktiń biri boldy. Budan keıin Qazaqstan Res­pýb­lı­kasynyń Prezıdenti janyn­daǵy Memlekettik basqarý aka­demııasy men «Nur Otan» par­tııasynyń Saıası menedjment mektebinde tájirıbe jınaqtady. Respýblıkalyq komıssııa aldynda baıandama jasap, test synaǵynan múdirmedi. Elbasynyń «100 naqty qadam» Ult Jospary baǵdarlamasyn júzege asyrý jolynda memle­ket­tik qyzmet mártebesin ósirý týraly mindetterdiń mańyz­dy eke­nin jaqsy biletin E.Muha­med­janovtyń ózindik saraptamalary bar. Máselen, taýar óndirýshi kompanııalardan alynatyn salyqtyń satý kóleminiń bes paıyzynan aspaýy, sot qaýlysynsyz nemese qylmystyq is qozǵalmaıynsha memlekettik tekserýlerge tyıym salynýy, múlikti satý jáne satyp alýǵa, kompanııa ashýǵa notarıaldyq rastaýdyń jetkilikti bolýy syndy Germanııa, Sıngapýr, Japonııa men Ońtústik Koreıada qoldanylatyn júıeler alǵa jeteleıdi, – deıdi ol. Jas otbasynyń egesi belgili saıasatk­erler men ataqty tulǵa­lardyń ómirbaıanyn oqyǵandy, at sporty men aqyl-oıdy jetil­di­retin oıyndardy unatady. – Jýyrda Vıacheslav Shestakov­tyń «Ýınston Cherchıll. Intel­lektýalnyı portret» atty kitabyn oqydym. Árqashan áskerı ke­ıipte elestetetin Cherchılldiń myqty sýretshi bolǵanyn jáne sheshendik óner boıynsha ádebıet salasynda Nobel syılyǵynyń laýreaty atanǵanyn bildim, – deıdi jas ta bolsa zerek keıipkerimiz. Saıasattan Qazaqstannyń tuńǵysh Prezıdenti Nursultan Nazarbaev, Sıngapýrdyń birinshi Premer-mınıstri Lı Kýan Iý, Malaızııany tyǵyryqtan alyp shyqqan Mahathır Moham­mad, ekonomıkadan ekinshi dú­nıe­júzilik soǵystan keıin Ger­manııa­ny aıaqqa turǵyzǵan nemis eko­nomısi Erhard Lıýdvıg pen aǵylshyn ekonomısi Djon Meı­nard Keınsti úlgi tuta­dy. Mem­lekettik qyzmetshiniń mártebesi tabandy minezdiń bolýynda, deıdi jas maman. Dýman ANASh, «Egemen Qazaqstan» Shyǵys Qazaqstan oblysy, Úrjar aýdany