Erekshe mamandyqtyń eren maıtalmany

Qostanaıdaǵy «Qazposhta» aksıonerlik qoǵamy oblystyq fılıaly ǵımaratynyń qabyr­ǵasyna hat tasýshy, Sosıalıstik Eńbek Eri Bızada Jıenǵazınaǵa eskertkish taqta ornatyldy. Táýelsizdiktiń 25 jyldyǵymen qa­tar bıyl qostanaılyqtar oblystyń 80 jyl­dyǵyn da atap ótedi. Bızada О́tekeıqyzy oblysta poshta baılanysynyń qalyptasýy men damýyna atsalysqan. Ol Keńes Odaǵynda Sosıalıstik Eńbek Eri ataǵyn alǵan 7 pochtalonnyń biri bolatyn. Eki ret Lenın ordenimen marapattaldy. Bızada apaı 1996 jyly ómirden ótti. Biraq hat-habardy, kúndelikti poshtany alyp, aýlaǵa kúlimsirep kirip kele jatatyn onyń jarqyn beınesin qostanaılyqtar umytqan joq. Onyń esimin máńgi este saqtaý maqsatymen eskertkish taqta ornatý týraly bastamany da turǵyndardyń ózi kóterdi. – Bızada apaı aýa raıy qalaı bolsa da, gazet-jýrnal men hat-habarǵa toly aýyr sýmkasyn ıyǵyna asyp, ony ár úıge kúndelikti jetkizýge asyǵatyn. Qazirgideı ın­ternet joq, adamdar gazet-jýrnaldy kúnde alańdap kútip otyratyn. Ol naǵyz eńbek adamy edi. Ol ýaqytta hat tasýshylar brıgadaǵa bólinip, arasynda sosıalıstik jarys ótetin. Men Bızada apanyń brıgadasynda boldym. Ol kisi hat tasýshylardyń bosańsýyna mursat bermeıtin, ylǵı alda júrdik. Sosıalıstik Eńbek Eri ataǵyn alǵannan keıin oǵan jeńilirek operatorlyq jumysty usynǵanda Bızada apa bas tartyp, poshta tası beretindigin aıtqan edi. Jastarǵa qamqorshy boldy, bizdi tózim­dilikke baýlydy, – dedi Bızada О́te­keı­qyzymen birge istegen baılanys ar­da­geri Galına Pasıchnık. Bızada Jıenǵazına úlken otbasynyń anasy boldy, bala tárbıeledi. Qoǵamdyq jumystarǵa da belsene qatysatyn. Eńbek­tiń izi óshpeıtindigine eskertkish taqta jarqyn mysal bolǵandaı. Názıra JÁRIMBETOVA, «Egemen Qazaqstan» QOSTANAI