Teriskeı jerinde tabysqa jetken

Bıyl Ońtústik Qazaqstan oblysynan Qyzyljar aýda­nyna 16 otbasy qonys aýdardy. Alǵa qoıǵan arman-maqsattaryna umtylyp, jańa jerde ózgeshe ómirge beıimdele bastaǵan aǵaıyndarymyzǵa memleket tarapynan kótermeaqy jáne jalǵa baspana berilip, túpkilikti ornyǵýǵa múmkindikter jasaldy. Solardyń biri – Begalıevter áýleti. Olar kele salysymen jer telimderin alyp, ıgerýge birden kirisip ketti. «Eńbek pen baqyt – egiz» degen qaǵıdaǵa súıenetin otbasy múshelerine «kóship keldik, endi bizdiń jaǵdaıymyzdy jasańdar» dep qol qýsyryp otyrý múldem jat ekenine kórshi-qolańdardyń da kózderi anyq jetip, shyn súısinis bildiristi. Jermen jumys isteýdiń qyr-syrlaryn úırenip, úlgi-ónege alýǵa tyrys­ty. Tańnyń atysynan kúnniń batysyna deıin eńbek etýge ábden daǵdylanǵan Begalıevter Sokolov aýylynan bos jatqan jerdi jalǵa alyp, tórt gektaryn egistikke yńǵaılap óńdedi. Kóktemde osy alqapqa oramjapyraqtyń jeti túrin, odan basqa qyzanaq, sábiz, qııar syndy kókónister ekti. Ár iske úlken jaýapkershilikpen qaraǵan otaǵasy egetin dánderdiń barlyǵyn shetelden arnaıy tapsyryspen aldyrtty. Jerdi qopsytyp, jaǵalaı qaýlap ósken aramshópterdi otap, kókónisterdi baptaý sharalaryna bir kisideı jumyla kiristi. – Teriskeıdiń jeri óte qunarly eken. Sýdy Esil ózeninen alamyz. Keleshekte egistik aýmaǵyn ulǵaıtpaqshymyz. Aınala qandaı ásem. Aýasy she... Kókirek kere tynystaısyń. Aq qaıyńdarǵa qarasań, kóńiliń toıady. Sharshap-shaldyǵýdy bilmeısiń, ózińdi sergek sezinesiń. Adamdary da, tabıǵaty da janǵa jylylyq syılaıtyn soltústikke kóship kelgenime qýanyshtymyn, – deıdi О́mirálı Begalıev. Úıdiń úlkeni О́miráli ata-anasyn, inisi Aqbaralyny, qaryndasy Nafısany da alyp kelgen. Qyzyljar óńirine qonys aýdarǵan olarǵa 912 myń teńge birjolǵy kótermeaqy berildi. Baspanamen qamtamasyz etildi. Áýlettiń negizgi tabys kózi – baǵbandyq. Maýsymnyń ortasynan bastap 2,5 tonna qııar jınap, tabıǵı taza ónimdi oblys ortalyǵyndaǵy «Iýjnyı» bazary men kórshiles aýyldardaǵy azyq-túlik dúkenderine kóterme baǵamen ótkizgen. Maýsymdyq jumysqa jergilikti 15 turǵyn tartylǵan. – Biz tuqym seýip, aram­shóp­terdi julyp, jerdi qopsytýmen aınalysamyz. Jaz boıy kókó­nis­terge kútim jasap, kúzde olardy jınaýǵa atsalysamyz. 30 myń teńge eńbekaqy alamyz. Qol qýsyryp otyrǵannan góri nápa­qa tapqan áldeqaıda jaqsy ǵoı, – deıdi Sokolov aýylynyń turǵyny Valentına Kılına. Jermen jumys isteýde táji­rıbesi mol Aqbaraly maýsymdyq naýqandardyń mashaqaty kóp ekenin, ázirge túsken kiris aınalym qarajatyn tolyqtyrýǵa jetpeıtinin, sondyqtan tómen paıyzben nesıe alýdy oılas­tyryp otyrǵanyn, keleshekte sıyr satyp alyp, sút jáne et óndi­rýmen aınalyspaq oılary baryn jetkizdi. Osy jyly Qyzyljar aýdanyna kóship kelgen otbasylarǵa 5 mıllıon 270 myń teńge kótermeaqy berilgen. Jyl so­ńyna deıin atalmysh aýdanǵa kóship kelýshiler qatary taǵy eki eńbekqor otbasymen tolyq­paqshy. Alma QÝANDYQQYZY, jýrnalıst Soltústik Qazaqstan oblysy, Qyzyljar aýdany Sýretti túsirgen Amangeldi BEKMURATOV