«Tynyshymdy alǵan kim?»

Aqtóbedegi Tahaýı Ahtanov atyndaǵy oblystyq drama teatrynyń qazaq trýppasy ekstremızm taqyrybyndaǵy qoıylymdy alǵash ret sahnalady. Oblys basshylyǵynyń arnaıy tapsyrmasy boıynsha túsirilgen qoıylym nebári bir jarym aıdyń ishinde daıyndaldy. Qoıylymnyń alǵashqy kórsetilimine oblys ákimi Berdibek Saparbaev keldi. Sondaı-aq, óńirdegi din ókilderi, teologtar, ımamdar da arnaıy shaqyryldy. Astanadaǵy Q.Qýanyshbaev atyndaǵy Qazaq akademııalyq mýzykalyq drama teatrynyń repertýaryndaǵy «Esigimdi qaq­qan kim?» qoıylymynyń avtory Jabal Erǵalıev, rejısseri Nurlan Jumanııazov. Qoıylym eki bólimnen turady. Birinshi bóliminde uıyp otyrǵan otbasynyń jalǵyz qyzy men kúıeý balasynyń jat aǵymnyń jeteginde ketkeni, ekinshi bóli­minde olardyń Sırııadaǵy jaǵ­daıy kórsetiledi. Kempir men shaldyń kóziniń aǵy men qara­syndaı bir ul, bir qyzy bar. Boıjetken turmysqa shyǵysymen úıine kelýdi sıretip, týǵan qyzyn ata-anasyna tastap ketedi. Sodan, uzaq kúttirip bir kúni qyzy keledi. Ústine tutastaı qara kıim kıgen, kúıeý balasy saqalyn jiberip, qysqa balaqty shalbar kıip alǵan eken. Qasynda Juban degen kisi bar. Erli-zaıyptylar Jubannyń aıtqanynan shyqpaıtyny birden baıqalady. Aqyry olardyń Sırııaǵa attanǵany, aqsaqaldyń bul qasi­retti kótere almaı dúnıeden ót­keni, adasqan otbasynyń jyraqta kúl-talqany shyqqany shynaıy kór­setiledi. Sóıtip qoıylym qur súlderi qalǵan beıshara qyzdyń aıanyshty monologymen aıaqtalady. – Keıipkerimniń esimi Gúlnur. Jat aǵymnyń jeteginde ketip, ákeden de, shesheden de, baýyr­dan da aıyrylady. Kúıeýi Sı­rııada ózin-ózi jaryp jiberip, shynashaqtaı qyzyn sodyrlar zorlap óltiredi. Eń sońynda osynyń barlyǵynyń durys emes ekenin túsingen soń, jat aǵymnyń qursaýynan áreń qutylyp úıine oralady. Osylaısha, qyzdyń adasýy saldarynan bir otbasynyń shańyraǵy ortasyna túsedi. Bul keıipkerdi somdaý maǵan óte qıyn boldy. Janym aýyryp, ózimdi qoıarǵa jer tappadym. Daıyndyqtan keıin 2-3 saǵatqa deıin óz-ózime kele almaı qınaldym. Mundaı jat aǵym­nyń jeteginde ketken talaı jastyń taǵdyryn oılap, qatty alańdadym. Osy qoıylym arqyly kórermenge, jastarǵa oı sala alsaq, ol bizdiń úlken oljamyz bolar edi, – deıdi aktrısa Janna О́tegen. Qoıylym sátti shyqty. Qazirgi qoǵamdaǵy biteý jara – jas­tardyń teris aǵymnyń jeteginde ketip, jaqynyn jat kórip, ata-babadan kele jatqan ulttyq qundylyqtardy tárk etip, qara nıettilerdiń sońyna ileskenderi bir otbasynyń mysalynda anyq kóringen. Ata-ananyń saǵynyp kútken qyzy úıge qara jamylyp kirgende zal siltideı tynyp, odan ári ne bolaryn alańdap kútti. Adasqan kúıeý bala men jandaıshap terrorshynyń qylyǵy, shermende qyzdyń janushyryp jylaǵan sheshesin keýdesinen keri ıterip, jerge qulatyp salǵany, asyr salyp oınap júrgen búldir­shindi ata-ájeniń baýyrynan ju­lyp alyp, azapqa salý úshin áketip bara jatqany kórermenniń kóńi­lin, árıne, astan-kesten etkeni sózsiz. – Qoıylym ótken jyly daıyndalǵan edi. Biraq bul óte kúrdeli taqyryp bolǵandyqtan, kóp súzgiden ótkizildi. Sodan sahnaǵa bıyl maýsym aıynda ǵana shyqty. Kórsetilgen boıda maǵan Aqtóbeden usynys tústi. Birden kelistim. Sebebi, jastardyń jat aǵymdarǵa boı urýy, olardy qutqarý, mundaı jaǵdaıdy boldyrmaý bárimizdiń mindetimiz, – deıdi qoıylym rejısseri N.Jumanııazov. Qoıylymdaǵy basty keıip­kerlerdi teatrdyń ak­terleri Dáýren Narman, Maı­gúl Muzbaeva, Janna О́tegen, Qadir Quttybaev, Ke­ńes Kemalbaev somdady. Teatr dırektory Nurlybek Ju­batqannyń aıtýynsha, «Es­igimdi qaqqan kim?»  qoıy­lymy aldaǵy ýaqytta aýdandarda, bilim ordalarynda da kórsetilmek. Meıramgúl RAHATQYZY, jýrnalıst AQTО́BE