Jańalyqtar jedel jetkiziledi

Keshe Ortalyq kommýnıkasııalar qyzmetinde jýrnalıster «Habar» agenttigi» AQ aldaǵy ýaqytta qandaı jańalyqtar ákeletindigimen tanysty. Bul týraly jýrnalısterge aksıonerlik qoǵamnyń jańadan taǵaıyndalǵan bas­qarma tóraıymy Almagúl Ahmetjanova, onyń orynbasary Rınat Kertaev, «Habar24» arnasynyń dırektory Arman Seıitmamyt, «KazakhTV» ar­na­synyń dırektory Andreı Tarakov aıtyp berdi. Mınıstrliktiń tapsyrmasyna sáıkes, biz transformasııa jasaýǵa kirisip otyrmyz. Ol 2020 jylǵy merzimge eseptelgen. Osy aralyqta qandaı sharýalar atqaratynymyz jó­ninde kóptegen áleýmettik zertteýler júrgizdik jáne kompanııa jumysyn tolyǵymen saraptan ótkizdik. Sonyń nátıjesinde taralym saıasaty men ishki bıznes úderisin transformasııalaýǵa múmkindik týdy, dep bastady óziniń sózin A.Ahmetjanova. Sonyń ishinde «Habar» óz mamandaryn shetelde oqytyp alýǵa qatty kóńil bóletindigi belgili boldy. 2016 jyly ǵana 500-deı jýrnalıst pen basqa da mamandar shetelde bilimderin jetildiripti. Qazir túrik telekompanııasynda 150-deı adamdy oqytyp alý jóninde kelisimshartqa qol qoıylý ústinde eken. «Habar» óziniń 21-shi maýsymyna qandaı jańalyqtarmen kelip otyrǵandyǵy týraly basqarma tóraǵasynyń orynbasary Rınat Kertaev tolyǵyraq aıtyp berdi. Jańa maýsymǵa biz birneshe tusaýkeserdi daıyndap otyrmyz. Tańerteńgi jáne kúndizgi jańalyqtar shyǵarylymy jabylyp, onyń ornyna keshki saǵat 19.00-de qazaq tilinde, 21.00-de orys tilinde kúnine bir ret qana qorytyndy jańalyqtar 1 qyr­kúıekten bastap shyǵyp tur, dedi ol óziniń sózinde. Olardyń basty ereksheligi sol, endi jańalyqtardy aqparattyq-shoý janrynda berý qolǵa alynǵan. Bir kúnniń basty jańalyqtary sarapshy-jýrnalıster tarapynan tereń zerttelip, túrli ustanymdar men pikirler berý arqyly kórermenge ábden tanystyrylady eken. Sonymen qatar, burynǵy «7 kún», «Betpe-bet», «Bıýro rassledovanıe» sııaqty habarlar jańa pishinde, dekorasııalyq bezendirýleri de ózgerip usy­nylyp jatqan kórinedi. Jańa maýsymda áleýmettik baǵ­dar­lamalarǵa erekshe ba­symdyq berilgen. Sonyń ishin­de «Bizdiń nazarda» degen joba qolǵa alynypty. Onda kez kelgen áleýmettik-turmystyq máseleler respýblıkadaǵy til­shiler qosyny paıdalanyla otyryp, qoǵamdyq kózqaras turǵysynan zerttep, kórermen nazaryna usynylady. Bul «KTK», «ORT-Kazahstan» arnalarynda burynnan bar tájirıbe bolsa, endi «Habar» agenttigi de sondaı ádisti qol­dana bastapty. Rınat Kertaevtyń aıtýyna qaraǵanda, «Habarda» jańadan qolǵa alynǵan «Bilý mańyzdy» atty joba da bar eken. Munda halyqqa qajetti zańdar men normatıvtik-quqyqtyq aktiler mamandardyń qatysýymen túsindirilmek eken. Sondaı-aq, áleýmettik tok-shoýlar túrlenip, jańa pishimmen shyǵady. Sonyń ishinde «Bizdiń úı» tok-shoýy da bar, sondaı-aq «Davaıte govorıt» degen jańa tok-shoý ekranǵa shyǵatyn bolady, dedi R.Kertaev. Bular­dyń bir artyqshylyǵy – olar tikeleı efırde shyǵyp, halyqpen telefon nemese basqa da baılanys quraldary arqyly habarlasýǵa múmkindik bolady. Baspasóz konferensııasyna qatysqan «Habar24» arnasy men «Qazaq TV» arnalarynyń dırektorlary A.Seıitmamyt pen A.Tarakov ta ózderinde bolatyn jańa­lyqtarmen ta­­nystyrdy. Aıta ketetin jaıt, burynǵy «24 KZ» endi «Habar 24» bolyp, al burynǵy «Bilim jáne mádenıet» arnasy «Qazaq TV» arnasymen birigip shyǵatyn bolypty. Aty ózgergennen zaty da jaqsyǵa ózgerip jatsa quba-qup. Biraq A.Seıitmamyt «24 KZ» aty ózgergenimen, zaty ózgermeıtinin aıtty. Biz buryn da shynaıy jańa­lyqtardy jedel túr­de kórermen nazaryna usy­nyp kelgen bolsaq, bolashaqta da sol dástúrimizdi odan ári jalǵastyramyz. Barlyq óńirlerimizdiń ma­ńyzdy oqıǵalary týraly kórermenderdi der kezinde qulaǵdar etip turamyz. Oǵan bizdiń tehnıkalyq múm­kin­shilikterimiz tolyqtaı saı, tilshilik qosyndarymyz bú­gingi kúnniń eń jetildirilgen jabdyqtarymen qarýlanǵan, dedi A.Seıitmamyt. Brıfıngtiń sońynan qo­naqtar jýrnalıster­diń kóp­tegen suraqtaryna jaýap berdi. Jaqsybaı SAMRAT, «Egemen Qazaqstan»