Taqtadaǵy taıtalas támamdaldy

Ázerbaıjannyń astanasy – Bakýde qyrkúıektiń 2-sinde bastalǵan Dúnıejúzilik shahmat olımpıadasy 14-inde óziniń máresine jetti. Týrnır shveısarııalyq júıe boıynsha 11 týr boıynsha ótkizildi. Árbir komanda sapynda 4 negizgi jáne 1 qosalqy oıynshy óner kórsetti. Kaıssa sarbazdarynyń kúresi qorytyndysynda erler quramalary arasynda AQSh, Ýkraına jáne Reseı shahmatshylary alǵashqy úsh orynǵa ornalasty. Úzdik ondyqtyń qalǵan oryndaryn osy retterimen Úndistan, Norvegııa, Túrkııa, Pol­sha, Fransııa, Anglııa jáne Perý koman­dalary tolyqtyrdy. Osy dodada Qazaqstan jasaǵy 28-orynǵa taban tiredi. Postkeńestik elderden bizdiń aldymyzǵa Ázerbaıjan (12-oryn), Belarýs (14), Latvııa (17) jáne Grýzııa (24) túsip ketti. Áıelder arasyndaǵy básekede júldeli úshtikti Qytaı, Polsha jáne Ýkraına sportshylary túzdi. Ondyqtyń qalǵan oryndaryna Reseı, Úndistan, AQSh, Vetnam, Ázerbaıjan, Izraıl jáne Grýzııa jaıǵasty. Bizdiń qyzdar 37-orynnan tabyldy. Jarystyń sońǵy kúni altyn medaldiń basty úmitkerleri – AQSh jáne Ýkraına erler quramalary kezekti qarsylastaryn jeńip, 20 upaıdan jınady. Budan keıin qosym­sha kórsetkishterdi sarap­qa salýǵa týra keldi. Ol Qurama Shtattar shah­mat­shylaryn birinshi orynǵa shyǵar­dy. Osy kúni Qazaqstan koman­dasy Lıtvany 2,5:1,5 etip tize búk­tir­di. Olımpıada qorytyndysynda jigitter arasynda fılıppın­dik Eýgenıo Torre – birinshi, kanadalyq Erık Hansen – ekinshi, ýkraınalyq Anton Volokıtın úshinshi oryndarǵa shyqty. Biz­­diń komandadan Murtaz Qajy­ǵalıev – 90-shy, Ánýar Izmaǵambetov – 92-shi, al Azamat О́teǵalıev 107-shi boldy. Áıelder básekesinde Qytaı men Reseı betpe-bet kelip, bulardyń aldyń­ǵylary jeńiske jetti. Sóı­tip, bas báıgeniń taǵdyry sheshildi. Al reseılikter júldeli orynnyń sheń­berinen shyǵyp qaldy. Qazaq­stan qyzdary sońǵy týrda Belarýs komandasynan 1,5:2,5 esebimen jeńilis tapty. Qyzdar arasynda grýzın Nıno Basıashvılı – birinshi, qytaılyq Jangııý Tan – ekinshi, polıak Klaýdıa Kýlan úshinshi oryndardy enshiledi. Qazaq­stan­dyqtar arasynan Sholpan Jyl­qaıdarova (113), Jansaıa Ábdi­málik (137) jáne Gúlmıra Dáýletova (146) úzdik 150-liktiń sheńberinen kórindi.   Damır QOJAMQUL