Jumys mańyzdy zań jobalarymen bastaldy

Keshe Parlament Májilisiniń Tóraǵasy Nurlan Nyǵmatýlınniń tóraǵalyǵymen palatanyń jalpy otyrysy ótip, onda birneshe mańyzdy zań jobasy boıynsha jumys bastalatyny jóninde qaýlylar qabyldandy. Bul zań jobalarynyń bári de Qarjy jáne bıýdjet komıtetiniń qorjynyna túsken eken. Atap aıtar bolsaq olar: «Ulttyq qordan 2016-2018 jyldarǵa bólinetin kepildendirilgen transfert týraly», «2016-2018 jyldarǵa arnalǵan respýblıkalyq bıýdjet týraly», «Ulttyq qordan 2017-2019 jyldarǵa bólinetin kepildendirilgen transfert týraly», «2017-2019 jyldarǵa arnalǵan respýblıkalyq bıýdjet týraly» zańdarǵa ózgerister men tolyqtyrýlar engizý týraly zań jobalary eken. Atalǵan zań jobalarynyń bári, sondaı-aq respýblıkalyq jáne oblystyq bıýdjetter, respýblıkalyq mańyzy bar qala, elorda bıýdjetteri arasyndaǵy 2017-2019 jyldarǵa arnalǵan jalpy sıpattaǵy transfertterdiń kólemi týraly, «Kollektorlyq qyzmet týraly» jáne oǵan ilespe zań jobalarymen jumysty jalǵastyrý týraly qorytyndy ázirleý merzimderi belgilendi. Bular týraly Qarjy jáne bıýdjet komıtetiniń tóraıymy Gúljan Qaraǵusova baıandap, qorytyndy ázirleý merzimin jalpy otyrys qabyldaǵan qaýlymen bekit­tirip aldy. G.Qaraǵusovanyń aıtýy­na qaraǵanda, olardyń bári de Elbasy N.Na­zar­baevtyń tapsyrmasymen ázirlengen el ekonomıkasynyń damýyna ıgi yqpalyn tıgizýge tıisti mańyzdy qujattar. Osy kúngi jalpy otyrysta palata Qazaqstan men Serbııa arasyndaǵy «Tabys pen kapıtalǵa salynatyn salyqtarǵa qatysty qosarlanǵan salyq salýdy boldyrmaý jáne salyq salýdan jaltarýǵa jol bermeý týraly úkimetaralyq konvensııany jáne oǵan qosymsha jasalǵan Hattamany ratıfıkasııalaý týraly» zań jobasyn da maquldady. Bul zań jobasy týraly Qarjy mınıstri Baqyt Sultanov baıandady. Onyń aıtýyna qaraǵanda, konvensııa ýaǵdalasýshy memleketterdiń rezıdentteri bolyp tabylatyn zańdy jáne jeke tulǵalardyń tabystaryna qosarlanǵan salyq salýdy boldyrmaýǵa múmkindik beredi. Salyq tóleýshige bir ret qana salyq tóleý rásimi bekitiledi. Al áriptes memleket tólengen salyqty ózinde esepke alady. Bul eki jaqqa da ınvestısııalar quıý úshin qolaıly jaǵdaı týǵyzatyndyǵymen tıimdi. Bul eki memlekettiń quzyretti organdary arasynda salyq tóleý máseleleri boıynsha aqparat almasýlar arqyly salyqtan jaltarýdy boldyrmaý máselelerin sheshýge kómektesedi. Sonymen qatar, konvensııanyń jekelegen baptary ýaǵdalasýshy memleketterde qyzmet isteıtin óner adamdarynyń jáne sportshylardyń, memlekettik qyzmet­shilerdiń, stýdentterdiń, oqytýshylardyń jáne zertteýshi mamandardyń tabystary men ózge de tólemderine salyq salýdyń naq­ty tártibin kórsetedi, dedi mınıstr. Depýtattar máseleni naqtylaý maqsa­t­ynda birneshe suraq qoıǵannan keıin, zań jobasy tutastaı maquldandy. Jaqsybaı SAMRAT, «Egemen Qazaqstan»