«Jolaýshylar tasymaly» AQ osyǵan qol jetkizbek
Halyqtyń jaǵdaıy jaqsaryp, barys-kelis kóbeıgen saıyn temirjoldaǵy jolaýshylar tasymalynyń mańyzy arta túskendigi seziledi. О́ıtkeni temirjol vokzaldaryndaǵy adamdar qarasy jyldan jylǵa molaıa túsýde. Endeshe olarǵa qyzmet kórsetýdi jaqsartý isinde qandaı jańalyqtar bar? Burynǵy kemshilikterdi eńserý baǵytynda qandaı sharalar qolǵa alynýda? Osynyń bilmek bolyp «Qazaqstan temir joly» UK» AQ-tyń «Jolaýshylar tasymaly» AQ basqarma tóraǵasy (prezıdenti) Nurdáýlet QILYBAIDY áńgimege tartqan edik.
– Nurdáýlet Igilikuly, jolaýshylar men olarǵa qyzmet kórsetetin poıyzdar qarasynyń molaıǵandyǵyna, vagondardyń jyldan jylǵa jańalana túskendigine qarap, sizderdiń qyzmetterińizden ońǵa basqan kúrt ózgeristerdi baıqaǵandaımyz. Osy jaıynda ózińiz ne aıtar edińiz?
– Rasynda da elimizde jańa temirjoldar salynyp, poıyzdar qyzmeti jaqsarǵan saıyn onyń qyzmetin paıdalanýshylar qatary da jyldan jylǵa artyp kele jatqandyǵy baıqalady. О́zińiz aıtqandaı, kóptegen jolaýshylar munyń kózge uryp turǵan shyndyq ekendigin jaqsy biledi. Osynyń jaqsy bir mysaly retinde myna bir faktini keltire ketsem artyq bolmas. Eger 2005-2006 jyldary bizdiń kompanııamyz 15 mıllıon jolaýshy tasymaldasa, ústimizdegi jyly bul kórsetkish 20 mıllıon adamǵa jaqyndady. Iаǵnı jolaýshylar sany 30 paıyzdan astam ósti. Munyń ózi bizdiń kompanııamyzdyń básekelestik qabileti men ósý áleýetiniń mol ekendigin kórsetse kerek.
Árıne, bizdiń qyzmetimizdi paıdalanatyn jolaýshylar sanyn munan da ósire túsýge bolar edi. Biraq ókinishke oraı, bizdiń aýmaǵymyz arqyly ótetin keıbir halyqaralyq poıyzdar, ıaǵnı sheteldik qyzmet kórsetýshiler bılet baǵasyn qymbattatyp jiberdi. Bizdiń ortaq isimizge osy jaǵdaıdyń da áser etkendigin jasyrýǵa bolmaıdy.
Degenmen bizdi bir qýandyratyny jolaýshylar arasynda bizdiń «Tulpar-Talgo» vagondarynyń qyzmetin paıdalanýǵa umtylýshylardyń artyp otyrǵandyǵy. Máselen osy vagondarǵa minetin jolaýshylar sany 2015 jylmen salystyrǵanda eki ese arta túskendigi baıqalady.
– Buǵan qalaı qol jetkizdińizder?
– «Tulpar-Talgo» vagondarynyń qyzmetin paıdalanǵysy keletin jolaýshylardyń eleýli bóligine birqatar qolaıly jeńildikterdi usyndyq. Mundaı adamdardyń qatarynda soǵys ardagerleri (jeńildik kólemi – 99 paıyz), múgedekter (jeńildik – 50 paıyz), zeınetkerler, kóp balaly analarǵa, stýdentter bar (olarǵa jeńildik – 30 paıyz). Sondaı-aq «Tulpar-Talgo» vagondaryna erterek bılet satyp alǵan bylaıǵy azamattarǵa da úlken jeńildikter usyndyq. Úlken deıtin sebebim, eger jolaýshy bıletti ózi saparǵa shyǵatyn kúnnen kóp erterek satyp alatyn bolsa, oǵan satylatyn mundaı bılettiń quny jáı vagondar baǵasynan de tómenirek bolyp shyǵady. Sóıtip jolaýshy qandaı poıyzǵa miný jóninde kúni buryn tańdaý jasaıtyn otyryp, «Tulpar-Talgo» vagonyn qalasa, ol óziniń baratyn jerine jaı paıyzdarǵa qaraǵanda jyldamyraq qana emes, sonymen qatar arzan baǵamen de jetedi.
Máselen, Astana – Qyzylorda baǵytynda júretin «Tulpar-Talgo» vagonynyń kýpesine múgedekter úshin bılettiń quny 5,3 myńnan 9,8 myń teńge aralyǵynda turady. Al standartty poıyzdaǵy osy bılettiń quny 10,3 myń teńgeni quraıdy. Demek, múgedek adam úshin jaı poıyzdan góri Talgomen júrgen áldeqaıda tıimdi. Sondaı-aq, zeınetkerler, jastar, kóp balaly analar úshin de basqa poıyzdarǵa qaraǵanda «Tulpar-Talgo» bıleti osynshama mólsherde áldeqaıda arzanyraq.
Mine, osyndaı tıimdiligine baılanysty qazirgi kúni «Tulpar-Talgo» vagondarymen júrýshiler qatary ýaqyt ótken saıyn artyp keledi. Bul bizdiń kompanııamyzdyń qarjylaı qoldaýǵa muqtaj azamattarǵa usynyp otyrǵan áleýmettik baǵyttaǵy jaqsylyǵy jáne elimizde sońǵy jyldary paıda bolǵan jolaýshylar tasymalyndaǵy jaıly servıstik qyzmetke halyqtyń qalyń bóliginiń qolyn jetimdi etý baǵytynda atqarǵan úlken bir jumysy bolyp otyr.
– Árıne, servıstik qyzmet jaıly, baǵa tómen bolǵan saıyn kez kelgen qyzmet kórsetý salasynda oǵan degen suranystyń arta túsetindigi belgili. О́ıtkeni bul naryq zańy. Al sizder ósip kele jatqan osy halyq suranysyn óteýge ázirsizder me?
– Árıne, kompanııanyń qolyndaǵy vagondar parkin jańartyp qana qoımaı, «Tular-Talgo» sekildi júırik vagondar qataryn arttyra bermesek, túbinde bizdiń suranystan keıin qalyp qoıýymyz ábden múmkin. Sondyqtan bul máseleni de kún ilgeri oılastyrý ústindemiz. Máselen 2012 jyldan bastap 436 jolaýshylar vagonyn satyp aldyq. Bıylǵy jyly 149 «Tulpar-Talgo» vagonyn satyp alýdy josparlap otyrmyz. Bul vagondardyń jekelegen qyzmettik kórsetkishteri Ispanııa jáne basqa elderdegi synaq organdarynda synnan ótip, olardyń oń baǵasyna ıe boldy. Endi óz elimizde Betbaqdala tósinde dınamıkalyq synaqtan ótýde. Synaq barysyndaǵy qazirgi kórsetkishteri jaman emes. Bylaısha aıtqanda, qoıylatyn standarttyq talapqa sáıkes kelýde. Sondyqtan kóp uzamaı bul vagondar tıisti sertıfıkatqa ıe bolǵannan keıin bizdiń qolymyzǵa tıip, halyq ıgiligi jolynda qyzmet kórsete bastaıtyn bolar dep oılaımyn. Bir atap óter másele bul jańa vagondar alǵashqy «Tulpar-Talgo» vagondaryna qaraǵanda ári bıik, ári keń. Qolaılylyq jaǵynan basqa da artyqshylyqtary bar. Ol artyqshylyqtardy jolaýshylar laıyqty baǵalaıtyn bolar.
Jalpy kompanııamyz 2020 jylǵa deıin 603 jańa vagondy satyp alýdy josparlap otyr. Eger taıaýdaǵy úsh-tórt jyldyń ishinde osy kórsetkishke qol jetkizetin bolsaq, onda bizdiń vagondar parki edáýir jańaryp qana qoımaı, jolaýshylarǵa kórsetiletin qyzmet sapasy da arta túsetin bolady. Biz jolaýshylardyń óskeleń suranysyn osylaısha qanaǵattandyrmaqpyz. Osy jolda oılastyryp, júzege asyrýǵa den qoıyp otyrǵan basqa da sharalarymyz az emes.
–
Qyzmet sapasy demekshi, jaqynda Bas prokýratýra tarapynan sizderdiń kompanııalaryńyzdyń keıbir poıyzdary synǵa ushyraǵandyǵyn buqaralyq aqparat quraldarynan estip, bildik. Onda jolserikter men kassırlerdiń qyzmet tártibin buzatyndyǵy, tósek jaımalarynyń eskirgendigi jaıly aıtylyp qaldy. Buǵan ne deısiz?
– Qyzmetimizde kemshilik joq dep aıta almaımyn. Men ózim osy qyzmetke kiriskennen beri sol kemshiliktermen aıaýsyz kúresip kelemin.
Jıyny 14,5 myń adam eńbek etetin úlken ujym bolǵandyqtan kez kelgen tártip buzýshylyq pen kemshilikti qolma qol bilip otyrýdyń ózi múmkin emes. Máselen bizdegi jolserikterdiń sanynyń ózi 6 myń adamnan asady. 800 bılet satatyn kassır qyzmet isteıdi. 6 myńǵa tarta ártúrli mamandyqta óndiriste qyzmet etetin qyzmetkerlerimiz bar. Árıne, adam bolǵan soń olardyń bári birdeı emes. Keıbireýleriniń qyzmeti jolaýshylar kóńilinen shyǵa almaı jatýy da ábden múmkin. Onyń ústine 20 mıllıon jolaýshynyń árbiriniń kóńil kúıin, zerttep baqylap otyrýdyń múmkindigi de bizdiń qolymyzda joq.
Biraq osylaı eken dep aýzymyzdy qý shóppen súrtip, sútten aq, sýdan taza bolyp kórinsek degen nıetimiz joq. Shamamyzdyń kelgeninshe kemshiliktermen kúresemiz. Bul rette demokratııalyq tıimdi tásilderdi qoldanýǵa umtylamyz. Máselen men ózim Whats'App-taǵy telefon nómirimdi vagondarǵa ildirip qoıý praktıkasyn engizdim. Jolseriktiń qyzmetinen kemshilik, vagonnan jaısyzdyq baıqaǵan jolaýshy ol faktini sýretke túsirip dáleldeý arqyly maǵan tikeleı jónelte alady. Men ony tómengi turǵan býynǵa jóneltemin. Sóıtip, bul jaısyz habar oqıǵa bolǵan poıyzdyń ózine deıin jetip, kemshilik túzetiledi. «Halyq kózi qyraǵy» dep tegin aıtylmaǵan ǵoı. Osyndaı halyq tarapynan týyndaıtyn baqylaýdy iske qosý arqyly poıyzdardaǵy talaı kemshilikter túzetildi de.
Jasyryp, jabary joq halyq kózine kórinetin poıyz qyzmetiniń kemshilikteri kóbinese jolserikter tarapynan týyndap jatady. Ol kemshilikterdiń úlken-kishisi bolady jáne olar jolserikterdiń biliksiz nemese tájirıbesizdiginen nemese nemquraıdylyǵynan, jaýapkershiliginiń tómendiginen ketýi nemese paıda tabý maqsatynda ádeıilep, bile tura jasalynýy múmkin. Jibergen kemshiligine baılanysty tıisti jazalaý sharasy qarastyrylady. Máselen jolserik buryn vagonǵa bıletsiz adam mingizetin bolsa, oǵan sógis beriledi eken. Biz osy sharany qataıtyp, birden jumystan shyǵaratyn bolyp sheshtik. Jolseriktermen jasalatyn árbir eńbek shartyna osy ózgeristi engizdik. Bizdiń mundaǵy maqsatymyz – adamdy jazalaý emes, bolýy múmkin kemshilikterdiń aldyn alý.
Árıne, kemshilikterdiń birqatary bizdiń materıaldyq-tehnıkalyq jaǵdaıymyzdan da týyndaıtyndyǵy anyq. Bizdiń kompanııamyz qazirgi kúni 121 baǵyt boıynsha jolaýshylar tasymaldaıdy. Osylardyń barlyǵynyń jaǵdaıy birdeı emes. Jańaǵy baǵyttardyń 12-sine «Tulpar-Talgo» poıyzdary qyzmet kórsetedi. Olardaǵy servıstik qyzmet basqalarǵa qaraǵanda jaqsy jolǵa qoıylǵan. Sondyqtan biz «Tulpar-Talgo» qyzmetin jyl ótken saıyn damytyp, jaqsarta berýdi maqsat etip otyrmyz. Sondaı-aq 9 halyqaralyq, 34 qala mańy baǵyttary boıynsha qyzmet kórsetemiz. Jalpy jolaýshylar úshin 2 myńnan astam jyljymaly quram jumys isteıdi. Osylardyń báriniń jaǵdaıy birdeı emes. Keıbir jyljymaly quramdar eskirgen. Biraq qyzmet merzimi aıaqtalyp bitpegendikten biz olardy kúni buryn esepten shyǵara almaımyz. Kóbinese kemshilikter osyndaı poıyzdarda týyndaıdy. О́ıtkeni mundaı vagondarda aýa baptaǵyshtar olar zaýyttardan shyqqan kezdiń ózinde ornatylmaǵan. Endi olardy qoldan ornatýdyń tehnıkalyq múmkindikteri joq.
Shynyn aıtý kerek, eger biz 2008 jyldan bastap vagondar parkin jańartý jóninde arnaıy baǵdarlama qabyldamasaq, jaǵdaıymyz munan da múshkil bolar edi. О́ıtkeni, kezindegi aýyr jaǵdaıǵa baılanysty 1994 jyldan bastap 2000 jylǵa deıingi kezeńde jańa vagondar múldem satyp alynbady dese de bolady. Biz 2008 jyldan bastap, vagondar satyp alý isine kirisken ýaqyttan beri ǵana jaǵdaı jyldan jylǵa jaqsarýda. Máselen, osy ýaqyt aralyǵynda poıyzdardyń tozý kórsetkishi 79 paıyzdan 49 paıyzǵa deıin tómendedi. Qazirgi kúni bizdegi árbir vagonnyń ortasha qyzmet kórsetý merzimi 14 jyldy kórsetip otyr. Endi jańa vagondar satyp alǵan saıyn, vagondardyń ortasha jasy da tómendep, olar jańara bermek. Osylaısha biz problemany da eńserip, birte-birte aýa baptaǵyshtary joq vagondardan qutylatyn bolamyz.
Sonymen qatar, qazir vagondardaǵy tósek jabyndaryn aýystyrý, ıaǵnı olardy jańalaý isine de belsene kirisip jatyrmyz. Osy qazan aıynyń sońyna deıin jańa tósek jabyndylarynyń, kórpe-jastyqtar qaptamalarynyń 140 myń danasy jańadan satyp alynyp, eskileri aýystyrylatyn bolady.
Osy jaǵdaıǵa baılanysty taǵy bir eskere ketetin másele qazirgi kúni temirjol boıynda jolaýshylarǵa qyzmet kórsetetin bizden basqa da jekemenshik kompanııalar nemese vagondar barshylyq. Keıbir adamdar solardyń jibergen kemshilikteri men olqylyqtaryn da bilmestikten bizge tańyp jatady.
– Siz joǵaryda kelip túsetin shaǵymdardyń birqatary jolserikter qyzmetine qatysty bolatyndyǵyn aıttyńyz. Ádette, adam faktoryna qatysty kemshiliktermen kúres máselesi kúrdelileý bolyp keletindigi belgili. Osy baǵytta oılastyryp otyrǵan sharalar bar ma?
– Iá, durys aıtasyz, biz jolserikterdi jazalaý arqyly ǵana máseleniń bárin sheshe almaımyz. Buǵan qarap, bizdegi jolserikterdiń barlyǵy óz qyzmetterine jaýapsyz qaraıdy eken degen oı týmasa kerek. Máselen, joǵaryda aıtylǵan meniń Whats'App-yma jolserikter qyzmetine rızashylyq bildirgen jyly lebizder de jıi kelip túsip jatady. Máselen, kelip túsken barlyq habarlardyń jartysynan kóbin osyndaı jyly lebizder quraıdy.
Osy arada aıta ketetin bir másele, jolaýshylar tasymaly salasyndaǵy kemshilikter men jetispeýshilikterdi eskere otyryp, bizdiń kompanııamyz temirjol kóligindegi jolaýshylar úshin qyzmet kórsetýdiń jańa standarttaryn ázirleýge kiristi. Bul jańa standarttar barlyq úderisterdi, sonymen qatar, qyzmetkerlerdiń biliktilik deńgeıin kóterý, aktıvter men tehnologııalardy modernızasııalaý máselelerin qamtıdy.
Jyldyń sońyna deıin qyzmet kórsetý men olardy baqylaý tetikteriniń 7 basty úderisin reglamentteıtin biregeı standartty ázirlep shyqpaqpyz. Taratyp aıtatyn bolsaq, bul 7 úderis myna máselelerdi qamtıdy:
- Klıentterdi aqparattandyrý;
- Vokzaldardaǵy qyzmet kórsetý men olardyń jaǵdaılary;
- Bıletter satý;
- Poıyzdardyń sanıtarlyq-tehnıkalyq jaǵdaıy;
- Poıyzdardy servıstik qural-jabdyqtarmen qamtamasyz etý;
- Servıstik qyzmetker;
- Servıstik qyzmet.
Sonyń ishinde, biz qazir jolserikter men kassa qyzmetkerlerin eýropalyq poıyzdardaǵy joǵary qyzmet kórsetý servısterine sáıkes oqytý máselesin qolǵa alý ústindemiz. Osy úshin Ispanııaǵa baryp, osy eldegi tıisti baǵdarlama ázirleıtin bilikti mamandarmen kezdestik.
Osyǵan oraı, sheteldik tasymaldaýshy kompanııalardyń úlgili tájirıbesine qarap, jolaýshylarǵa qyzmet kórsetý salasyndaǵy eýropalyq mamandardy tartyp jatyrmyz.
Eýropalyq mamandar bizdiń poıyzdardaǵy jolserikter men kassa qyzmetkerlerine qatysty zertteýler júrgizip, jaǵdaıdy túzetýdiń joldaryn bizge málimdedi. Osyǵan sáıkes, arnaıy oqytý baǵdarlamasyn jasaý ústinde. Ol baǵdarlama bizge unap otyr. О́tken juma kúni kompanııa qyzmetkerlerin oqytý jóninde sheteldik arnaýly mamandanǵan mekememen memorandýmǵa qol qoıdyq. Sóıtip, bul iste kóp keshikpeı jolǵa qoıylatyn bolady.
Osy rette aıta ketetin bir másele, bizdegi qazirgi temirjol salasynda jolaýshylarǵa qyzmet kórsetýdiń standarttary sonaý Keńes dáýirinde jasalǵan bolatyn. Endi osyny ózgertip, jańa zamanǵa beıimdeý isin de qolǵa alyp jatyrmyz. Munyń ózi qyzmet kórsetý sapasyna jaǵymdy yqpalyn tıgizedi degen senimdemin.
Jalpy, qyzmet kórsetý tehnologııasyn jetildirý baǵytynda jasap jatqan jumystarymyz az emes. Máselen, qazirgi kúni bizdiń vagondarǵa satylatyn bıletterdiń 30 paıyzy ınternet, ózine-ózi qyzmet kórsetý termınaldar arqyly júzege asyrylady, ıaǵnı bul máselege ortada adam aralaspaıdy. Sonyń nátıjesinde qazirgi kúni bıletti jasyryn satý jónindegi bylyq-shylyqtar qazir kóp kezdese qoımaıdy. Eger osyndaı jaǵdaı oryn alatyn bolsa, onda tıisti qyzmetker qatań jazalanady. Endi mine, jolserikter men kassa qyzmetkerlerin oqytý arqyly olardyń bilimi men biligin, mádenı deńgeıin kóterý jaıyn da oılastyryp jatyrmyz.
Jalpy, bıletterdi ınternet arqyly satý jóninen bizdiń kompanııamyz búkil TMD keńistiginde alǵashqy oryndarda kele jatqandyǵyn aıtsam, bul maqtanǵandyǵym emes. Bul jónindegi kórsetkish bizde jedel joǵarylaýda. Máselen, byltyr bıletterdiń 10 paıyzy tek qana ınternet arqyly satylsa, bıylǵy jyly bul kórsetkish 20 paıyzdyń ústine shyǵyp otyr.
Endi, mine, óz poıyzdarymyzǵa ınternet jelisin qoıý máselesin oılastyryp jatyrmyz. Birinshi kezekte, bul is Astana men Almaty qalasy arasynda qatynaıtyn poıyzdarda júzege asatyn bolady. Sonan keıin basqa baǵyttar boıynsha da qolǵa alatyn bolamyz.
– Rasynda da, zaman alǵa basqan saıyn sizderden kompanııalaryńyzdyń qyzmet kórsetý salasynda engizip jatqan ózgerister men jańalyqtaryn kórip te, sezinip te júrgenimiz ótirik emes. Endi kelesi jyly Astana qalasynda ótetin EKSPO kórmesine qandaı ázirlikterińiz baryn bile ketsek. О́ıtkeni, shetelden kelgen týrıster ushaq, poıyz, taksı qyzmetterin paıdalanatyndyǵy anyq qoı.
– EKSPO-ny ótkizý barysynda bizdiń qyzmetimizdi 1 mıllıonnan astam qosymsha jolaýshy paıdalanýy tıis degen aldyn ala boljamymyz bar. Mine, osy úshin qosymsha 10 shaqty poıyzdy jolǵa qoıatyn bolamyz. Bıylǵy jyldyń ózinde jańadan alynǵan 4 elektropoıyz qala mańy saparlaryna shyǵatyn bolady.
Amadeus dep atalatyn halyqaralyq bıletter taratý júıesi bar. Ol kompanııa búkil álem boıynsha jumys isteıdi. Osy kompanııamen kelisimshartqa otyryp, óz qyzmetimizge aldyn ala bılet taratý máselesin álemdik keńistikte qarastyrý isin qolǵa aldyq.
Munyń syrtynda kórshimiz Qytaıdyń sheteldik qonaqtarǵa, týrısterge qyzmet kórsetý jónindegi halyqaralyq ozyq tájirıbesi bar eken. Osy tájirıbege nazar aýdaryp otyrmyz. Munda jolaýshy tasymalynda logıstıka jáne týrızm máselesi jekedara qarastyrylatyn kórinedi. Olardyń osy tájirıbesi zerttelýde. Kóp ótpeı, bizge tıimdi jaqtaryn qoldana bastaıtyn bolamyz.
– Qazirgi kúni elimizde «Tulpar-Talgo» qyzmeti keńinen tarap, árbir aımaq turǵyndaryna qoljetimdi bola túskendigin baıqap otyrmyz. Biraq ókinishke oraı, Oral qalasynyń halqy áli de bolsa onyń qyzmetin paıdalana almaı keledi. Osyǵan oraı oraldyqtar tarapynan ókpe-renishter de estilip jatatyndyǵy jasyryn emes.
– Ras, ondaı áńgimeni biz de estip jatamyz. Estip qana qoımaı, atalǵan máseleniń sheshimin tabý baǵytynda tabandylyqpen jumystar júrgizip kelemiz. Bizde Astana men Aqtóbeniń, Almaty men Aqtóbeniń arasynda «Tulpar-Talgo» poıyzdary qatynaıdy. Endi olardyń qyzmetin Oralǵa deıin jetkizsek dep otyrmyz. Bul rette, bizge bóget bolyp kelgen bir másele atalǵan isti júzege asyrý úshin Reseı tarapymen kelisimge kelýimiz kerek. Sońǵy kezderi osynyń jaqsy múmkindigi paıda bolǵandyǵyn aıta ketsem artyq bolmas. Demek, bul máseleni de kóp ótpeı sheship, «Tulpar-Talgo» qyzmetin Oral qalasyna deıin de jetkizemiz dep oılaımyn.
– Keıbir jolaýshylar halyqaralyq poıyzdardaǵy bılet baǵasy qymbat ekendigin aıtyp, shaǵym jasap jatady.
– Onyńyz ras, jalpy Ýkraına, Reseı, О́zbekstan jáne basqa da birqatar elderde poıyz bıletteriniń baǵasy bizge qaraǵanda áldeqaıda qymbat. Biz olardan jolaýshylarǵa kórsetetin óz qyzmetimizdiń baǵasyn 1,5-2 esedeı arzan ustap otyrmyz. Osy arzanshylyqqa úırengen bizdiń jolaýshylarymyz halyqaralyq poıyzdarǵa bılet satyp alǵan kezde olardyń baǵasynyń qymbattyǵyn birden baıqaıdy.
– Máselen, Petropavl qalasynyń turǵyndary osy jerden qazaqstandyq poıyzdarǵa kórsetiletin qyzmet baǵasynyń basqa óńirlerge qaraǵanda qymbat ekendigin aıtyp jatady.
– Munyń sebebi, Petropavl temir joly Reseıge qaraıdy. Bul másele tarıhı turǵyda solaı qalyptasqan. Sondyqtan, ol jerde poıyzǵa bılet satý máselesi halyqaralyq tarıfter boıynsha júrgiziledi. Ony túzetýge bizdiń tikeleı amalymyz joq. Biraq sol jerden biz óz kassalarymyzdy ashtyq. О́zimizdiń poıyzdarymyzǵa bıletterdi óz tarıfterimiz boıynsha sata bastadyq. Buǵan halyq qazir qatty qýanýda.
– Endi ózińiz týraly birer aýyz baıandaı ketseńiz.
– Temirjolshylar áýletinen shyqqan adammyn. Bul mamandyqty tańdaýyma osy jaǵdaı sebep boldy. Almaty temirjol ınstıtýtyn bitirgennen beri osy salada tabandap eńbek etip kelemin. Qyryq jasqa da kelip qaldyq. Otbasymyz bar. El qatarly ómir súrip jatyrmyz. О́zim týraly qysqasha aıtarym osy.
– Áńgimeńizge rahmet.
Áńgimelesken Suńǵat ÁLIPBAI,
«Egemen Qazaqstan»
