100 jasqa deıin oraza ustaǵan qarııa

Shymkentte jasy 102-ge tolǵan Toty Iýldasheva atty keıýana bar. Ob­lysta ózbek tilinde shyǵatyn gazet­tiń tilshisi Nargıza Mavlonovanyń bas­taýymen sálem bere bardyq. Bir ǵasyrdy art­qa tastasa da qarııa tyń. Qulaǵy aýyr­laý estigenimen áńgimeden qala qoımapty. Bul kisilerdiń zamanynda eshkimniń shekesi qyza qoımaǵan ǵoı. Áke-shesheden jastaı qalǵan Toty qyz 16 jasynda ózinen eki jas úlken Qoshqarbek atty jigitke turmysqa shyǵady. Qoshqarbek kóke 1981 jyly 69 jasqa qaraǵan shaǵynda dúnıeden ótipti. Ekeýinen órbigen tórt perezentten búginde 18 nemere, 41 shóbere, 13 shópshek kórgen. Bári din aman, qarııanyń kóz qýanyshy. Toty anamyz jıyrma eki jasynda namazǵa jyǵylyp, júz jasqa kelgenge deıin oraza tutqan eken. Aýrýhanaǵa jatyp em alyp kórmegen keıýana munyń syryn eńbekpen baılanystyrady. Kolhozdyń ómiri bitpeıtin qara sharýasyna zeınet jasyna deıin aralasqan. Únemi jaıaý júredi eken. Búginde ǵalymdar jaıaý júrý men sýǵa júzýdiń adam densaýlyǵyna qansha­lyq­ty paıdalylyǵyn aýyz toltyra aıtyp júr. Sonyń rastyǵyn osy ýaqytqa deıin tósek tartyp jatyp qalý bylaı tursyn, aýrýhanaǵa jatpaǵan, dári-dármek ishpegen, qudaıǵa qulshylyq qylyp, namazyn qaza etpegen Toty apaı­dyń ónegeli ómirinen kóresiz. – «Eńbektiń nany tátti, jalqaýdyń jany tátti». Biz osy qaǵıdamen ómir súr­dik, – deıdi qarııa. – Barǵa qanaǵat et­tik. Qandaı aýyr jumys bolsa da qash­pa­dyq. Búgingi saý-salamat júrgenimiz sol eńbektiń arqasy. Biz buryn esebi joq kolhoz, sovhoz jumysyn jasasaq, búginde jeke sharýaǵa Úkimet úlken múmkindik berip otyr. Qandaı sharýa­men aınalysam deseń de járdem bolady. Elińniń, bala-shaǵańnyń amandyǵy­nan, Otanyńnyń irgesi bútindiginen artyq baqyt joq. Aq tileýli qarııanyń aıtary osy. Ǵasyrdan uzaq jasaǵan keıýana jasynda tartqan beınetiniń qazir zeınetin kórip otyr. Baqtııar TAIJAN, «Egemen Qazaqstan» Ońtústik Qazaqstan oblysy