Qaýip qaıdan demeńiz

Kúzgi jaýyn-shashynnyń saldarynan muzdaqty kólderdegi sý deńgeıiniń qaýip­sizdigi qashanda ózekti másele. Osyǵan oraı Ortalyq kommýnıkasııalar qyzmetinde Ishki ister mınıstriniń orynbasary Iý.Ilın­niń qatysýymen «QR IIM sel qaýpin azaıtý boıynsha jumysy týraly» taqy­ry­bynda brıfıng ótip, onda seldiń al­dyn alýǵa qatysty málimetter ortaǵa salyndy. Mınıstrdiń orynbasary IIM-ge qaras­ty Tótenshe jaǵdaılar komıtetiniń «Qazseldenqorǵaý» MM muzdaq kólderge baqylaý júrgizgendigin erekshe atap ketti. Sonyń nátıjesinde Almaty, Jambyl, Ońtústik Qazaqstan jáne Shyǵys Qazaqstan oblystarynda 694 muzdaq jáne shógindi kólder anyqtalypty. Apat oryn ala qalǵan jaǵdaıda onyń aldyn alý úshin qutqarý arnalary salynyp, taý bókteri boıyna aýyr tehnıkalar: ekskavator, syrǵysh jáne ózge de tehnıka túrleri tartylǵany da ataldy. Aýyr tehnıkalar avıasııa kómegimen jetkizilipti. Sondaı-aq, saǵatyna 400 tekshe metrdi quraıtyn tereńdik sorǵylarymen sý tartý jumystary júrgizilgen. Bunyń syrtynda sýdy aǵyzýǵa arnalǵan arnalar kólemi 11 myń tekshe metrge deıin jet­ken. Iý.Ilınniń sózinen málim bol­ǵanyndaı, ózen arnalarynyń sel qaýpi bar ýchaskelerine, muzdaq keshenderiniń jaı-kúıine aǵymdaǵy jyldyń basynan beri 2 100 jerústi, 9 aerovızýaldy tekserý júrgizilgen jáne 31 avıa jumysy jasalǵan. Osylaısha sel aǵyndary jaǵdaıyn boljaý jáne olarǵa ýaqytyly den qoıý máseleleri óz sheshimderin tapqan. Qoryta aıtqanda, tek «Qazsel­den­qor­ǵaý» MM-niń 150-den astam adamnan quralǵan brıgadasy Almaty oblysynda tórt aı boıy bıiktigi shamamen 3500 metr taýdaǵy ártúrli sel qaýpi bar ýchaskelerde keshendi jumys istegen. Al respýb­lıka boıynsha ótken sel qaýipti kezeńinde shamamen 400 adam jumyldyrylypty. Asqar TURAPBAIULY, «Egemen Qazaqstan»