Startaptar saıysy márege jaqyndady

27 qazan kúni Táýelsizdik saraıynda balama energetıka men «jasyl ekonomıka» salasyna qatysty eń úzdik 100 startap jurtshylyq nazaryna usynylmaq. Osy halyqaralyq startaptar saıysynda 100 jobanyń ishinen sýyrylyp shyqqan 30 joba EKSPO-2017 kórmesinde pavılondarǵa qoıylady. Bul týraly keshe Ortalyq kommýnıkasııalar qyzmetinde ótken brıfıngte aıtyldy. Energetıka mınıstrliginiń qol­daýymen «Munaı jáne gaz aqpa­rat­tyq qoldaý ortalyǵy» AQ júzege asyryp jatqan NEWENERGY global startap fest halyqaralyq baıqaýyna AQSh, Qytaı, Ulybrıtanııa, Germanııa, Fran­­sııa, Avstrııa, Nıderland, Ita­­lııa, Túrkııa, Úndistan syndy álem­niń 36 elinen 800-ge jýyq startap usy­nylǵan. Kremnıı alqabynyń, Tel-Avıv ýnıversıtetiniń, BR ener­getıkalyq kompanııasynyń ókil­derinen, sondaı-aq, qazaqstandyq energetık mamandardan, ǵalymdardan jasaqtalǵan halyqaralyq qazylar osy 800 jobanyń ishinen úzdik júz­dikti iriktep alypty. Endi Táýelsizdik saraıynda ótetin aqtyq saıysta osy júzdiktiń ishinen otyzy irikteledi. «Munaı jáne gaz aqparattyq taldaý ortalyǵy» AQ bas dırek­tory­nyń mindetin atqarýshy Asqar Munaranyń aıtýynsha, sharanyń basty maq­saty – jańǵyrtylmaly energııa kóz­derin tabý, «jasyl eko­nomıka» teh­no­logııalarynyń jeti­lýine at salysý. – Birinshiden, bul baıqaý arqyly elimizdiń energetıka salasyna úles qosýǵa tyrystyq. Ekinshi maqsatymyz – keler jyly elordada ótetin EKSPO-2017 halyqaralyq kórmesin halyqaralyq arenada nasıhattaý, tanymaldyǵyn arttyrý. Sondaı-aq, osy arqyly elimizde ınnovasııanyń jáne startap mádenıettiń damýyna yqpal etemiz degen úmitimiz bar. Mundaı shara Qazaqstanda ǵana emes, Eýrazııa kóleminde birinshi ret ótip jatyr. Startap baıqaýlar kóp, árıne. Biraq tek qana energetıka salasynda 800 jańa jobany bir jerge shoǵyrlandyrý buryn-sońdy bolmaǵan, – deıdi ol. Asqar Munara aıtyp ótken­deı, shıkizat baǵasy túsken saıyn, balama energııa kózderine degen suranys ta arta beredi. Tipti, kómirsýtegi baǵasynyń quldy­raýyna áser etip jatqan fak­tor­lardyń biri osy jańǵyrmaly energııa alý tehnologııasynyń jetilýi deýge de bolady. Demek, Qazaqstan aldaǵy ýaqytta óziniń ener­getıkalyq qaýipsizdigin, ekolo­gııasyn saqtaý úshin jańǵyr­maly energııa kózderine ıek artýdy úırenýge tıis. Baıqaýǵa usynylǵan startap joba­larǵa toqtalar bolsaq, olardyń basym kópshiligi jań­ǵyrmaly jáne balama qýat kózderi salasyndaǵy jobalardy júzege asyratyn kompanııalardan kelipti. Sondaı-aq, «aqyldy qala» jáne turaqty ınfraqurylym qalyptastyrý, energııa jáne ekologııa, jańa energııa kózderi, zııandy resýrstardy tıimdi tuty­ný syndy kategorııalar boıynsha usynylǵan jobalar kóp eken. Jasyratyny joq, qoǵamda star­tap­tardyń paıdasyna qatysty kúmándi oılarǵa jete­leıtin pikirlerdiń aıtylyp júr­geni de ras. Máselen, júzdegen star­tap jobalardyń arasynan birdi-ekilisi ǵana is júzine asyp, qalǵa­ny shyǵynǵa ushyratýy múmkin. Bul damyǵan elderde, star­tap jobalar suranysqa ıe memle­ket­terdiń ózinde jıi kezdesetin qubylys. Alaıda, NEWENERGY global startap fest festı­valiniń jóni basqa. Birin­shi­den, álemniń ondaǵan eliniń óner­tap­qyshtaryn tartý arqyly joba óz mıs­sııasynyń bir bóligin oryndady deýge bolady. Ekinshiden, joba­ǵa mem­lekettik bıýdjetten qa­rajat jum­salmaıdy. Star­tap jobalardyń baıqaýyn tolyq­taı «ERG S.A.R.L» jáne «Jupiter Energy» kompanııasy qarjylandyrady. Arnur ASQAR, «Egemen Qazaqstan»