Salafızmdi nasıhattaýǵa tosqaýyl qoıamyz - Ermekbaev

Búgin Din isteri jáne azamattyq qoǵam mınıstri Nurlan Ermekbaev Ortalyq kommýnıkasııalar qyzmetinde brıfıng ótkizip, ekstermızmmen kúres máselesi týraly birqatar mańyzdy málimdeme jasady. Sonymen qatar ol salafızm aǵymyna qatysty pozısııasyn da ashyq aıtty. Mınıstrdiń aıtýynsha, salafızm – Qazaqstan qoǵamy úshin jat, biraq uıym emes, aǵym bolǵandyqtan ony zańdyq jolmen tyıa almaımyz. Biz Ermekbaevtyń sózderinen birneshe mańyzdy sıtata berip otyrmyz.   Qazaqstan úshin salafızm qabyldaýǵa kelmeıtin, destrýktıvti aǵym dep sanaımyz. Onyń syrttan kelgen ıdeologııa ekenin aıtýymyz kerek. Oǵan qarsy azamattardyń sany kóbeıý ústinde. Qazaqstan qoǵamy jalpy alǵanda radıkalımzge aparatyn bóten senimge teris kózqaras ustanyp otyr. Búginde salafızm jolyna túsken adamdar sany azaıǵany baıqalady. Jáne Qazaqstanda olardyń uıymdasqan qurylymy joq. Biz salafızm ıdeologııasyn nasıhattaıtyn ınternet-saıttardyń, ádebıettiń taralýyna tosqaýyl qoıatyn bolamyz. Zańdyq turǵydan tyıym salýsyz-aq Qazaqstan qoǵamynyń bul aǵymnyń etek jaıýyna jol bermeýge sana-sezimi jetedi. Qazaqstanda 23 terrorlyq jáne ekstremıstik uıymdarǵa tyıym salynǵan. Alaıda, salafızm uıym emes, ol – dinı aǵym, kózqarastar júıesi. Sharıǵatpen ómir súretin keıbir elderde salafızmge jaqyn dinı aǵymdar dástúrli senim retinde qabyldanýy múmkin. Al Qazaqstanǵa keler bolsaq, qazirgi zamannyń teologtary salafızmniń biz úshin destrýktıvti ekenin aıtady. Salafızm jolyna túskender óz ıdeıalaryn ulttyq dástúrden, mádenı-rýhanı qundylyqtardan joǵary qoıady. Olardyń oıynsha, eń ádil qoǵam – qatań dinı prınsıpter negizinde qurylǵan memleket. Biraq ózderi muny ashyq aıtpaıdy. Qazirgi kezde salafızm ıdeıalary ıslam álemindegi bedeldi tulǵalar, ozyq oıly ıslam oıshyldary tarapynan synǵa ushyraýda. Din salasyndaǵy jumystardy úılestirý úshin Úkimet janynan vedomstvoaralyq komıssııa qurylady. Osy oraıda mınıstrlik dindi teris maqsattarǵa paıdalanýǵa umtylatyn kez kelgen áreketke jol bermeý úshin barlyq sharalardy qabyldaıdy. Dinı ekstremızm men terrorızmniń aldyn alý jumystary negizgi 2 baǵytta – jalpy profılaktıka jáne maqsatty reabılıtasııalaý jumystary arqyly júretin bolady. Jalpy profılaktıka qoǵamda dinı ekstremıstik ıdeologııaǵa qarsy ahýal qalyptastyrýdy, dinge qyzyǵýshylyq tanytatyn turǵyndardyń saýatyn kóterýdi kózdeıtin bolady.  Maqsatty reabılıtasııa ekstremıstik aǵymdarǵa ergen adamdardy teologııalyq turǵydan dástúrli senimge qaıtarý maqsatynda jeke jumystar júrgizý arqyly iske asady. Bul baǵytta kolonııalarda jazalaryn óteýshilerge erekshe nazar aýdarylady.