Ońtústik Qazaqstan halqy 25 jylda 1 mıllıonǵa ósti

Ońtústik Qazaqstan oblysynyń xalqy táýelsizdik jyldary 1 mıllıon adamǵa ósti. Bul týraly búgin Astanada Ortalyq kommýnıkasııalar qyzmetinde ótken baspasóz máslıxatynda Ońtústik Qazaqstan oblysy ákiminiń orynbasary Ulasbek Sátibekov málim etti. «Eger táýelsizdiktiń bastapqy jyldarynda 1,8 mıllıon xalyq bolsa, búgingi tańda 2,8 mıllıonǵa jetti. Iаǵnı osy táýelsizdik jyldarynda xalyqtyń sany 1 mıllıonǵa ósip otyr», - dep atap ótti ol. Sonymen qatar onyń aıtýynsha, áleýmettik salada qyrýar jumystar atqaryldy. Atap aıtqanda, osy jyldar ishinde 1 491 balabaqsha,  444 jańa mektep, 347 densaýlyq saqtaý nysandary salyndy. «Nátıjesinde bizde 17 bilim oshaǵynyń máselesi sheshildi. Táýelsizdiktiń 25 jyldyq mereıtoıy aıasynda Ońtústik Qazaqstan oblysy 25 bilim oshaǵyn bıyl 1 qyrkúıek kúni tartý etti. Sondaı-aq shırek ǵasyrda oblysta 8,9 mıllıon sharshy metr turǵyn úı paıdalanýǵa berilip, 100 myńnan astam adam baspanaly boldy», - deıdi ákim orynbasary. Táýelsizdik jyldary OQO-da jumyssyzdyq deńgeıi 14,3 paıyzdan 5,2 paıyzǵa deıin tómendep, jumyspen qamtylǵan xalyqtyń sany 60 paıyzdan asqan. «Jalpy, osy táýelsizdik jyldarynda, ózderińiz bilesizder, alǵashqy jyldarda qıyn boldy, mektep salmaq túgili solardy aǵymdaǵy jóndeýden ótkizý máselesi qıyndaǵan jaǵdaı bolatyn. Al búgingi kúni, jańa atap ótkenimdeı, Ońtústik Qazaqstan oblysynda 444 jańadan mektep salynǵan, buǵan Memleket basshysynyń «100 mektep, 100 aýrýxana» baǵdarlamasy da úlken qoldaý boldy», - dep túıdi oıyn U. Sátibaev.