Mınıstrlik aıyqtyrǵyshtar sanyn kóbeıtýdi kózdeıdi

«Egemen Qazaqstan» gazetiniń 8 kúngi sanynda Aleksandr Tasbolatovtyń «Abaılańyz... aıyqtyrǵysh!» taqyrybymen materıal jarııalanǵan bolatyn. Onda memleket tarapynan ishimdikke qarsy kúrestiń júrgizýdiń túrli amal-áreketteri tıisti zańnamalyq negizde jasalyp jatqanymen, «baıaǵy jartas – sol jartas» kúıinde qalyp otyrǵany jaıynda jazylǵan bolatyn. Endi mine, osy máselege baılanysty IIM Memlekettik til jáne aqparat departamentiniń dırektory Almas Sadýbaev medısınalyq aıyqtyrǵyshtarǵa qatysty arnaıy túsindirme jasady. Quzyrly organ ókili óz málimdemesinde 2010 jyly 32 medısınalyq aıyqtyrǵysh (qazirgi ýaqytta Ýaqytsha beıimdeý jáne ońaltý ortalyqtary) densaýlyq saqtaý organdarynyń quzyretine tapsyrylǵandyǵyn jáne bul rette mas adamdardy tıisti oryndarǵa jetkizý fýnksııasy ishki ister organdarynyń quzyretinde qaldyrylǵandyǵyn aıtady. Sonymen qatar, ol: «el ishinde osyndaı 29 ortalyq jumys isteıdi, olarda barlyǵy 598 tósek-oryn bolǵanymen, qajettilik tolyq qamtamasyz etilmeıdi. Biz qoldanystaǵy ortalyqtardy 240 tósek-orynǵa keńeıtýdi usynamyz jáne 595 tósek-oryndy qamtıtyn qosymsha taǵy da osyndaı 38 ortalyq ashýdy usynyp otyrmyz», – dedi A.Sadýbaev. Onyń aıtýynsha, mundaı mekemeler barlyq aýdan ortalyqtarynda bolǵan. Qazirgi ýaqytta olar tek qalalar men oblys ortalyqtarynda jumys isteıdi. IIM mundaı ortalyqtarmen elimizdiń barlyq aýdandaryn qamtýdy kózdep otyrǵan joq. Al keıbir jekelegen úsh-tórt aýdan úshin bir ortalyq bólse, jetkilikti bolady dep sanaıdy. Sondaı-aq IIM-niń ókili ózge problemaǵa da toqtaldy. Qazirgi qoldanystaǵy zańnamaǵa sáıkes, ákimshilik qamaýǵa alý týraly sot sheshimine deıin polısııa maskúnemdi úsh saǵat qana ustaı alady. «Mysalǵa, kúıeýi úıinde janjal shyǵarsa, áıeli polısııa shaqyrady. Úsh saǵat ótkennen keıin ony úıine jiberedi. Odan ári ol mastyǵynan aıyqpastan otbasynyń berekesin qashyrýy da múmkin. Sondyqtan mas kúıindegi adamdy májbúrli emdeýge resimdeý jáne jiberý rásimderin ózgertý jóninde usynystar ázirleýdemiz», – deıdi A.Sadýbaev. Aıta keteıik, qazirgi ýaqytta mas kúıde jasalǵan qylmystyq quqyq buzýshylyqtar sany sharyqtaý shegine jetip tur. Aǵymdaǵy jyldyń 9 aıynda mas kúıde 14 myńnan astam qylmystyq quqyq buzýshylyqtar jasalǵan bolsa, ótken jyldyń 12 aıynda bul kórsetkish 12,7 myńdy quraǵan. Sonymen qatar, mas kúıde quqyqbuzýshylyq jasaǵany úshin ustalǵan adamdar sany da kún sanap artyp kele jatqanyn statıstıkalyq derekter rastaıdy.   Nurlybek Dosybaı, «Egemen Qazaqstan»