Moıynqumda nesıe alǵan 25-tiń eshqaısysy jumys ornyn ashpaǵan

Aýdan ákimine júktelgen mindet kóp. Biraq, basty mindeti – halyqqa qyzmet etý, eldiń jaǵdaıyn jasaý ekenin umytpaýy qajet. Jurttyń jaǵdaıyn jasaý degende, eń aldymen, jumyspen qamtý máselesi eske túsedi. Iаǵnı, ákimniń negizgi sharýasy osy jumyssyzdyqty azaıtýmen astasyp jatýy tıis. «Aýdanda qansha jumyssyz adam bar, bıyl qansha jumys orny ashylady?» degen málimetter kóbeıtý kestesi sııaqty sanasynda jattalyp turýy kerek emes pe? Joq, Áýlıeata óńiri ákimderinen  ondaı «ábjildik» kútý ábestik eken... Qaıbir kúngi jıynda Jambyl oblysynyń ákimi Kárim Kókirekbaev aýdan basshylarynan jumyspen qamtý týraly málimetterdi suraǵanda oıpyrmaı, durys jaýap bergen bireýi bolmady. Birinshiden, bilmeıdi, ekinshiden, bilgeniniń ózi sıfrlardy shatastyryp, oıran-botqasyn shyǵardy. Jalpy alǵanda, «Jumyspen qamtýdyń jol kartasy-2020» baǵdarlamasy aıasynda Jambyl oblysynda kóptegen oń  tirlikter atqarylýda. Máselen, osy baǵdarlamanyń ekinshi baǵyty aıasynda bıyl 831 adamdy jumyspen qamtý úshin barlyǵy 3239,4 mln teńge qarastyrylǵan. 372 adam arnaıy oqýdan ótip, 414 adamǵa 1119,5 mln teńgeniń shaǵyn nesıesi berilgen. Osy nesıe alǵandar 280 jumys oryndaryn ashqan. Áıtse de  Moıynqumda nesıe alǵan 25 adamnyń birde-biri eshqandaı jumys oryndaryn ashpapty. Sol sııaqty Merki aýdanynda 53 nesıe alýshy tek 7 jumys ornyn ǵana, Talastaǵy 29 adam 9 jumys ornyn, Jýalydaǵy 40 adam 22 jumys ornyn, Shýda nesıe alǵan 37 adam 22 jumys ornyn ǵana ashqan. Iаǵnı, «Bir nesıe alýshy keminde bir qosymsha jumys ornyn ashýy tıis» degen talap tolyq oryndalmady. Aýdan ákimderi bul baǵyttaǵy jumystardy qatań baqylaýǵa alyp, eń aldymen nesıe alýshylardyń salyq organdarynda tirkelýin jáne árbir nesıe alýshyda keminde qosymsha bir jumys ornynyń ashylýyn qamtamasyz etýleri qajet edi. Biraq bul máseleni qada­ǵa­lamaq túgili qansha jumyssyz adam tir­kelgenin jattaı almaı júrgen jambyldyq ákimder tym jaıbaraqat. Sol sııaqty baǵdarlamanyń  úshinshi  baǵyty boıyn­sha  kásiptik  oqytýmen 271 adam qamtylyp, 270-i jumysqa ornalasty. Jumysqa orna­lasqandardyń ishinen 228-iniń nemese 84,4 paıyzynyń mindetti zeınetaqy jarnalary aýdarylǵan. Alaıda, bul kórsetkish Moıynqum aýdanynda nebári 12,5, Shý aýdanynda 20,8 paıyzdy ǵana qurap otyr. Jalpy alǵanda, jumys istep júrgenderdiń zeınetaqy jarnalaryn aýdarý bir aqyret pe dep qaldym. Mine, qarańyz, jastar praktıkasyna joldanǵan 44 túlektiń, al áleýmettik jumys oryndaryna joldanǵan 23 adamnyń 10 paıyzdyq zeınetaqy jarnalary aýdarylmaǵan. – Oblysta iske asyrylyp jatqan ındýstrııalyq-ınnovasııalyq damý memlekettik baǵdarlamasy boıynsha ashylǵan jumys oryndaryna jospar boıynsha 195 adam ornalasýy kerek bolsa, búgingi kúni 85  adam, agrobıznes salasy boıynsha josparlanǵan 344-tiń ornyna 151 adam ǵana jumysqa ornalasqan, – deıdi Jambyl oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Jorabek Baýbekov. «Qazaqstanda jumyssyzdyq degen bolmaýy kerek. Bul úshin barlyq múmkin­dikter bar», degen bolatyn Elbasy N.Nazarbaev. Shynynda múmkindik mol. Tek yqylas joq. Al qalaı aıtsaq ta bul oblystaǵy jaǵdaı tómen. Oralhan DÁÝIT, «Egemen Qazaqstan» Jambyl oblysy