Jańarǵan jol ýaqytty únemdeıdi

Premer-Mınıstrdiń birinshi orynbasary Asqar Mamın jańartylǵan Astana – Temirtaý tas jolynyń boıynda kóshpeli keńes ótkizdi. Bul joba memlekettik «Nurly jol» baǵdarlamasynyń aıasynda júzege asyrylýda. «Ortalyq – Ońtústik» avtomobıl dańǵylynyń bir bóligi sanalatyn Astana – Temirtaý tas jolynyń jalpy uzaqtyǵy – 171 shaqyrym. Osy joldy keńeıtý jumystary qazirgi ýaqytta aıaqtalýǵa jaqyn. Temirtaýdan Astanaǵa deıingi tórt jolaqty jol jyl sońyna deıin tolyǵymen iske qosylmaq. Sol kezde eki aralyqta avtokólikter qos qatarmen erkin júıtkıtin bolady. Tehnıkalyq turǵydan jańa joldyń sapasy men eni saǵatyna 140 shaqyrym jyldamdyqpen qozǵalýǵa múmkindik beredi. Iаǵnı, Astanadan Temirtaýǵa nebary bir jarym saǵatta erkin jetýge bolady. Joldy jańartý nátıjesinde, sonymen qatar, bul aralyqtan táýligine 28 myń avtomobılge deıin óte alady. Avtojol boıynda júrgizýshilerge qysy-jazy jaǵdaı jasaý úshin Arshaly men Oshaǵandy aýyldarynyń tusynan servıstik qyzmet ortalyqtary salynbaq. Joldy jańartý men jetildirý jumystaryna 2 myńnan astam adam, 1200 tehnıka jumyldyryldy. Paıda­la­nylǵan materıaldardyń 85 paıyzy – Qazaqstanda jasalǵan ónimder. Premer-Mınıstrdiń birinshi oryn­basary Asqar Mamın keńesti qory­tyn­dylaı kele, jumys sapasyn arttyrý, avtojoldy ýaqytynda paıdalanýǵa berý, qaýipsizdik máseleleri boıynsha birqatar tapsyrma berdi. Qaırat ÁBILDINOV, «Egemen Qazaqstan»   QARAǴANDY