Memlekettik qyzmetti retteıtin zań jobasy maquldandy

Búgin QR Parlamenti Májilisiniń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine memlekettik qyzmet máseleleri boıynsha ózgerister men tolyqtyrýlar engizý týraly» zań jobasyn maquldady, dep habarlaıdy QazAqparat. «Zań jobasy memlekettik qyzmetke túsý tártibin jetildirip, quqyq qorǵaý jáne memlekettik qyzmet standarttaryn jaqyndatady. Ázirleý barysynda ol qoǵam ókilderimen keńinen talqylandy. Birinshiden, memlekettik qyzmet kadrlaryn tolyqtyrý tártibi qaıta qaralady. Qazirgi ýaqytta bos oryndar toltyrý úsh kezeńnen turatyn konkýrs arqyly júzege asady. Eń aldymen, úmitkerler bos laýazymdary bar memlekettik organ qyzmetkerleri arasynan irikteledi. Eger olardyń ishinen úmitker bolmaǵan jaǵdaıda, irikteý barlyq organ qyzmetkerleri arasynda jalǵastyrylady. Osy kezeńde de jeńimpaz anyqtalmasa, onda jalpy konkýrs jarııalanady»,-dedi QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy Qaırat Qojamjarov zań jobasy boıynsha baıandama jasaý barysynda. Onyń sózine qaraǵanda, jyl basynan qoldanysqa engen zańdy taldaý kórsetkendeı, jalpy konkýrsqa qatysýlar sany eki esedeı kóp bolyp otyr. Sondyqtan bos laýazymdardyń 65 paıyzy osy kezeńniń qorytyndysy boıynsha toltyrylýda. Qazirgi tańda konkýrstar qatań túrde úsh kezekpen ótkizilýde. Sol sebepten bos laýazymdarǵa úmitkerlerdi irikteý 16-dan 52 jumys kúnine deıin ýaqyt alýda. Bul jaǵdaı óz kezeginde kadr tapshylyǵyna alyp kelýde, ásirese, aýyldyq jáne aýdandyq deńgeılerde kadr jetispeýshiligi anyq baıqalýda. «Ekinshi ishki jáne jalpy konkýrstardy biriktirý olardy tezirek jabýǵa múmkindik beredi. Bos oryndar toltyrý máselesin tezdetýmen qatar, merıtokratııa qaǵıdalarynyń saqtalaýyn baqylaıtyn bolamyz. Sol sebepti ekinshi ishki konkýrstar ótkizilmeıtin jaǵdaılar zańǵa táýeldi quqyqtyq aktilerinde anyqtalatyn bolady. Olar sırek kezdesetin mamandyqtar jáne basshylyq emes laýazymdar. Kerisinshe, barlyq basshylyq laýazymdarǵa ekinshi konkýrsty ótkizý mindetti túrde saqtalady. Bundaı tásil tómennen joǵaryǵa ósýdi, ıaǵnı mansaptyq qaǵıdanyń talaptaryn oryndaýdy tolyq qamtamasyz etedi»,-dedi ol.