Baǵaǵa baılanysty baǵaly bastama

Oblystyq máslıhattyń depýtaty Talǵat Salfıkovtyń el Táýelsizdiginiń 25 jyldyǵyna oraı ózi basshylyq etetin «Anvar» JShS-na qatysty sýpermarketterde áleýmettik mańyzy bar 20 taýardyń baǵasyn jańa jylǵa deıin kótermeý týraly bastamasyn aqtóbelik kásipkerler biraýyzdan qoldady. Bıznestegi tabystaryn Táýelsizdiktiń 25 jyldyǵymen baılanystyratyn aqtóbelik kásipkerler osy jyldar ishinde óz isteriniń aıaqtan tik turyp ketýine memleketten meılinshe qoldaý bolǵanyn, ásirese, Elbasy Nursultan Nazarbaevtyń syndarly saıasatynyń arqasynda jemisti nátıjelerge qol jetkizip júrgenderin aıqyn sezinetindikterin kórsetti. Qazir aımaqtaǵy 115-ke jýyq mádenı, sporttyq nysandar men bazarlar, saýda úıleriniń basshylary osy aksııaǵa qatysýda. Ásirese, bul aksııa halyqtyń áleýmettik jaǵynan az qamtylǵan toptaryn, zeınetkerlerdi qoldaý maqsatynda jasalyp otyrǵanyn olar bek túsinedi. Biz Táýelsizdik merekesi qurmetine aqtóbelikterge tartý retinde azyq-túlik baǵasymen qosa ózge de taýarlardyń baǵasyna jeńildik berýge bastama kótergen depýtat Talǵat Salfıkovtyń ıeligindegi «Anvar» sýpermarketinde boldyq. «Anvar» JShS dırektory Baqytjan Kızaev saýda núktesinde áleýmettik mańyzy bar 20 taýardyń baǵasy 1 qańtarǵa deıin kóterilmeıtinin aıtty. Rasynda da, sórelerge jınalǵan azyq-túliktermen qosa, sharýashylyq buıymdaryna jeńildetilgen baǵa qoıylǵan. Kásipkerler tarapynan baǵaǵa jeńildikter jasalǵaly saýda núktelerine kelýshilerdiń sany burynǵydan 20 paıyzǵa artqan. Mereke kúnderi satyp alýshylardyń qatary budan da kóbeıedi dep kútilýde. Munda da 300-den astam túrli taýar baǵasyna 20-40 paıyz aralyǵynda jeńildikter jasalǵan. Seriktestik basshysy baǵany ósirmeý týraly sheshim men jeńildikter el Táýelsizdiginiń 25 jyldyq mereıtoıyn merekeleýge qosqan úlesteri ekenin, bul bastama aqtóbelikterdiń kóńil kúıin kóterý, qarajattaryn únemdep, merekeni sezinýine yqpal etý maqsatynda jasalyp otyrǵanyn atap ótti. Baǵaly bastamany qyzý qoldaǵan «Dına» gıpermarketiniń basshylary da óz tarapynan birqatar jeńildikter qarastyrǵan eken. «Dına» gıpermarketiniń dırektory Aınagúl Nazarbaevanyń aıtýynsha, jyl sońyna deıin áleýmettik mańyzǵa ıe 33 túrli azyq-túliktiń 20 túri boıynsha baǵa turaqtandyrylady. Sondaı-aq, munymen qosa otandyq jáne sheteldik 500-ge jýyq taýar baǵasyna 20-50 paıyz aralyǵynda jeńildikter jasalyp otyr. Aqtóbelikter arzandatylǵan baǵamen turǵan taýarlardy 1 qarashadan bastap satyp alýda. Bul aksııa keler jyldyń 15 qańtaryna deıin jalǵasady. "Biz el Táýelsizdiginiń 25 jyldyǵyna tek taýarlarǵa baǵany tómendetýmen ǵana shektelmeı, merekeni laıyqty qarsy alý úshin eki iri jobamyzdy iske asyrǵaly otyrmyz. Onyń biri – kólik-logıstıkalyq ortalyq. Bul keshen 16 jeltoqsan kúni saltanatty jaǵdaıda ashylady. Ekinshi joba — «Sheber» qurylys gıpermarketi. Bul nysan Qazaqstan Respblıkasynyń Tuńǵysh Prezıdenti kúni qarsańynda ashylady. Sol sııaqty, jańa jylǵa deıin Aqtóbe qalasynyń eki aýdanynan «Dına» saýda jelisin ashýdy josparlap otyrmyz. «Bolashaq» shaǵyn aýdany men Jańaqonys aýylynda jańa sýpermarketter iske qosylady", dedi ol sóz arasynda. Sonymen qatar, saýda oryndarynda eń tómengi zeınetaqy alatyn 4 myńǵa tarta zeınetkerge áleýmettik paketter taratylmaq. Oblys ortalyǵyndaǵy «101-atqyshtar dıvızııasy» kóshesi boıyndaǵy «Vanıl» kondıterlik dúkeniniń basshysy Záýresh Erkinalına qala turǵyndary úshin 1 qarasha men 16 jeltoqsan aralyǵynda «Vanıl» ónimderi 10 paıyz jeńildikpen satylyp jatqanyn aıtty. Qazir Aqtóbe qalasyndaǵy «Vanıldiń» úsh dúkeninde ártúrli torttar men shokoladtan jasalǵan ónimderge 10 paıyz jeńildik qarastyrylǵan. Sol sııaqty, unnan jasalǵan ónimder búginde 25 paıyz jeńildikpen satylyp jatyr. Táýelsizdikke arnalǵan aksııaǵa Aqtóbe qalasynyń «Batys-2» shaǵyn aýdanynda ornalasqan «Dostyq» sý sporty túrleri boıynsha oblystyq balalar men jasóspirimder sport mektebi de atsalysýda. – Qazaqstan Respýblıkasy Táýelsizdiginiń 25 jyldyǵyna oraı 2016 jyldyń 1 qarashasynan 2017 jyldyń 1 qańtaryna deıin kúndizgi saǵat 12.00-14.00 aralyǵynda Uly Otan soǵysynyń ardagerlerine, múgedekterge, zeınetkerlerge basseınge, jattyǵý zalyna tegin kirý jáne stýdentterge, kóp balaly otbasylar úshin 50 paıyz jeńildik qarastyryldy. Aksııa aıasynda qala turǵyndary úshin kúndizgi saǵat 12.00-den 14.00-ge deıin jáne keshki saǵat 18.00 men 21.00 aralyǵynda ortalyqta basseıinge kelip, jattyǵýlaryna bolady. Qalǵan ýaqyt balalarǵa arnalǵan. Sport kesheninde 15 jasqa deıingi balalarǵa osy qyzmet túrleri baǵasynyń 50 paıyzy ǵana alynady, – deıdi sport mektebi dırektorynyń orynbasary Lázzat Bekturlıeva. Qazir bul sport mektebine ártúrli toptaǵy 15 múgedek pen 50-ge tarta zeınetker turaqty kelip, jattyǵady. Mektepte júzý, sınhrondy júzý, sý doby toptary boıynsha 650-den astam bala jattyǵady. Táýelsizdik kúni qarsańynda taýarlar men kórsetiletin qyzmetterge merekelik jeńildikter qoldanyp otyrǵan nysandardyń biri – «Batys-2» shaǵyn aýdanynda ornalasqan «Hammer» sport kesheni. Táýelsizdik merekesi qurmetine ardagerler men zeınetkerler úshin munda qyzmettiń qaı túri de tegin kórsetiledi. Sport túrleri boıynsha edáýir jeńildikter qarastyrylǵan. – Qarasha aıynan bastap sport súıer qaýymǵa jeńildikter jasalyp otyr. Ásirese, jattyǵý zaly, basseın, taekvondo syndy ózge de sport túrleri úshin aıyna tólenetin qarajatqa jeńildikter qarastyryldy. Bul shara 16 jeltoqsanǵa deıin jalǵasady. Bir aıta keterligi, Uly Otan soǵysy ardagerleri men zeınetkerlerge keste boıynsha aqysyz qyzmet kórsetemiz, dedi «Hammer» sport kesheniniń kreatıvtik menedjeri Temirlan Týlegýlov bizben áńgimesinde. Merekelik aksııaǵa «Aqbóbek» kompanııasy da qoldaý tanytyp, birqatar qyzmet túrlerine jeńildik baǵasyn usynyp otyr. «Aqbóbek» kompanııasy bas dırektorynyń orynbasary Shamshyraq Saılaǵıeva Táýelsizdik kúnine oraı kompanııada barlyq qosymsha qyzmetterge 15 paıyz jeńildik jasalyp otyrǵanyn jetkizdi. Iаǵnı, mundaǵy úıirmeler medısınalyq, ıntellektýaldy, sporttyq jáne óner baǵyttaryna bólinedi. Qazir úıirmege 626 bala qatysady. Úıirmeniń baǵasy 4-15 myń teńge aralyǵynda. Aksııaǵa oraı 1 qarasha men 31 jeltoqsan aralyǵynda barlyq úıirme baǵasyna 15 paıyz jeńildik jasalady. Eger ata-analar úıirme baǵasyn aldyn-ala tólep qoısa, onda artyq tólegen qarajaty qaıtarylady. Oblysta 2013 jyldan beri halyqqa medısınalyq kómek kórsetip kele jatqan «Darý klınıkasy» medısınalyq ońaltý ortalyǵynda da aımaq turǵyndary úshin merekelik aksııa uıymdastyrylýda. Klınıkada keńes alý baǵasy – 3000 teńge. Jańa jylǵa deıin turǵyndar munda 15 paıyz jeńildikpen medısınalyq qyzmet túrlerin ala alady. – Elimizdiń Táýelsizdik alýynyń 25 jyldyq mereıtoıyna oraı klınıkadaǵy barlyq mamannan keńes alý qyzmetiniń aqysy 15 paıyzǵa tómendetildi. Bul – eresekter úshin de, balalarǵa da kórsetilgen jeńildik. Búgingi kúni «Darý» klınıkasynda bir kezeńde 200 adamǵa qyzmet kórsetiledi, – deıdi «Darý» klınıkasynyń bas dárigeri Izolda Kalandııa. Onyń aıtýynsha, zamanaýı, kóp baǵdarly klınıkada eresekter men balalar úshin medısınalyq tekseristiń barlyq túri qarastyrylǵan. Búginde dıagnostıka men emdeýdiń barlyq ádisteri, ońaltý túrleri halyqaralyq sapa standartyna saı júrgiziledi. Mine, osylaı aqtóbelik kásipkerlerdiń el Táýelsizdiginiń 25 jyldyǵyna oraı kótergen baǵaly bastamasy áriptesteri tarapynan keń qoldaý tabýda. Merekelik márttik jasaýǵa yntaly kásipkerler qatary kún ótken saıyn kóbeıe túsýde. Munyń ózi kásipkerlerdiń el Táýelsizdiginiń 25 jyldyǵyna tolymdy tartýy ǵana emes, áleýmettik jaýapkershilikti jete sezinýi deý oryndy bolmaq. Satybaldy SÁÝIRBAI, «Egemen Qazaqstan»  Aqtóbe oblysy