Bıyl Brazılııanyń Rıo-de-Janeıro qalasynda ótken Jazǵy Olımpııalyq oıyndarda boksshy Danııar Eleýsinov el namysyn abyroımen qorǵap, 69 kılo salmaq dárejesinde chempıon atandy. Danııardyń aǵasy Dáýren de sharshy alańnyń talaı ret shańyn qaǵyp júrgen saıypqyran boksshy. Ol stýdentter arasynda álem chempıony (2006), Azııa chempıonatynyń júldegeri.
Osy eki ulynyń sporttaǵy úlken jetistigi Eleýsinovter otbasynyń Astanaǵa qonys aýdarýyna sebepshi boldy.
Aǵaıyndy Eleýsinovter Batys Qazaqstan oblysy Kaztalovka aýdanynyń Qaıyńdy aýylynda dúnıege keldi. Ákeleri Marat Eleýsinov joǵary bilimdi sport mamany. Ol Qazaqstan Respýblıkasyna eńbek sińirgen jattyqtyrýshy, 20 jyldan astam ýaqyt boks ónerin óskeleń urpaqqa úıretip keledi. Isi qazaqqa tanylǵan Danııar men Dáýrenniń jattyqtyrýshysy bolýymen birge onyń birneshe shákirtteri respýblıkalyq jáne halyqaralyq dodalarda jeńimpaz atanyp, «Eren eńbegi úshin» tósbelgisine ıe boldy.
– Ákem Tálip jarty ǵasyrǵa jýyq ýaqyt muǵalim boldy. Ol jasynda qazaqsha kúrespen aınalysypty. Meniń sport mamandyǵyn tańdaǵanyma esh qarsylyq bildirgen joq. Bir jaǵynan men ákemniń ustazdyq izin jalǵastyrdym, – deıdi Marat Tálipuly.
Aýylda Marattyń eńbegi baǵalanyp, ózi bilim alǵan joǵary oqý ornynyń dene shynyqtyrý men sport fakýltetine qyzmetke shaqyrylyp, Oral qalasyna kóshedi. Sol jyldary bolashaq qazaq sportynyń eki juldyzy ákesinen qalmaı sport zalyna erip keletin. Bastapqyda qyzyǵýshylyq tanytqan balalar boıynan ákesi úlken qabilettiń jatqanyn baıqaıdy.
– Uldarymdy sportqa kásibı turǵyda daıyndadym. Kóp adam boksty tóbeles dep túsinedi. Boks – tóbeles emes, ol – óner,
- deıdi Marat Tálipuly.
Sportqa birjola betburyspen kelgen durys. Jattyqtyrýshy óz tájirıbesinde nebir talantty balalardyń arasynda kóshedegi ýaqytsha aldanyshqa elitip, jattyǵýǵa kelmeı, aqyry sporttan alystap ketkenin baıqamaı qalǵandary bolǵandyǵyn aıtty. Jasóspirimderge bul kóshedegi tóbeles emes, kásibı mamandyq ekenin aıtyp, birden salmaqty kózqaras qalyptastyrýdyń mańyzdy ekenin alǵa tartty.
– Eger uldarym sportqa qyzyqpasa, boılarynda osy ónerge degen beıimdilik pen qabilet bolmasa, olardy boksqa tárbıelemes edim,
- deıdi Marat Eleýsinov.
Eleýsinovter otbasynyń úshinshi perzenti – Dınaranyń tańdaýy – horeografııa boldy. Aǵalary sekildi aldyna qoıǵan aıqyn maqsatyna jetpeı tynbaıtyn Dınara Shara Jıenqulova atyndaǵy respýblıkalyq qazaq bı baıqaýynyń júldegeri. Ol búginde Ulttyq gvardııa án-bı ansambliniń bas solısi. Myń buralǵan bıshiniń aldynda kóptegen josparlary men shyǵarmashylyq jobalary bar.
Otbasynyń anasy Ǵalııa hanym balalarynyń bolashaǵy úshin, olardyń baby men jaǵdaıyn jasaý maqsatynda ustazdyq qyzmetinen bas tartty. Ana úshin balalardyń armanyna jetip, bıik asýlardy baǵyndyrǵany mańyzdyraq boldy. Ǵalııa Nurmuhanqyzy búginde sol sheshiminiń tekke ketpegenine kózi jetti. Ol búginde tórt nemeresi bar baqytty áje.
Baqyt Turmaǵambetova
