Ázerbaıjan basylymy "Egemen Qazaqstannyń" maqalalary týraly jazdy

Basylymda jaryq kórgen jarııalanymnan gazettiń tól oqyrmandary ǵana emes, basqa eldegiler de habardar bolyp jatqany jaqsylyqtyń nyshany emes pe! «Egemenniń» 12 qarashadaǵy sanynda «Izgi nıet shekara izdemeıdi» atty maqala jarııalanǵan bolatyn. Kaspııdiń arǵy betinen soǵan oraı taǵy bir habar jetti. «Egemen Qazaxistan» gazetinde Geıdar Alıev qorynyń qyzmeti týraly «Xoş niyyət sərhəd tanımır» («Izgi nıet shekara izdemeıdi») atty maqala jaryq kórdi» degen taqyryppen maqala Ázerbaıjan memlekettik aqparattyq agenttiginiń saıtynda. AZERTADJ menshikti tilshisi Ilaha Ahmedova ári qaraı atalǵan maqalada Ázerbaıjannyń birinshi hanymy, IýNESKO jáne ISESKO-nyń izgi nıet elshisi Mehrıban Alıeva basshylyq jasaıtyn Geıdar Alıev qory qyzmetiniń barlyq baǵyttaryna naqty taldaý jasalǵanyn jazady. «Maqalanyń Qazaqstan Respýblıkasynyń Prezıdenti Nursultan Nazarbaevtyń Geıdar Alıev qorynyń estelik dápterindegi: «Geıdar Alıevtiń esimi árqashan da halqynyń jadynda. Ol bar ǵumyryn halqynyń órkendep ósýine, eliniń qaıta jańǵyrýyna sarp etti, sol sebepti de esimi máńgilik jasaı beredi» degen jazbadan bastalatyndyǵyn jazady agenttik tilshisi. «Oqyrmandar nazaryna qor ashylǵaly bir jyl ótken soń, 2005 jyldyń mamyr aıynda Qazaqstan Respýblıkasynyń Prezıdenti Nursultan Nazarbaev Ázerbaı janǵa sapary sheńberinde Geıdar Alıev qoryna baryp, qormen tanysqan soń, estelik dápterine qazaq tilinde óz júreginen shyqqan lebizin jazyp qaldyrǵandyǵy jetkiziledi. Qorda Geıdar Alıev ómiriniń eń mańyzdy sátteri jáne Ázerbaıjan tarıhynyń tutas kezeńi týraly aýqymdy málimettermen, Ázerbaıjan memleketin qurýshy prezıdent týrasyndaǵy oı-pikirler, ol týraly jazylǵan kitaptarmen tanysqan Prezıdent N.Nazarbaev Geıdar Alıevpen ótken kezdesýlerde birge túsken fotosýretterdi de úlken qyzyǵýshylyqpen sholyp shyqty. Nursultan Nazarbaev qor prezıdenti Mehrıban Alıeva hanymǵa Qazaqstan táýelsizdiginiń sımvoly bolyp tabylatyn eskertkishtiń maketin tabys etti» delingen Azerbaıjan agenttiginiń saıtynda jarııalanǵan maqalada. Odan ári qaraı basylymnyń eldegi iri aqparat quraly ekenin de tilge tıek etedi. «Qazaqstannyń eń taralymy kóp basylymy qordyń maqsatyn jerine jetkize jazyp, onyń uly memleket qaıratkeri Geıdar Alıevtiń baı muralaryn zertteý jáne nasıhattaý maqsatynda qurylǵandyǵyna toqtalady. Qor qurylǵan kúnnen bas­tap halyqtyń ál-aýqatyna qyzmet etken iri aýqymdaǵy jobalardy júzege asyratyn izgi nıet mıssııasynyń ókili bolyp tabylatyndyǵyn atap kórsetedi». «Egemen Qazaqstanda» jarııalanǵan maqalada qor halyqtyń ulttyq-rýhanı qundylyqtarynyń saqtalýyna qoldaý kórsetýmen qatar, shet elderde Ázerbaıjandy nasıhattaý boıynsha baǵdarlamalar men jobalardy jasaıtyndyǵy jáne júzege asyratyndyǵy aıtylady» deıdi agenttik tilshisi. Osylaısha, «Egemen Qazaqstannyń» betinde «Týystyq týy» aıdary aıasynda jaryq kórgen maqala baýyrlas eldiń buqaralyq aqparat quraldarynan oryn alyp jatsa, túbi birdiń aqparat keńistiginiń de ortaq ekendigin kórsetedi. Daıyndaǵan Jaqsybaı SAMRAT, «Egemen Qazaqstan»