N.Orazalın. Oıly oqyrman oljasy

Táýelsiz Qazaqstan da 25 jasqa tolyp otyr. Egemen elimizdiń osynaý mereıtoıy týraly qanshama qoǵam qaıratkerleri, jazýshylar, ǵalymdar ártúrli taqyrypta qalam terbeýde. Solardyń barlyǵy da Qazaqstannyń 25 jyl ishinde qol jetkizgen tabystaryna qýanady, elimizdiń áleýmettik-ekonomıkalyq jaǵdaıynyń kún ótken saıyn jaqsara túskenine shúkirshilik etedi. Táýelsiz Qazaqstannyń tarıhı jylnamasy men shejiresi jyldar ótken saıyn qalyńdaı bermek. Osy oraıda el tarıhynyń qapy­syz hatqa túsýine aıryqsha múddeli bir adam bolsa, ol sózsiz – Elbasy. О́ıtkeni, táýelsiz Qazaqstannyń jańa dáýirdegi táýelsiz irgetasyn óz qolymen qalap, týyn jelbiretken Tuńǵysh Prezıdentimiz úshin Qa­zaqstan tarıhynyń ár paraǵy ys­tyq ári qymbat. Endeshe, taıaýda ǵana Elbasy qalamynan týǵan «Uly dala ulaǵattary» atty jańa týyndy da ár qazaqstandyq úshin asa qundy olja bolary shúbásiz. Qazaqstan Táýelsizdiginiń 25 jyldyq torqaly toıyna tamasha tartý bolǵan osynaý eńbekti tebi­renbeı, tolqymaı oqý múmkin emes. Atalmysh týyndy «Týǵan elim – tiregim», «El men er jáne jer», «Táý­elsizdiktiń tal besigi», «Saıasat saltanaty», «Týǵan tildiń tuǵyry», «Din men dástúr», «Qıyrdan kelse qan­dastar», «О́nerdiń órisi keń», «Otbasy – Otan tiregi», «Qarııa­larymyz – qazynamyz», «Mura­ty  birdiń qýaty bir» dep atalatyn on bir taraýdan turady. Taqy­ryp­tar aıtyp turǵandaı ár taraý­dyń oqyrmanǵa oı salar orasan salmaǵy bar. О́zim qalamger bolǵandyqtan, ári qazaq rýhanııatynyń qara sha­ńy­raǵy – Qazaqstan Jazýshylar odaǵyn­da basshylyqta otyrǵan­dyqtan osy eńbektegi ádebıet, óner, til týraly Elbasy tolǵamdary meni qatty tebirentkenin aıryqsha aıtqym keledi. «Qazaq – oıshyl halyq, aqyn halyq. Sábı júreginde jelpildegen arman men úmit, qııal men oı kóki­reginde sáýlesi bar qazaq balasyn óleń ólkesine alyp keledi. Halqymyzdyń aqynjandylyǵy – urpaqtan urpaqqa jalǵasyp kele jatqan máńgilik mektep. Telegeı teńiz aýyz ádebıetiniń qaınarynan sýsyndaǵan ultymyzdyń uly tarıhyndaǵy ulaǵatty beles­ter buǵan naqty dálel. Biz tarıhyn tilmen de, dilmen de jazǵan halyqpyz», – deıdi Prezıdent osy eńbeginiń «Týǵan elim – tiregim» degen alǵashqy taraýynda. Odan ári óz oıyn Elbasy: «Uly Dalamyz keıde ashyq jatqan jyr kitaby sııaqty bolyp ta kórinip ketedi. Jadyńdy jańǵyrtyp, durystap, jaqsylap oqı alsań, jan dúnıeń jadyrap, baǵzy babalardyń baıan­dy únin, tarıhtyń tylsym syryn, týǵan elińniń máńgilik jyryn qaıyra estip, baıtaq álemge qulashyńdy keń jaıǵandaı bolasyń», – dep keńinen taratady. Osyndaı júrek qozǵaıtyn sóz­derdi oqı otyryp, Elbasy­myzdyń sóz ónerin, óleń dep atalatyn kıe­li qasıetti barynsha qasterlep, qadir­leıtinin anyq ańǵarýǵa bolady. Elbasymyzdyń til týraly, dil týraly, el men jer týraly da ba­salqy tolǵamdar men parasat­ty paıymdaýlarǵa toly tujyrym­dary el erteńin oılaıtyn tuǵyrly tulǵa ǵana aıta alatyn ómir, qoǵam, zaman aqıqaty ekeni sózsiz. Halqymyzdyń rýhanı ıgiligine aınalǵaly turǵan eńbektiń «О́ner­diń órisi keń» atty taraýynda memleketimizdiń ádebı-mádenı damý belesteri jaıly sóz qozǵalady. «Memlekettiń damýy – rýhanı álemniń damýymen tikeleı sabaq­tas», – deı otyryp Prezıdent máde­nıet salasyndaǵy kúrmeýi kúrdeli keıbir máselelerdiń sheshilgen jáne sheshilmegen tustaryna zamana bıiginen kóz jiberedi. О́tken 25 jyl ishindegi ádebı-mádenı ómirimizdegi ózgerister men qazaq rýhanııatyna memleket tarapynan jasalyp jatqan qamqorlyqtarǵa sholý jasaı kelip Memleket basshysy: «Osy kezeńde ádebıette rýhanı jańǵyrý, ulttyq túleý, halyqtyq qasıetter qapysyz boı kórsetti. Árıne, bul órleýden ónerdiń basqa salalary da qaǵys qalǵan joq. Biraq ádebıet alda júrdi, aldyńǵy sheptiń aıbaty da, qaıraty da bola bildi», – dep atap kórsetedi. Bul sóz óne­rin kıe tutqan barsha qalam qaıratkerlerine berilgen ádil baǵa, úlken senim dep bilýimiz kerek. «Uly Dala ulaǵattary» ótke­nimizge oı júgirter, keleshe­gimizge baǵdar silter syndarly eńbek, som týyndy. Osy eńbektegi Prezıdent tolǵanysy ár qazaqstandyqtyń tolǵanysyna ulasar bolsa, ıaǵnı «júrekten shyqqan sóz júrekke jeter bolsa», Otanymyzdyń bola­shaǵyna degen ult senimi nyqtala túspek. Nurlan ORAZALIN, Memlekettik syılyqtyń laýreaty, Qazaqstan Jazýshylar odaǵynyń basqarma tóraǵasy