Foto: Ashyq derekkóz
Bul jaǵdaıǵa qatysty 24.kz tilshisine pikir bildirgen halyq ártisi Merýert О́tekeshova jańalyqty ózi de áleýmettik jeliden estip, tańǵalǵanyn jetkizdi. Onyń aıtýynsha, Baıan Alagózovamen jeke tanys emes, olar buǵan deıin betpe-bet kezdespegen.
Aktrısa prodıýserdiń eńbegin syrttaı baqylap, ony talantty maman retinde qurmetteıtinin atap ótti.
«Bul jańalyq men úshin óte kútpegen jerden boldy. Baıanmen ómirde kezdespegen ekenbiz, jeke tanystyǵymyz joq. Biraq onyń jumystaryn syrttaı baqylap, talantty prodıýser retinde qurmetteımin», dedi Merýert О́tekesheva.
Sonymen qatar aktrısa kópshiliktiń nazaryn aýdartqan «Qyz Jibek» fılmindegi kamzol máselesine de toqtaldy. Onyń aıtýynsha, túsirilimnen keıin ol kıimniń naqty qaıda saqtalǵany belgisiz bolǵan, kınostýdııa jabylǵan kezeńde jeke adamdardyń qolynda qalyp qoıýy múmkin.
Merýert О́tekeshova bul jádigerdiń búginge deıin saqtalyp kelgenine rızashylyǵyn bildirip, ony mádenı qundylyq retinde baǵalady. Sondaı-aq kamzoldyń keıin murajaıǵa tapsyrylatynyna oń kózqaras tanytty.
Aktrısa Baıan Alagózovanyń bul bastamasyn ónerge degen qurmet dep qabyldaıtynyn jetkizdi. Degenmen, syılyqty qabyldaý nemese qabyldamaý máselesi boıynsha naqty sheshim áli qabyldanbaǵan, sebebi taraptar áli júzbe-júz kezdesip sóılespegen.
«Quman ekeýimiz ómir boıy halyq úshin eńbek ettik. Bizde bıznes bolǵan joq, bir jalaqyǵa qarap jumys istedik. Sondyqtan Baıan bizdiń jaǵdaıymyzdy túsinip, osyndaı izgi nıet tanytyp otyr dep oılaımyn», dedi aktrısa.
Qazirgi tańda bul oqıǵa áleýmettik jelilerde keńinen talqylanyp, kópshilik tarapynan jyly pikirler aıtylyp jatyr.
