Foto: Mádenıet jáne aqparat mınıstrligi
Jıyn barysynda aqparattyq platformanyń memlekettik basqarý mádenıetin jetildirýdegi róli men azamattardyń quqyqtaryn qorǵaýdaǵy mańyzy egjeı-tegjeıli talqylandy.
Prezıdent kómekshisi Erjan Jıenbaev bul júıeniń bes jyl ishinde halyqtyń memlekettik ınstıtýttarǵa degen kózqarasyn aıqyndaıtyn ındıkatorǵa aınalǵanyn atap ótti.
«Bes jyl ishinde «e-Otinish» júıesi halyqtyń memlekettik ınstıtýttarǵa degen kózqarasyn aıqyndaıtyn obektıvti ındıkatorǵa aınalyp, ashyqtyq pen eseptilikke negizdelgen memlekettik qyzmettiń jańa ádebin qalyptastyrýǵa yqpal etti. Azamattardyń ótinishterimen jumys biryńǵaı ári tutas tetik retinde jolǵa qoıyldy. Bul mehanızm ótinishterdi jedel qaraýdy ǵana emes, memlekettik organdar qyzmetine obektıvti baǵa berýdi de qamtamasyz etedi», dedi Erjan Jıenbaev.
Premer-mınıstrdiń orynbasary Aıda Balaeva bul júıeniń Memleket basshysy Qasym-Jomart Toqaevtyń strategııalyq baǵytynyń is júzindegi kórinisi ekenine toqtaldy.
«Qasym-Jomart Kemeluly Toqaevtyń bastamasymen júzege asqan konstıtýsııalyq reformalar Ádiletti Qazaqstandy qalyptastyrýdyń jańa standarttaryn bekitti. Onyń ózeginde adam quqyǵy, bıliktiń qoǵam aldyndaǵy jaýapkershiligi jáne azamattarmen ashyq dıalog qaǵıdattary tur. «e-О́tinish» júıesiniń qyzmeti dál osy qaǵıdattarmen tolyq úndesedi. Osy ýaqyt ishinde júıe azamattardyń ótinish berý jáne memlekettik máselelerdi sheshýge qatysý jónindegi konstıtýsııalyq quqyǵyn iske asyratyn pármendi tetikke aınaldy. Jyl saıyn osy júıe arqyly azamattardyń mıllıondaǵan ótinishi qaralady. Árbir kórsetkishtiń artynda naqty adam, onyń máselesi, ádildikke degen úmiti jáne memleketke artqan senimi tur. Shyn máninde, «e-О́tinish» qoǵam men bılik ınstıtýttary arasyndaǵy senim kópiri bolyp otyr», dedi Aıda Balaeva.
Konferensııa barysynda О́tinishterdi qaraýdy baqylaý bóliminiń meńgerýshisi Qanatbek Jaısanbaev, AMANAT partııasy Saıası menedjment akademııasynyń dırektory Tamara Dúısenova, QR Bas prokýratýrasy Quqyqtyq statıstıka jáne arnaıy esepke alý jónindegi komıtetiniń tóraǵasy Sábıt Nurlybaı, QR Joǵarǵy Sotynyń ákimshilik ister jónindegi sot alqasynyń tóraǵasy Aslan Túkıev quttyqtaý sóz sóıledi.
Is-shara azamattarmen tikeleı jumys isteıtin front-lınııalar qyzmeti, memlekettik sektordaǵy jasandy ıntellektiniń róli jáne halyqpen ózara is-qımyl standarttary týraly baıandamalarmen jalǵasty.
Búginde «e-Otinish» – 50 myńdaı memlekettik organ men uıymdy biriktirgen tolyqqandy memlekettik ekojúıe. 3 mıllıonnan astam azamat platformanyń ıgiligin kórip otyr. Bes jyl ishinde júıe arqyly 16 mıllıonnan astam ótinish qaralǵan.
Konferensııa aıasynda Qasym-Jomart Toqaevtyń Jarlyǵymen birqatar azamat memlekettik nagradalarmen – «Qurmet» ordenimen, II dárejeli Baýyrjan Momyshuly atyndaǵy «Aıbyn» ordenimen jáne «Eren eńbegi úshin» medalimen, sondaı-aq Prezıdenttiń «Qurmet» gramotasy jáne «Alǵys» hatymen marapattaldy. Sonymen qatar birqatar memlekettik qyzmetshige Premer-mınıstrdiń orynbasary – Mádenıet jáne aqparat mınıstriniń alǵys hattary tabystaldy.
