2017 jyldyń 10 qańtarynan bastap vokzal mańy aýmaǵyndaǵy turaq aqyly bolady. «Astana qalasynyń turaq keńistigin basqarý» jobasy sheńberinde engiziletin aqyly turaq júıesi vokzal mańyndaǵy alańda kólik quraldarynyń aınalymyn 30-40%-ǵa ulǵaıtýǵa múmkindik beredi, dep habarlaıdy qala ákimdigi.
Sondaı-aq, qoǵamdyq kólikke suranys 15-20%-ǵa artyp, aýdandaǵy joldar jelisine júkteme 20-30%-ǵa azaıady dep kútilýde. Sonymen birge, aqyly avtoturaq júıesi jol-kólik oqıǵalarynyń sanyn 70-80%-ǵa, al turaqqa júktemeni 40-50%-ǵa tómendetýge múmkindik beredi. Aqyly avtoturaqty uıymdastyrý boıynsha daıyndyq jumystary aıaqtalýǵa jaqyn.
Avtoturaqtyń syıymdylyǵy 250 kólikke eseptelgen, sonyń 9-y múmkindigi shekteýli júrgizýshilerge jáne 20 oryn resmı taksomotorlyq kásiporyndardyń ókilderine arnalǵan.
Alǵashqy 30 mınýt úshin aqy alynbaıdy, kólikti eki saǵatqa deıin qaldyrý - 200 teńge, 12 saǵatqa deıin - 1000 teńge, 24 saǵatqa - 1800 teńge, avtoturaq qyzmetin ekinshi táýlik paıdalanǵany úshin 2000 teńge alynady. Sonymen birge, vokzaldyń aýmaǵynda 100 orynǵa arnalǵan balamaly tegin avtoturaq jumysyn jalǵastyrady.
Avtoturaqqa kólik quralyn ornalastyrý úshin tólem parkomattarynyń kómegimen iske asyrylady, olar temirjol vokzalynyń eski jáne jańa ǵımarattarynyń aýmaǵynda ornalasqan. Avtoturaq bıletin joǵaltqan jaǵdaıda kólik ıeleri ASTRA Park ákimshiligine (eski temirjol vokzalynyń ekinshi qabatynda) júgine alady.
Aqyly turaq júıesi jumys isteıtin alǵashqy ýaqytta esep aıyrysý aqshalaı túrde júrgizilip, kezek-kezeńmen júıege onlaın-tólem, banktik kartamen jáne uıaly qosymsha arqyly tólem jasaý qyzmetteri engiziledi.
