Golovkın: Eń úzdik shoýdy kórsetýge ýáde beremin

WBA (Super), IBO, WBC jáne IBF tujyrymdary boıynsha orta salmaqta álem chempıony Gennadıı Golovkın (36-0, 33 KO) Denıel Djeıkobspen (32-1, 29 KO) ótetin kezdesýi týraly óz pikirin bildirdi. Bul týraly vesti.kz habarlady. «Shyny kerek, qobaljyp júrmin. Djeıkobs – buǵan deıingi qarsylastarymnyń ishindegi eń myqtysy. Sondaı-aq, onyń komandasynda men judyryqtasqan úsh boksshy bar. Al Madison Square Garden meniń ekinshi úıim sekildi, jankúıerlerdiń qoldaýy erekshe kúsh beredi», – dedi Golovkın. «Tórt belbeýim bar, ol kimniń bolsa da armany. 18 naýryz kúni orta salmaqta kimniń myqty ekenin anyqtaýymyz kerek, ol óte mańyzdy. Bul kúni tarıhtaǵy úzdik shoýdy kórsetýge ýáde beremin», - dep málimdedi Golovkın. Aıta keteıik, kezdesýdiń bıletteri 24 jeltoqsannan bastap satylymǵa shyqqan. Nıý-Iork qalasyndaǵy Madison Square Garden arenasynda bir orynnyń eń arzan quny 100 dollardy qurasa, eń qymbaty – 1000 dollar.