Qazaqstan álemdi beıbitshilikke úndeıdi

Burnaǵy kúni AQSh-tyń Nıý-Iork qalasynda ótken Birikken Ulttar Uıymy Qaýipsizdik Keńesiniń bıylǵy alǵashqy otyrysyna Keńestiń jańa múshesi retinde Qazaqstan da qatysty. Mınıstrler deńgeıinde ótkizilgen kópshilik otyrysynda «Qaqtyǵystardyń aldyn alý jáne beıbitshilikti saqtaý» taqyrybynda ashyq pikirtalas órbidi. Onda elimizdiń Syrtqy ister mınıstri Qaırat Ábdirahmanov Qazaqstannyń 2017-2018 jyldardaǵy BUU Qaýipsizdik Keńesiniń múshesi retindegi jumysynyń negizgi saıası basymdyqtaryn qamtıtyn Memleket basshysynyń Saıası úndeýin jarııa etkeni málim. Osyǵan baılanysty keshe Orta­lyq kommýnıkasııalar qyzmetinde ótken baspasóz máslıhatynda Syrtqy ister mınıstriniń orynbasary Erjan Ashyqbaev úndeýde aıtylǵan negizgi máselelerge toqtaldy. Onyń aıtýynsha, elimizdiń teńgerimdi syrtqy saıasaty, barlyq eldermen, onyń ishinde ıadrolyq bestikpen áriptestik qarym-qatynastary jáne Memleket basshysynyń tıimdi bitimgershilik pen dánekerlik bastamalary eskerile otyryp, Qazaqstan Ortalyq Azııadan BUU Qaýipsizdik Keńesine saılanǵan tuńǵysh memleket bolyp otyr. Keńestiń basqa múshe memleketteri Qazaqstannyń bul organdaǵy áleýetti róline qısyndy boljamdar jasap, joǵary qyzyǵýshylyq bildirdi. Syrtqy ister mınıstriniń orynbasary Erjan Ashyqbaev Elbasy Úndeýinde Qazaqstannyń Keńes sheńberinde atqaratyn jumysynyń negizi bolatyn jeti basym baǵyt kórsetilgenin aıtyp berdi. «Birinshi basym baǵyt – ıadrolyq qarýdan azat álemge qol jetkizý. Ekinshisi – ǵalamdyq jáne óńirlik aýqymdarda áskerı teketires deńgeıin tómendetý arqyly ǵalamdyq soǵys qaýpiniń aldyn alý jáne ol qaýipti múldem joıý. Úshinshi basymdyq – Ortalyq Azııada óńirlik beıbitshilik, qaýipsizdik, áriptestik pen damý aımaǵynyń modelin qurý. Tórtinshi basymdyq halyqaralyq terrorızm jáne ekstremızmmen kúreske berilgen. Besinshisi – Afrıka qurlyǵynda beıbitshilikti qalpyna keltirý máselesi. Altynshy basymdyq soǵys pen qaqtyǵystardyń aldyn alý, adam quqyqtaryn qorǵaý, ornyqty damý maqsattaryn júzege asyrý, klımattyń ózgerýimen kúresý boıynsha birlesken sharalar qoldanýdy qarastyrady. Jetinshi basym baǵyt – Eýropa men Amerıka, Azııa men Afrıkanyń barlyq óńirlik ujymdyq qaýipsizdik uıymdarynyń arasynda áriptestikti keńeıtý», – dep atap ótti E.Ashyqbaev. Mınıstrdiń orynbasary elimiz ıadrolyq qarýsyzdanýdyń belsendi jaqtaýshysy ekenin, 2015 jyly BUU Bas Assambleıasynyń sessııasynda Elbasy Nursultan Nazarbaev 2045 jyly BUU-nyń 100 jyldyq mereıtoıy qarsańynda ıadrolyq qarýdan azat álemge qol jetkizý týraly usynys bildirgenin eske saldy. «Qazaqstan Japonııamen qatar Iаdrolyq synaqtarǵa jappaı tyıym salý uıymynyń teń tóraǵasy bolyp tabylady. MAGATE-nyń sheshimimen elimiz aýmaǵynda Tómen baıytylǵan ıadrolyq otyn banki quryldy. Biz Qaýipsizdik Keńesiniń jappaı qyryp-joıý qarýdy taratpaý rejimin kúsheıtý jónindegi 1540-shy qararynyń múltiksiz oryndalýyna kómektesetin bolamyz. Qazaqstan Irannyń ıadrolyq baǵdarlamasy tóńiregindegi máselelerdi retteýge úles qosty jáne de osyǵan uqsas jaǵdaılar men daǵdarystarda da qoldaý kórsetýge daıyn. Koreı túbegindegi ıadrolyq qarý máselesi boıynsha jedel ári konstrýktıvti sheshim qabyldaý asa mańyzdy mindet bolyp tabylady», – dep atap ótti E. Ashyqbaev. Onyń aıtýynsha, álemniń beıbitshilik súıgish bóligi ǵalamdyq soǵys qaýpiniń aldyn alý máselesinde Qazaqstan basshysynyń «Álem. HHI ǵasyr» manıfesinde atap ótilgen «memleketaralyq problemalardy retteý quraly retinde soǵystan bas tartyp, beıbitshilikke qol jetkizý XXI ǵasyrda adamzatty aman saqtaýdyń negizgi amaly bolyp tabylady», degen pikirine súıenedi. Aıdar О́RISBAEV, «Egemen Qazaqstan»