Qorǵanys qarymy artyp keledi

Búginde elimizdiń áskerı qaýipsizdigin qamtamasyz etýde Qarýly Kúshterimizdiń qorǵanys qabileti kúnnen-kúnge artyp keledi. Jaýyngerlik daıyndyq ta sol talapqa saı júrgizilýde. Máselen, ótken jyldyń segiz aıynda «Aıbalta-2016» oqý-jattyǵýyna 5000-ǵa jýyq áskerı qyzmetshi tartylsa, oǵan qosa, 1500 birlikten asa tehnıka, 30 birlik avıasııalyq tehnıka jumyldyryldy. Sol sııaqty «Qarataý-2016» oqý-jattyǵýyna 7000-nan asa áskerı qyzmetshi qatyssa, 2500 birlikke jýyq tehnıka men 70-ten asa avıasııalyq tehnıka qoldanylǵan. Buǵan qosa, ótken tórt aıda 950-den asa oqý-jattyǵý uıym­dastyrylypty. Árıne, munyń bári elimiz áskeriniń daıyndyǵy talapqa saı ekendigin jáne kez kelgen tapsyrmany oryn­daýǵa qashanda saqadaı-saı turatyndyǵyn bildiredi. Osy arada áskerı qyzmetti jaqsy atqarý úshin kóptegen ózgerister bolyp jatqanyn aıta ketken jón. Sonyń biri retinde, máselen, elimizdiń Qarýly Kúshterinde jáne basqa áskerleri men áskerı qurylymdaryndaǵy Saptyq jarlyqqa jańa ózge­rister engizilgen bolatyn. Mysaly, buryn sapta júrgende adym uzyndyǵy 70-80 sm bolatyn bolsa, endi ol 60-70-ten aspaıdy. Sol sııaqty adym jyldamdyǵynyń jıiligi azaıyp, aıaqty kóterý bıiktigi de azaıtyldy. Al bile-bilsek, bul jańadan engizilgen ózgerister áskerı qyzmetshilerdiń súıek pen bulshyq et júıesine túsetin júktemeni azaıtady. Sarbazdar saptyq jattyǵý jasap júrgende sharshap qalmaıdy. Sonymen qatar, sap qatarynda anaǵurlym naqty túzelýdi qamtamasyz etedi eken. Munyń bári negizgi jaýyngerlik qyzmetti atqarýǵa kóp septigin tıgizedi. Áskerı daıyndyq talap­tarynyń negizi Áskerı doktrınamyzda da naqty kórinis tapqan. Elimizdiń Áskerı doktrınasy memlekettiń áskerı qaýipsizdigin qamtamasyz etýge, qarýly janjaldardy boldyrmaýǵa, áskerı uıymdy damytýǵa arnalǵan. Árıne, qazirgi kezde buryn aıqyndalǵan baǵyttardy iske asyrý aıasynda áskerı qaýip­sizdikti qamtamasyz etý, mem­lekettiń áskerı uıy­myn je­tildirý, shaǵyn, biraq teh­nıkalyq turǵydan jaraqtandyrylǵan jáne utqyrlyǵy joǵary Qarýly Kúshterdi qurý maqsatynda nazarǵa alynǵan is-sharalardyń eleýli aýqymy oryndaldy dep aıta alamyz. Qazirgi ýaqytta Qazaqstanda Qurlyq áskerlerinen, Áýe qorǵanysy kúshterinen jáne Áskerı-teńiz kúshterinen turatyn Qarýly Kúshterdiń ońtaıly qurylymy quryldy. Qurlyq áskerleriniń quramyna tórt óńirlik qolbas­shylyqtyń áskerleri, sondaı-aq, Aeroutqyr áskerleri, Zymyran áskerleri men artıllerııa kirdi. Bul oraıda jeke adamnyń, qoǵam men memlekettiń qaýip­sizdigin qamtamasyz etýge, adam jáne azamattyń quqyqtary men bostandyqtaryn qylmystyq, ózge de zańǵa qarsy qol suǵý­shylyqtan qorǵaýǵa arnalǵan utqyr, kásibı daıar­lanǵan ásker qatary artty. Tótenshe jaǵdaılardyń aldyn alý men ony joıýdyń memlekettik júıesin jetildirý jáne nyǵaıtý prosesi, onyń ishinde dúleı zilzalalarǵa, apattarǵa qarsy is-qımyl ınfraqurylymyn jáne olardyń táýekelderin basqarý júıesin damytý, shuǵyl den qoıý kúshterin qajetti avarııa­lyq-qutqarý tehnıkasymen jabdyqtaý, monıtorıng pen boljaýdyń tıimdi júıesimen qamtamasyz etý jalǵastyrylýda. Osylaısha, Áskerı doktrı­naǵa saı, búginde Qarýly Kúsh­terdi, basqa da áskerler men áskerı qurylymdardy daıarlaý jan-jaqty júrgizilýde. Alaıda, álemdegi jáne óńirdegi áskerı-saıası jaǵdaıdyń shıelenisýi, tehnıkalyq progress, qarýly kúres júrgizýdiń nysandary men tásilderin jetildirý aıasynda áskerı qaýipsizdiktiń qazirgi zamanǵy qaterlerine qarsy is-qımyl tanytý úshin memlekettiń áskerı uıymynyń tıimdiligin udaıy arttyryp otyrý qajet. О́ıtkeni, ol memlekettiń áskerı saıasaty men áskerı qaýipsizdigin qamtamasyz etý júıesin odan ári damytýdy talap etetindigin esten shyǵarmaǵan jón. Bul mindetter Áskerı doktrınada jan-jaqty kórsetilip, bári de talapqa saı atqarylyp jatqandyqtan, elimizdiń qorǵanys qabiletiniń aldaǵy ýaqytta odan ári arta beretinine senim mol. Aleksandr TASBOLATOV, «Egemen Qazaqstan»