Onyń málimdeýinshe, Aýǵan soǵysynda jaraqat alǵan azamattar 2020 jyly Prezıdent Jarlyǵymen bekitilgen Ardagerler týraly zańda kórsetilgendeı Uly Otan soǵysynyń ardagerlerine teńestirilgen jáne zań boıynsha jergilikti atqarýshy organ olardy úımen, basqa da áleýmettik kómekpen qamtamasyz etýi tıis.
«Apatty úıde turyp jatyrmyn. Baspana salýǵa birinshiden jaǵdaıym joq, ekinshiden densaýlyǵym kótermeıdi. Jasym da kelip qaldy. Zań sheńberinde jergilikti ákimdikten kómek surap, ótinish hat jiberdim. Tıisti azamattarǵa da jolyqtym. Biraq áli nátıje bolmaı jatyr. Qala ákimdigi qolushyn sozyp, bul máseleni oń jaǵynan sheship beredi degen úmittemin», deıdi ardager.
Sh.Quralbaev qalalyq qurylys basqarmasyna ótinish hat jazǵan. Alaıda ondaǵy mamandar basqarma jeke sektordaǵy úılerdi jóndeýge, jańasyn salyp berýge quzyretti emes ekenin jetkizgen. Jaýap hatta sondaı-aq aýdan ákimdigi demeýshiler esebinen turǵyn úıge járdem bere alatyny jaıynda jaıynda.
Osyǵan baılanysty biz Eńbekshi aýdany ákimdigine habarlastyq. Áleýmettik bólim basshysy Ǵalymjan Myrzashev bul jaǵdaıdan habardar ekenin málimdedi. Ákimdik osy másele boıynsha ardagermen kezdesip, turmys jaǵdaıymen tanysqan. Bul rette jergilikti atqarýshy bılik áleýmettik qoldaýdyń bir nusqasyn qarastyryp otyr.
Ardager óz qaltasynan táýelsiz baǵalaýshylardy jaldap, úıi turýǵa jaramsyz degen tólqujat aldyrýy kerek. Sol qujat boıynsha keıin oǵan ákimdik tarapynan tegin baspana beriledi.
Alaıda qazir turyp jatqan jeke sektordaǵy úıi memleket esebine ótedi. Nemese Jańǵyrtý baǵdarlamasymen Kóksaı shaǵynaýdanynda buzylyp jatqan eski úılerdiń qurylys materıaldaryn tegin jetkizip berýge ákimdik kelisken. Bul usynysty biraq ardager qabyl almapty. Aýdandyq ákimdik mamany Sh.Quralbaevty Turǵyn úı basqarmasyna úı kezegine tura almaıtynyn málimdedi. Sebebi qazirgi baspanasy óziniń atynda eken. Ekinshiden ardagerdiń turmysy eshqandaı áleýmettik osal topqa jatpaıdy. Memlekettiń tegin úımen qamtý sharasy tek osymen ǵana shektelgen. Eńbekshi aýdanynda ornalasqan iri kásiporyn «PetroQazaqstanOılProdakts» munaı óńdeý zaýyty demeýshilik tanytyp, aınalasyndaǵy eldi mekenderge sport keshenderin salyp berip jatyr.
Mamannyń aıtýynsha, ınvestorlar bul jerde jeke sektordaǵy úılerdiń qurylysyn qarjylandyrýǵa mindetti emes. Olar bıznestiń áleýmettik jaýapkershiligi aıasynda qoǵamdyq nysandar salýdy óz moıyndaryna alyp otyr. Qysqasy maman Aýǵan soǵysy ardagerlerin tegin úımen qamtý zań sheńberinde qarastyrylmaǵanyn málimdedi.
Qorǵanys isteri jónindegi departament qyzmetkeri, ardagerler qoǵamdyq birlestikteriniń tóraǵasy Shymkent qalasynyń qurmetti azamaty Serikbaı Onbaevtyń aıtýynsha, ekimyńynshy jyldary shyqqan Úkimettiń №2247-shi qaýlysynda Aýǵan soǵysy ardagerlerine tegin baspana berý máselesi áleýmettik kómekterdiń bir tetigi retinde qarastyrylǵan. Sonyń aıasynda aýǵan jerinde shaıqasqan qanshama maıdanger úıli boldy. Alaıda 2020 jyly 6 mamyrda shyqqan Úkimettiń 322-6 qaýlysymen bul jeńildikter óziniń kúshin joıdy. Esesine Semeıdegi synaq polıgonynda áskerı mindetin ótegen, Chernobyl apatyn joıýǵa atsalysqan, Taýly Qarabaq, Tájik-Aýǵan, Aýǵan soǵysynda bolǵandar Uly Otan soǵysy ardagerlerine teńestirildi.
Serikbaı Onbaevtyń málimdeýinshe, jýyrda Qazaqstan boıynsha Aýǵan soǵysy ardagerleriniń kezekten tys jınalysy ótken. Onda Úkimettiń burynǵy qaýlysyn keri qaıtaryp, Aýǵanstandaǵy soǵysqa qatysqan azamattarǵa bólek mártebe berý týraly usynystar aıtyldy. Olar arnaıy ótinish hat retinde Qorǵanys mınıstrligine joldandy.
Endigi rette ardagerler mınıstrlikten qandaı jaýaptyń keletinin kútip otyr. Qoǵamdyq birlestikter tóraǵasynyń aıtýynsha Shymkentte 886 Aýǵan soǵysy ardageri bar. Biraq beıresmı olardyń sany 2.5 myńnan asady. Kópshiligi ótirik qujat jasatyp alǵandar. Sondyqtan da Prezıdent elde ártúrli ardagerler kóbeıip ketkenin másele retinde aıtqan bolatyn. Qazir Aýǵan jerinde soǵysqan ardagerlerdiń derekteri qorǵanys isteri jónindegi departament tarapynan tekserilý ústinde. Ol úshin Reseıdiń Podolsk qalasyndaǵy Ortalyq áskerı arhıvten qujattary suratylyp jatyr.
Jalpy Shymkentte 15 aqpan – Keńes áskeriniń Aýǵanstannan shyǵarylǵan kúnine oraı jergilikti máslıhat bekitken erejege saı 50 aılyq eseptik kórsetkish mólsherinde bir rettik syıaqy taǵaıyndalǵan. Al múgedektigi bar ardagerlerge saýyqtyrý ortalyqtary men shıpajaılarǵa tegin joldama beriledi. Qalalyq jumyspen qamtý jáne áleýmettik qorǵaý basqarmasynan alynǵan málimet bul. Sonymen memleket tarapynan Aýǵan jerindegi maıdan joryǵynda bolǵan azamattarǵa osyndaı jeńildikter qarastyrylǵan.
Qoryta aıtqanda jastyq shaǵynda Otanǵa qyzmet etip, ómirin qurbandyqqa tikken sarbazdar qartaıǵan shaǵynda qoǵamǵa kereksiz bolyp, tasada qalyp ketpesinshi. Osy rette Shadııar aǵamyzdyń máselesi óziniń ońdy sheshimin tabar degen senimdemiz.
