Brýna MOÝRA, shańǵyshy: «Almaty aportynyń dámin kórgim keledi»

Qysqy Ýnıversıada oıyndaryna Brazılııadan 3 adamnan turatyn delegasııa kelmek. Brazılııanyń atynan qatysatyn Brýna Moýra shańǵy jarystarynda oıyn kórsetedi. Brazılııalyq stýdent júldeli orynnan tabylmaǵannyń ózinde, úlken sportta tájirıbe jınaqtap, atlettik áleýetin arttyrýdyń ózin de olja sanaıtynyn aıtady. Brazılııalyq sportshy Qazaqstan týraly meılinshe aqparat jınaǵany baıqalady. Shańǵyshy «Medeý» muz aıdynyn kórýdi jáne Almatynyń ataqty aportynyń dámin tatyp kórýdi armandaıdy eken. Brýnanyń bapkeri Chao Sıkýera: «Brýna bir jyl boıy Brazılııada rolık­tik shańǵymen (rollerskis) daıynda­­lyp, júgirý, velosıped sekildi min­detti daıarlyqtan ótti. Shildede biz Argen­tınadaǵy «Sero-Kastor-Ýshýaııa» taý-shańǵy shıpajaıynda jattyǵyp, jel­toqsannan bastap Eýropada shyń­dalyp jatyrmyz» deıdi. Brýna Moýranyń aıtýyna qaraǵan­da, ol sońǵy jattyǵý jylynda úlken daıyndyqtan ótken. «Men tolyǵymen oqý men jattyǵýlarǵa den qoıý úshin basqa qalaǵa kóshtim. Sportpen kásibı deńgeıde shuǵyldana bastadym. Almatydaǵy qysqy  Ýnıversıadaǵa jaqsy daıarlyqpen baryp, qysqy sport túrlerinde Brazılııanyń namysyn laıyqty deńgeıde qorǵaý maqsatynda túrli eýropalyq jarystarǵa belsendi qatystym», – deıdi Brýna. Shańǵyshy qyz Qazaqstanda jaqsy oıyn kórsetý úshin búkil kúshin salmaq. Ol sporttyń basqa túrlerinen ótetin basqa jarystarǵa baryp, «olım­pıada­lyq» kóńil-kúıdi sezinsem, sondaı-aq, Almatynyń sport nysandaryn kórip qaıtsam dep otyr. «Konkımen júgirý sportynda asa ataqty aıdynnyń biri sanalatyn «Medeý» týraly kóp estigenmin. Dál sol keshende kóptegen álemdik rekordtar ornatylǵanyn da bilemin. Respýblıka elordasy – Astana, al Almaty óziniń almasymen tanymal ekenin oqyp bildim. Sondyqtan, Ýnıversıadaǵa barǵanda sol almalardyń dámin tatyp kórsem deımin», – deıdi brazılııalyq sportshy. Aınash ESALI, «Egemen Qazaqstan» ALMATY