Bul – jahan kóz tikken úderis

Keshe Astanadaǵy «Rixos President Astana» qonaq úıinde Sırııadaǵy shıelenisti retteý boıynsha halyqaralyq kelissózder bastalǵany belgili. Jabyq esik jaǵdaıynda ótip jatqan kelissózder bir táýlikke sozylady dep josparlanýda. «Qazmedıa» ortalyǵynda baspasóz máslıhatyn ótkizgen Syrtqy ister mınıstriniń orynbasary Roman Vasılenko kelissózderge halyqaralyq qoǵamdastyqtyń qyzyǵýshylyǵy óte joǵary ekenin málimdedi. Ol sharaǵa 7 taraptyń ókili qatysyp jatqanyn jetkizdi. Atap aıtqanda, Sırııa úkimetiniń delegasııasyn BUU janyndaǵy osy eldiń turaqty ókili Basar ál-Djafarı basqarady. Sırııa oppozısııasynyń delegasııa­synda shamamen 15 oppozısııalyq toptyń ókili bar. Reseı delegasııasy osy el prezıdentiniń Sırııa isi boıynsha arnaıy ókili Aleksandr Lavrentevtiń basshylyǵymen kelip otyr. Túrik jáne Iran delegasııalaryn atalǵan memleketterdiń Syrtqy ister mınıstrleriniń orynbasarlary – Sedat Onal men Sadek Hýseın Djaberı Ansarı bastap keldi. Budan bólek, Sırııadaǵy daǵdarysty retteý prosesine BUU Bas hatshysynyń Sırııa jónindegi arnaýly ókili Staffan de Mıstýra men AQSh-tyń Qazaqstandaǵy elshisi Djon Krol qatysyp otyr. Sonymen qatar, vıse-mınıstr Astana prosesi boıynsha aqparat taratýǵa álemniń túkpir-túkpirinen 320 jýrnalıst kel­genin málim etti. Olardan bólek, 120 otandyq BAQ ókili bar. «Buqaralyq aq­parat quraldarynyń ókilderi kelissóz­derdiń basynda ǵana foto jáne vıdeo túsi­­ri­limge jiberiledi. О́ıtkeni, onyń negiz­gi bóligi jabyq rejimde ótedi. О́z­deri­­ńiz baıqap otyrǵandaı, qazirgi ýaqyt­­ta Astanadaǵy sırııaaralyq kelis­sóz­­der­ge halyqaralyq qoǵam­das­tyqtyń qy­zy­ǵý­shylyǵy óte joǵary», – dedi Qa­zaq­stan Syrtqy ister mınıstriniń orynbasary. Ol, sondaı-aq, qajet bolǵan jaǵ­daıda Qazaqstan aldaǵy ýaqytta da Sırııa má­selesi boıynsha halyq­aralyq kezdesý alańyn usynýǵa daıyn ekendigin málim­dedi. Aıdar О́RISBAEV, «Egemen Qazaqstan»