Tramp saıasaty teńgeniń baǵamyna tıimdi bolyp tur

AQSh prezıdentiniń ınaýgýrasııasynda aıtqan ulttyq ekonomıkany syrtqy áserlerden qorǵaý saıasaty dollardyń ózindik qunyn túsirip jiberdi. Apta basynan beri dollardyń eýro men ıenge shaqqandaǵy baǵamy kúrt quldyrap, búginniń ózinde AQSh dollary keshegi sessııamen salystyrǵanda 1 paıyz qunsyzdanyp, nátıjesinde alty aptadan beri bolmaǵan eń tómengi kórsetkishke tústi. "Degenmen, biz uzaqmerzimdi kezeńde dollardyń qaıta kúsheıetinine senimdimiz. Qazirgi keleńsizdik Tramp saıasatyna qatysty alańdaýshylyqtan bolyp otyr", - dedi Merrill Lynch ınstıtýtynyń ókili Sıýsýke Iаmada. Dollardyń bulaısha quldyraýy osy aptada munaı baǵasynyń kóterilýine de áser etti. Búgin Astana ýaqytymen tańǵy saǵat 09:00-de 55,30 dollarǵa baǵalanǵan Brent markasy, dollar álsireıtin bolsa, taǵy da kóterile túsýi yqtımal. Munaıdyń qymbattaýy óz kezeginde teńgeniń oń jambasyna kelip otyr. Qatarynan úsh kún nyǵaıǵan ulttyq valıýtanyń dollarǵa shaqqandaǵy baǵamy búgin KASE-niń tańǵy sessııasynda 327,76-ǵa tómendedi.