Talqylaýǵa Parlament Májilisiniń depýtattary, prokýratýra organdarynyń ókilderi, zańger-ǵalymdar men sarapshylar qatysty.
QazUÝ Basqarma tóraǵasy – rektor Janseıit Túımebaev ýnıversıtet dástúrli túrde el úshin taǵdyrsheshti sheshimderdi talqylaıtyn zııatkerlik alań bolyp sanalatynyn atap ótti. Onyń aıtýynsha, konstıtýsııalyq jańǵyrtý saıası júıeni sapaly jańartýdyń jáne azamattardyń quqyqtaryn qorǵaý tetikterin nyǵaıtýdyń berik negizin qalaıdy.
«Memleketimizdiń tarıhynda alǵash ret jańa Konstıtýsııa jobasy búkil qazaqstandyq qoǵam tarapynan belsendi túrde talqylanyp jatyr. Jańa Konstıtýsııa jobasyna qatysty 10 myńnan astam azamat óz usynysy men pikirin bildirdi», dedi Janseıit Túımebaev.
Májilistiń Halyqaralyq ister, qorǵanys jáne qaýipsizdik komıtetiniń tóraǵasy Aıgúl Quspan konstıtýsııalyq reformanyń Qazaqstandy demokratııalandyrý baǵytynyń zańdy jalǵasy ekenin atap ótti. Onyń sózinshe, jańa quqyqtyq normalar azamattardyń memleket basqarý úderisterine qatysýyn edáýir keńeıtip, bılik ınstıtýttaryn qoǵamǵa ashyq ári esep beretin etedi.
Májilis depýtaty Irına Smırnova reformanyń qoǵamdyq baqylaýdy ınstıtýsıonaldandyrýdaǵy mańyzyna toqtaldy. Ol Konstıtýsııany jańartý azamattyq sektordyń damýyna qýatty serpin beredi degen pikir bildirdi.
«Qazirgi Konstıtýsııada: «Biz, ortaq tarıhı taǵdyr biriktirgen Qazaqstan halqy, baıyrǵy qazaq jerinde memlekettilik qura otyryp…» delinse, jańa Negizgi zań jobasynda: «Biz, Qazaqstannyń birtutas halqy, baıyrǵy qazaq jerinde memlekettilikti nyǵaıta otyryp, Uly Dalanyń myńjyldyq tarıhynyń sabaqtastyǵyn saqtaı otyryp…» dep jazylǵan. Bul norma tarıhı baılanysqa, ýnıtarlyq qaǵıdaǵa jáne «Ádiletti Qazaqstanǵa» umtylysty aıqyndaıdy», dedi ol.
Reseıdegi otandastarymyz jańa Konstıtýsııa boıynsha referendýmda daýys bere alady
Almaty qalasynyń prokýrory Serik Káripbekov Negizgi zań jobasyndaǵy negizgi ózgeristerge taldaý jasap, zań ústemdigin qamtamasyz etýdegi prokýratýra organdarynyń fýnksıonaldyq róline toqtaldy.
Dóńgelek ústelge qatysýshylar aldaǵy referendým «Ádiletti Qazaqstandy» qurý jolyndaǵy mańyzdy qadam bolatynyn atap ótti. Kezdesý qorytyndysynda konstıtýsııalyq jańǵyrtý jaǵdaıynda zańnamany jáne quqyq qoldaný tájirıbesin jetildirýge baǵyttalǵan saraptamalyq usynymdar ázirlendi.
Jańa Konstıtýsııa jobasy boıynsha referendýmda qansha adam daýys bere alady?
Eske salaıyq, Memleket basshysynyń Jarlyǵyna sáıkes, 15 naýryzda Qazaqstanda jańa Konstıtýsııany qabyldaý boıynsha respýblıkalyq referendým ótkizý josparlanǵan.
