Islam men Golovkın Astanada bir kúnde jekpe-jek ótkizýi múmkin

Qazaqstandyq kásipqoı boksshy Qanat Islam brazılııalyq Robson Asısspen 17 aqpanǵa belgilengen jekpe-jekten keıin Astanada ótetin boks keshine daıyndyqty bastaýy múmkin. Onyń ókili Berik Sultan boksshynyń aldaǵy josparlary jaıly aıtyp berdi. Bul týraly vesti.kz habarlady. «Mádenıet jáne sport mınıstri 29 qazanda ótken jekpe-jekten keıin Qanat Islamdy qabyldap, oǵan Memleket basshysynyń quttyqtaýyn jetkizdi. Sol kezdesýde EXPO halyqarylyq kórmesin ótkizý barysynda úlken boks keshin uıymdastyryp, sonda Qanat Islamdy shaqyrý týraly oı týyndaǵan bolatyn», – dedi Berik Sultan. Sondaı-aq, Qanat Islamnyń ókili qazaqstandyq boksshynyń EXPO qarsańynda ótkiziletin boks keshine qatysýǵa daıyn ekenin aıtty. «Keshtiń naqty qaı aıda ótetini belgisiz. Boks keshi jazdyń sońynda ótetin bolsa, Qanat mamyr aıynda AQSh-ta taǵy bir jekpe-jek ótkizip, Astanadaǵy boks keshine daıyndyqty bastaýǵa daıyn. Eger odan erte ótetin bolsa, Qanat Islam Assıspen judyryqtasqan soń, daıyndyqty bastaı beredi. Sonymen qatar, dál sol kúni Gennadıı, Beıbit, Janat sııaqty bylǵary qolǵap sheberleri qatyssa nur ústine nur bolar edi», – dedi ol. Aıta keteıik, keshe Boxing Legends TV ınternet-arnasynyń Twitter jelisindegi paraqshasynda orta salmaqta WBA (Super), IBO, WBC jáne IBF tujyrymdary boıynsha álem chempıony Gennadıı Golovkın (36-0, 33 KO) jáne osy salmaqtaǵy WBO belbeýiniń ıegeri aǵylshyn boksshysy Bıllı Djo Sonders (24-0, 12 KO)  jazda Qazaqstanda judyryqtasýǵa kelisti degen málimet shyqqan bolatyn. Eger, bul sózderdiń barlyǵy rastalyp jatsa, qos batyrymyz Astanada bir kúnde judyryqtasýy múmkin.