Jol tártibin 29 ret buzǵan

 júrgizýshiniń kóp jyl boıy aıyppul tólemeı kelgeni qaıran qaldyrady Oblystyq ishki ister departamenti baspasóz qyzmetiniń óńirimizde toǵyz myńǵa jýyq turǵynnyń aıyppul kólemi 100 mıllıon teńgeden asyp ketkeni týraly jarııalanymy bizdi oılandyryp tastady. Maqtanatyn sıfr da, qylyq ta emes, árıne. Memlekettik avtoınspeksııa qyzmetkerlerin jerge qaratatyn derek!  Taýsyla sóıleýimizdiń syry mynada: jol tártibin buzǵan úsh turǵyn sot sheshimimen ákimshilik qamaýǵa alynǵan. Durys-aq. Ne búldirip qoıdy deseńiz, tań­danystan talyp túsýińiz ǵajap emes. Máselen, oblys ortalyǵynyń bir turǵyny 2013 jyldan beri jol qozǵalysy erejesin 14 ret buzsa da, jeldeı júıtkip júre bergen. «Áı» der ájemiz, «qoı» der qojamyzdyń» ortaq erejeni qulaǵyna da qystyrmaıtyn dókeıińdi búginge deıin zań aıasynda jazalaı almaǵany tańdandyrady. Sotqa deıingi yqpal etý, májbúrleý sharalary tolyp jatyr emes pe? 4 jyl boıy emin-erkin júrýin jaıshylyqta saýysqandaı saq MAI qaıtyp ańǵarmaǵan degen saýal týady. Oý, jerdiń jaryǵyna túsip ketpegen bolar? 200 myń turǵyny bar qaladan shómele ishindegi ıneni de tabatyn mezgil emes pe? 70 myń teńge bereshekti tólettire almaı dymy quryǵan MAI-dyń sotqa qaıyrylýy dár­mensizdiktiń bir belgisi sııaqty. «Jer astynan jik shyqty, eki qulaǵy tik shyqty» demekshi, budan da soraqy mysaldy keziktirgende júregimiz toqtap qala jazdady. Taǵy bir azamat jol-kólik erejesin 29 ret (!) buzyp, qaryzy 400 myń teńgeden asyp jyǵylǵan. «Atyń shyqpasa, jer órte» degen osy! Jazataıym Gınnestiń rekordtar kitabyna enip jatsa, bul paqyryń aldymen ákimshilik polısııa qyzmetkerlerine alǵys aıtatyn shyǵar. Quqyq qorǵaý organdarynyń eskertýlerine pysqyryp qara­maıtyn mundaı jaýapsyzdardyń jaýynnan keıingi sańyraýqulaqtaı qaptap ketýin tártip pen talaptyń bosańsyǵanynan izdegen durys sekildi. О́mir ESQALI, «Egemen Qazaqstan» Soltústik Qazaqstan oblysy