Atyraý turǵyndary jer alý úshin elektrondy kezekke turady

Atyraýda jer ýchaskesin alý úshin kezekte turǵandardyń tizimin júıelendirip, olardyń biryńǵaı tizimin avtomattandyrý jumystary bastaldy, dep habarlaıdy «QazAqparat». «Qazirgi tańda Atyraýda turǵyn úı salý úshin úı kezeginde 80 myńnan astam adam tur, olardyń 56,6 myńy oblys ortalyǵynyń turǵyndary. Kezek óte baıaý jyljýda, óıtkeni jer ýchaskeleri tek kommýnıkasııa jelileri júrgizilgen soń ǵana beriledi. Degenmen, jer telimderi berilgen soń da birshama problemalar paıda bolyp otyr. Jurt jer kezeginde jyldap turady. Sol ýaqyt aralyǵynda olardyń mekenjaılary men telefon nómirleri de ózgerip úlgeredi. Sodan soń olardy tabý óte qıyn. Jer úlestirýmen baılanysty osy jáne ózge de ózekti máselelerdi elektrondy úkimetpen yqpaldastyrylǵan jer kezeginde turǵandardyń elektrondy bazasyn qalyptastyrý máselesi sheshedi degen úmit bar», – dep málimdedi óńirlik kommýnıkasııalar qyzmetinde qalalyq jer qatynastary bóliminiń jetekshisi Kákim Shaltanov. Onyń sózinshe, elektrondy baza iske qosylǵan soń ár azamat óziniń kezegin ózi baqylap otyratyn bolady.