Bir ǵasyr saqtalǵan shelek

О́skemendik Elqanat Turym­taıuly úıdiń sút kenjesi. Qara­shańyraqty ustap otyrǵan bul áýlette atadan balaǵa jalǵa­syp kele jatqan kóne jádigerler bar. Máselen, bıe saýatyn aǵash shelekti alaıyq. Bul buıym aq terekten shabylyp jasalǵan eken. Bir ǵasyrdan assa da qanshama qudaıy qonaqty qymyzǵa qan­dyrǵan shelektiń áli keteýi ketpegen. Áli de paıdalanýǵa bolatyndaı bútin, tipti beriktigi arta túskendeı berekeli ydys. – Bul shelek bizdiń uly ájemizdiń jasaýymen birge kelgen eken. Mońǵolııanyń Baıan-О́lgeı aıma­ǵyndaǵy Qyzylqaıyń degen jerde turǵan Baýsha esimdi ájemiz aýyldasy Norıuly Músirbaıǵa turmysqa shyǵady. Músirbaı kedeı bolsa, Baýsha anamyz dáýletti kisiniń qyzy eken. Ákesi Sirgetaı usta adam bolsa kerek, qyzynyń jasaýyn ózi jasap, kıiz úıimen birge, ıaǵnı otaýymen uzatypty. 13 qursaq kótergen ájemizdiń segizinshi balasy bolyp bizdiń ákemiz dúnıege kelgen. HH ǵasyrdyń basynda uzatylǵan Baýsha ájemiz uzaq jasap, jet­pisinshi jyldary dúnıeden ótti. Búginde nemere-shóbereleri uly ájemizdiń dúnıe-múlkin qasterlep, kózdiń qarashyǵyndaı saqtap keledi, –  dedi Elqanat. Aıtýynsha, babadan qalǵan kóne muranyń arasynda bıe saýatyn shelekten basqa et tabaq, keli-kelisap, qazan-oshaq, kúmistelgen júgen jáne tuskıiz sııaqty 15-ke jýyq turmystyq dúnıeler bar. Birshamasy basqa aǵaıyndardyń úıinde saqtaýly. 1997 jyly atamekenge kóship kelgen Elqanat qarashańyraqta sondaı-aq, ataqty Er Jánibektiń qymyz ishken kesesi men qylyshynyń qyny bolǵanyn, ákesi bul zattardy batyrdyń 300 jyldyq mereıtoıy kezinde Astanadaǵy mýzeıge syılaǵanyn aıtty. Dýman ANASh, «Egemen Qazaqstan» О́SKEMEN